4 “Aabu anii ƒula bɔdia bɔvili ɔsu na Katɔti ɔɔní-ɔ kɔtu na lɛbibo lɛmɛni udu lɛɛsiáku-ɔ?
Anwuɔsu na líye Katɔti si ami ɔmɛni udu na ɔlɛka uti anumi ɔlɛ na ɔtɛku-mi litemi kpakplaa lɛmɛni.
Na uudie taatina Katɔti ka ńtabla lɛla lɛdi aani kalɛ na ukyuli uuvele teete nwuna ɔkpana.
Nsu ni, mɔɔsu-mii nnii ɔlɛka bɛyia kewii kani na Unwoti ɔdubuti ɔda uboku ubani bekyuli kɔtu. Na mmɔ na bɛdubɔti ka litemi bɔtɛ geen bɔkya.”
Na ina likpidi lɛdi lɛɛɛma-a lɛlɔ munu munu muedi ni, bi na aabu anii ɔmmɔ ɔdubɔbla Katɔti?
Anwuɔsu na Katɔti ulése limeyi ulete bekyuli ka beténye litemi katɛkɔ na kesii kadi.
Unwoti, ɛpu ɔni na ásia ubili iye liƒu kebweyi kani na ébo lɛkpu ése na ndi ɔsu na ábala-mi ƒui lɛni yoo?
Si banii nkpoku-nwu ku ɔyikun ni, ubo ɔyikun utulo-mi ƒui. Na si litemi bɔtɛ na bɔdi ni, ɔma ndubɔlɔ-nwu katɛ?
“Unwoti ɔɔɔdi ukyuli mina kalɛ na busie litemi katɛkɔ na ami ku-nwu butáni lɛla lɛdi bunene.
Na tatɛku ami ƒula kabla ɔblane litemi. Ɔsika ukyuli ɔyawine biala na uli ngba na kalɔ kamɛni lɛlɔ uuuse siin na ƒula anumi.
Aaní-bu kɔtu kpakplaa na bula ekpidi ɔsu. Na ala ani na bɔɔsia anu geen eebie aani kalɛ na kubweyi kuubile bula akɛla ani na áƒɔ kuye. Na sɔsɔ ukyuli use kpɛtɛ kpɛtɛ aani ɔƒɛƒɛɛ ɔni mɔɔlɛ́ ukyuli enwu kemmo.
Katɔti ɔni na bula nana Yakob ɔ́kpa, uwi ɔni na ákwanyiku-ma ni, bekpone bammɔ ku bana bapɔnkɔ ku kɛɛkɛ ƒui bébuli na bágyini batɛ kpoo.
Bekisine bámɛnɛ kugyii kɔmɛni béwi kalɔ na bátu ogya bákya-ku. Nsu buuvele-ɔ bɔnii kwanyiku-ma na ƒula kɔnyi kemmo na bayii udu.
Katɔti ɔdubɔtɛku-bu litemi na lɛla biala na ukyuli ɔ́bla lɛlɔ ina bɔbɛ na ábɛ ábla-nya na adi likpidi iye lɛbuni.
“Bekyuli bani na mɔɔyɔ́ ni, ama na mɔɔdɔnku na mɔɔní-ma kɔtu. Anwuɔsu bɛsia lɛlɔ anu kpakplaa na binwini kama bɛkya bina ekpidi.