Eƒesoƒuɔ 2:11 - Katɔti Ɔku Kedee

¹¹ Binyimo ka uwi ɔdi návi ni, báwɔ-mii aani bekyuli bani naaagyi Katɔti. Na Yudaƒuɔ bani nékulo lego ni, baalɔ-mii banii kadi kani bekyuli nétekulo ago. Nsu geen ni, bani nábla ɔlɔna bukulo ɔdi ɔmɛni ni, ɔlɔna lɛlɔ kabla kani na ɔdi. Na uuubo kɔsia kɔdi na kɔyu kemmo na Katɔti anumi.

Eƒesoƒuɔ 2:11 ပူးပေါင်းရင်းမြစ်များ

Esekiel 20:43

Mmɔ na bɛdubo bina alaekpidi ku kalala kani na bɛ́bla bunyimo na bina lɛlɔ lɛdubo-mii lɛlɔ buse na kɔbɔ ala ani na bɛ́bla na aladia bɔnu munu munu ɔsu. Na ɔmmɔ ɔsu na bítamanku ka lɛƒɔ-mii,

Esekiel 36:31

Bɛdubo bina ngba bukpidi bɔni na bílie bíbavi bunyimo na kɔƒa kukpo-mii geen na ala ani na bɛ́bla lɛlɔ.

Mateo 20:7

“Bédie kenye banii, ‘Ukyuli ɔdi útete-bu kabla kadi ɔnii bɔbla.’ “Anwuɔsu ɔ́su-ma ɔnini, ‘Amu biteesie mina kemo.’

Romaƒuɔ 11:17

Na si kɔgba kɔdi kɔ́ƒɛ kɔ́lɛ kugyii kɔmmɔ lɛlɔ na békulo-mii aani lɛku kemmo kugyii kagba blii kadi bébenyimi báda kesii kani na kugyii kɔmmɔ ntu bɔɔyu na ɔ́kun ɔ́da ni, bɛɛní ntu taasiku kugyii kɔmmɔ ligyiitu kudɔ.

Romaƒuɔ 2:26

Na si ukyuli ɔni naaadi Yudani na útekulo lego ɔɔdi ɔda bubo bɔmɛni lɛlɔ ni, Katɔti ɔɔnu-nwu aani ukyuli ɔni nékulo lego.

Romaƒuɔ 2:27

Ukyuli ɔni mɔɔdi ɔda bubo bɔmmɔ lɛlɔ nsu útekulo lego ni, ɔdubɔdu-mii kɔtɔ ina ka amii na béte ɔda bubo bɔmmɔ na bíkulo ago lɛnɔ nsu biládi-mu lɛlɔ.

Korintoƒuɔ 1 12:2

Bɛgyi nwaa ka uwi ɔni na bɛɛɛgyi tɔ Katɔti ni, bɛ́ya na ala ani neeebo ngba átaadi-mii lɛlɔ na bitaakpa-nya na bɛ́yii ulu ɔmmɔ.

Korintoƒuɔ 1 6:11

Lɛni na nka amii badi bíse. Nsu Blɔti ɔ́ƒɔ-mii ekpidi údie-mii lɛlɔ kemmo na ɔ́bla-mii kedee úte Katɔti. Na amii ku Katɔti ntɛ bɔ́sɔ bɔ́dia ɔkɛ Blɔti Yesu Kristo ku Katɔti Kɔyu ɔsu.

Galatiƒuɔ 2:15

“Abu bani na báwɔ-bu na bɔdi Yudaƒuɔ ni, buuuse aani bekyuli bani naaadi Yudaƒuɔ na bɔɔlɔ-ma ala ekpidi bablane.

Galatiƒuɔ 6:12

Bani nnye-mii lɛlɔ na baayɔ́ ka bikulo ago mmɔ ni, ama ndi bekyuli bani mɔɔkun lɛmɛnɛ na ɔlɔna lɛlɔ. Baabla ɔmɛni kalɛ na bekyuli belékpoku-ma na Kristo kukpi na ugyii lɛlɔ litemi ɔsu.

Eƒesoƒuɔ 2:2

Na bɛ́siaku kayawi ala ekpidi kama ku ukisine ɔni mɔɔdi ayu ekpidi ƒui lɛlɔ na kayaa, na anwu kani mɔɔdi batuɔkplune ƒui lɛlɔ ɔƒɛni.

Eƒesoƒuɔ 5:8

Ɔsika kudeedi ni, na bɛkya lɛdisa kemmo. Nsu ɔƒɛni ka bínwini Blɔti badi ɔsu ni, bɛkya bukeye kemmo. Anwuɔsu bilie ngba aani bekyuli bani nlie bukeye kemmo.

Lɛkpa Ulu 15:15

Na binyimo ka amii lɛnɔ bɛ́ɛbla bekyuli kabla na Egyipte kalɔ lɛlɔ dii. Nsu bina Unwoti Katɔti úbada-mii údie lɛbibo lɛmmɔ kemmo na bɛ́kɛ bɔnwuna. Anwuɔsu na uubó-mii ɔda ɔmɛni.

Lɛkpa Ulu 16:12

Na bɛnu ka bɛ́di ɔda bubo bɔmɛni lɛlɔ. Na bitayiƒala ka Egyipteƒuɔ bénye-mii lɛlɔ na bítaabla-ma kabla dii.

Lɛkpa Ulu 5:15

Na ɔlɛka binyimo ka uwi ɔni návi kemmo ni, bɛdi bekyuli bani na bénye-mii lɛlɔ ka bitaabla kabla teete-ma. Na ami ɔni ndi bina Unwoti Katɔti néti mina ɔyikun bonwu ku ɔlɔkplu kpakplaa na lídie-mii lɛ́lɛku mmɔ. Ɔmɛni ɔsu na muubó-mii ɔda ka bitabla kabla kadi lɛnwunameyi lɛlɔ.

Lɛkpa Ulu 8:2

Na bitayiƒala kalɛ na bina Unwoti Katɔti ɔ́tɔnku-mii na kalɔ kakwiidi kamɛni kemmo akwa aavlene. Ɔ́bla ɔmɛni ɔnii ɔɔnu si bɛdubɔti ka anwu nda-mii. Na ɔkɔku-mii ɔnu si bina kasusu kadubɔsia-nwu lɛlɔ na bɛdi nwuna ɔda bubo lɛlɔ.

Lɛkpa Ulu 9:7

Bitayiƒala kalɛ na bɛ́ya na Unwoti úti kɔnyi ɔ́kya-mii na kalɔ kakwiidi kemmo. Úti ɔ́si limeyi lɛni lɛlɔ na bɛ́ta Egyipte kalɔ úti úbedu limeyi lɛni bíbeduo mɛni ni, lɛni kani na bɛkya bɛɛta teenye Unwoti lɛlɔ.

Ƒilipiƒuɔ 3:3

Abu ndi bekyuli bani mmomu nékulo ago, ɔsika buumwi Katɔti ɔkɛnku nwuna Kɔyu lɛlɔ na bɔɔkɛ́ ebiti ka abu ku Kristo Yesu bɔ́bla unwi ɔsu. Na búteti lɛlɔ bútasia ɔlɔna lɛlɔ ɔdi ala bɔbla lɛlɔ.

Koloseƒuɔ 1:21

Na uwi ɔdi nábavi kemmo ni, bínwini kama bɛ́kya Katɔti na bíkisi-nwu na bina kasusu kemmo ɔ́si ala ekpidi ku kasusu kekpidi kani na bɛ́bla ɔsu.

Koloseƒuɔ 2:11

Ka bɛ́blaku Kristo unwi ɔsu ni, Katɔti úti nwuna Kɔyu úse-mii likpo ka bɛdi nwuna badi. Nsu ɔɔɔdi aani kalɛ na Yudaƒuɔ baabla ago bukulo ɔdi kalɛ. Mmomu Kristo ɔlati nábla-mii ɔmɛni úti úkulo ekpidi udu údie-bu lɛlɔ.

Koloseƒuɔ 2:13

Uwi ɔdi kemmo ni, bíkpi na kɔyu kemmo ɔ́si bina ekpidi ɔsu ku ka bátabla-mii ekpidi bukulo teedie ɔdi ɔmmɔ ɔsu. Nsu Katɔti ɔ́ya na bɔ́sɔ búnwini búbo bulie ngba ku Kristo ka úti bula ekpidi ƒui ɔ́kyiɛ-bu ɔsu.

Koloseƒuɔ 3:11

Ɔmɛni ɔsu kavumana kadi keeebo bani ndi Yudaƒuɔ ku bani naaadi Yudaƒuɔ ntɛ, iye bani muukúlo ago ku bani neeekulo ntɛ. Lɛni kani na kavumana kadi keeebo bani ndi baƒɔ ku bani nási Sitia ku bekyuli bani mɔɔbla bekyuli bamba kabla ku bani mɔɔbla ama alati kabla ntɛ. Mmomu Kristo ndi-bu lɛla biala, na ulie ɔdi biala lɛlɔ kemmo.

Samuel 1 17:26

Ka Dawid úbo úbasiaku lɛla lɛmɛni ni, úye ukpone ɔni nnye nwuna kɔmadɔ ɔnini, “Bi na badubo bɔbla bute ukyuli ɔni makana Ƒilistini ɔmɛni bɔdu na ɔda bula kadi Israelƒuɔ kɔƒa bɔkya ɔya? Ɔma na Ƒilistini ɔni na útekulo lego mɛni ɔɔkali ka ɔdi na ubataakun lɛmɛnɛ taakya Katɔti ɔni nli ngba uwi ƒui bekpone lɛni?”

Samuel 1 17:36

Ami ƒula kabla ɔblane lɛ́ɛdu gyata ku kegidi. Na ndubɔkana na lɛdu Ƒilistini ɔni nétekulo lego mɛni lɛnɔ aani bana kalɛ, ɔsika ɔ́nu Katɔti ɔni nli ngba bekpone ka baaadi lɛla lɛdi na nwuna anumi!