Na ina bunye na únye ɔ́nu na útakpete-ma muedi ni, kadi bekyuli bamani, munuu ɔma ndubɔkana na udie Katɔti bɔƒiɔ bɔdi? Na si bɔbɛla na ɔ́bɛla nwuna anumi ni, ɔma ndubɔnu-nwu? Anwu kani mɔɔdi bekyuli ku kadi ƒui lɛlɔ.
Israelƒuɔ, biinyimi ala ani neeebo kɔsia na biládi bina linyese biala lɛlɔ, na biinwíni litemi geen taatɛ na ulu ukpidi lɛlɔ aani kalɛ na livo likpidi lɛɛkwɛ́ taaƒɔ kemo kani kemmo na ɔlɛka edula enye.
Na edula ani nánu na anya alati ákwɛ na ákya ebi ku adingyii ani kemmo na bítedie ni, bɛsɔ bitesie bitatáƒɛ-nya iye bide-nya bɛkya ɔsa. Kalɔ kammɔ ɔlɛka kakɛ bɔnwuna lɛkwa lɛmmɔ.
Na bitaasia-nwu anumi taanu, si ɔ́sia ɔma ulu lɛlɔ siin úsela Bet-Semes ni, na bɛgyi ka ɔgbankpi ɔmɛni ɔ́si Unwoti kudɔ asa na úbo-bu lɛlɔ. Na si útasia lɛni bɔdi ni, na bɛgyi ka ɔgbankpi keeke kani nátuaku-bu.”