Daniel 12:1 - Katɔti Ɔku Kedee

¹ “Uwi ɔmmɔ kemmo ni, ƒula kadi bekyuli ɔgyumanane unengu ƒui, Mikael ɔni na Katɔti ɔdubɔtala ni, ɔdubɔta ubo. Na lɛbibo kpakplaa lɛni udu nétebo tɔ kudii ɔ́si kalɔ kesekɔ lɛdubɔlɛ. Na ukyuli biala ɔni na nwuna lɛnyi lɛkya ngba ɔku kemmo ni, ɔdubo-nwu bɔgyumana.

Daniel 12:1 ပူးပေါင်းရင်းမြစ်များ

Kɔgya 56:8

Agyi abi ani udu na muubó. Na agyi mina mmii kalɛ na bumomo.

Kɔgya 69:28

Nine bana anyi die ƒula ngba ɔku kemmo. Na taƒɔ-ma takya ƒula bekyuli babuni akɔ.

Yesaia 4:3

Na bani ƒui nébu na Sion na bése-ma likpo na Yerusalem mmɔ ka belie ngba ni, badubɔlɔ-ma bekyuli kedee.

Yesaia 9:7

Na nwuna lɛga kadikɔ kadubo katɔ butaakɔ ku keyi buɛɛ, na kaaadubo ulu bɔwɔ kudii. Na ɔdubulie Dawid lɛgaboku lɛlɔ utaadi lɛga lɛmmɔ, na nwuna lɛgadi lɛdubunye uwi ƒui. Na ɔdubɔtɛ litemi ulu lɛlɔ, na nwuna ablala ƒui adubuse siin. Na Katɔti ɔdubɔya na ɔmɛni ubo-nwu kemmo ɔkɛnku nwuna ɔyikun lɛlɔ!

Yeremia 30:10

“Amii, mina bekyuli bani nkya katɔ ku kada ƒui, bɛsɔ bitayia. Ami ɔdi na bɛdi bɛ́manku ka lɛni-mii kɔtu, anwuɔsu na lígyingya-mii lɛ́kya kadi bamba bekyuli akɔ na ɔlɔgyu kakaaka. Nsu nsiaku-mii na ndubɔyila kadi bamba bakyuli bammɔ udu.

Yeremia 30:7

Mina kadi bekyuli, blii kani nébu na bɛdubo abi bubo geen butulo ala ani náalɛku-mii ábavi. Nsu ndubo-mii budie ƒui.

Esekiel 13:9

Ndubɔta linye-ma lɛlɔ na nsɔ lɛɛɛdubo bɔya na babla mina bekyuli lɛnɔ. Na basɔ baaadubo lɛnyi bɔdi muedi banii Israelƒuɔ lɛnɔ iye bakya kalɔ kammɔ lɛlɔ muedi. Na badubɔnu bati ka ami ndi Unwoti Katɔti.

Esekiel 34:24

Anwu ndubɔbla bina ɔtɔnkune na ami lɛbla bina Katɔti. Ami Unwoti násu.

Esekiel 5:9

na bina alaekpidi ɔsu. Na bina kɔtu bɔni bɔmmɔ bɔdubo ɔkplu bɔyu geen na butulo lɛla biala na lɛ́ɛbla ḿbavi iye lɛni na nsɔ mabla lɛnɔ uwi ɔni mebo ƒui kemmo na uladia bɔnu.

Daniel 10:13

Nsu Persia kadi ɔtu úkpoku-mi emeyi aavlanyɔ-unwi. Na ɔmmɔ kama Mikael, batu bayikune bammɔ akɔ unegudi, úbo na úbedie-mi na Persiaƒuɔ baga enu kemmo.

Daniel 10:21

Nsu kudeedi ni, ndubo-ɔ bɔsu lɛla lɛni na bénweni bákya Litemi Geen Ɔku ɔmmɔ kemmo. Na litemi lɛmmɔ lɛɛtina ka ukyuli ɔdi uuubo na unye-mi kama si ɔɔɔdi Mikael ɔni ndi Israel kadi ɔtu kani.”

Daniel 11:45

Na ɔmmɔ kama ni, ɔdubɔbla keliekɔ na Ɛpu Ubendi ku Sion Kɔbi ntɛ. Nsu kawɔlɔkɔ ni, badubo-nwu udu bɔyila na ukyuli biala ulakana-nwu bɔƒɔ.”

Daniel 7:10

Na ogya uudie linyemi ɔdubo aani ketu bɔgba taasi nwuna lɛƒɛnyi ƒui lɛlɔ taaka taamana-nwu. Na bekyuli bani na balakana-ma bumomo bɔka benye bámana-nwu baabla-nwu kabla. Na mpim leevu leevu benye-nwu anumi. Litemi bɔtɛ uwi údu. Na bébimi lɛku lɛni kemmo na bénweni bekyuli lɛlɔ ala bákya béwi.

Daniel 9:12

Álɛ abu ku bula batɔnkune ése kpakplaa ka ɔgbankpi ɔni udu nétebo tɔ kudii ɔdubo Yerusalem bɔlɛku. Na lɛla lɛni bɔlɛ na álɛ-bu ese kpakplaa mmɔ geen, na áya na lɛɛlɛ́ku-bu ɔƒaani.

Yoel 2:2

Na limeyi lɛmmɔ lɛdubo bɔbla suu, na liƒlukutu suu lɛdi lɛƒɔ kayaa ku abi lɛlɔ. Na bekpone lisu bonwu lɛdi lɛdubɔda lɛlɛ bani udu nétedie tɔ lɛlɔ kudii na badi lɛnɔ basɔ belebo kudii.

Malakai 3:16

Bekyuli bani ƒui mɔɔsiaku Unwoti ulu siin lɛlɔ bése kalɔ baatɛmi taasiku litemi lɛmɛni lɛlɔ. Na ka Unwoti ɔ́nu lɛla lɛni mɔɔlɛ́ ni, ɔ́ya na bénweni-ma anyi bákya nwuna ɔku kemmo.

Mateo 24:21

Ɔ́si kayawi kalɔ kesekɔ ni, lɛbibo libendi lɛmɛni udu lítebo tɔ kudii. Na nina udu ɔdi lɛnɔ ɔsɔ ulebo kudii.

Marko 13:19

Ɔsika lɛbibo lɛni ndubo uwi ɔmmɔ kemmo ni, lɛdubo bubomo butulo lɛdi biala lɛni udu na kayawi kamɛni káanu dii ɔ́si kana kalɔ kesekɔ úti úbedu ɔmwi limeyi. Na lɛbibo lɛmɛni udu lɛdi lɛsɔ lilebo lɛnɔ kudii.

Luka 10:20

Nsu ni, lɛlɔ litayɔ-mii ka ayu ekpidi eenú-mii litemi ɔsu. Mmomu ebiti ada-mii ka Katɔti únweni-mii anyi ɔ́kya Katɔ Ɔga Ɔma.”

Romaƒuɔ 11:15

Ɔsika uwi ɔni na Katɔti údie-ma atu ni, Katɔti ɔ́sɔku anwu ku kayawi bekyuli ntɛ ɔ́klibi. Anwuɔsu bi na ndubo bɔlɛ si uwi ɔni na Katɔti ɔ́sɔ ɔ́ƒɔ-ma? Ɔdubuse aani kalɛ na ukpine ɔɔsɔ taata teebelie ngba.

Romaƒuɔ 11:26

Na ulu ɔmɛni lɛlɔ na Yudaƒuɔ ƒui badubɔkɛ bɔƒɔ aani kalɛ na Katɔti ɔ́su na Bunweni Kedee Ɔku kemmo ɔnini, “Ɔƒɔne ɔdubɔsi Sion na ɔdubo ubedie likyulikpi na Yakob kaba kemmo.

Eƒesoƒuɔ 1:21

Mmɔ na Kristo ulie ɔɔdi bayikune ku kenyekɔ biala ku kɔyu ɔyikun ku bagadine ƒui lɛlɔ. Na nwuna lɛnyi litulo lɛga bɔdi ɔyikun lɛnyi biala na kayawi kamɛni ku kani mebo lɛnɔ ƒui kemmo.

Ƒilipiƒuɔ 4:3

Na amii lɛnɔ aani mina kabla bablane bakpana ni, mɔɔyɔ́ ka bibunku beleku bamɛni. Ɔsika báblaku-mi kabla na bɔ́kana na búgyingya litemi buni lɛmmɔ. Bɔ́bla ala amɛni ku Klement lɛnɔ ku banwa kabla bablane bakladi bani anyi na bénweni bakya Katɔti Ngba Ɔku kemmo.

Yuda 1:9

Na Katɔti ɔtu unengudi ɔni ndi Mikael muedi ka kadɔ kéduo anwu ku Satan ntɛ na baakya unyeƒi na Mose ɔlɔna lɛlɔ ni, úteti anwu ɔlati kenyekɔ ɔyikun útabɔku Satan. Mmomu ɔ́su ɔnini, “Blɔti ɔbɔku-ɔ!”

Budie Taatina 1:5

Na Yesu Kristo ndi anwu ɔni muudie lɛla lɛdi biala kenye ulu lɛlɔ. Ɔdi ukyuli udeedi ɔni na Katɔti ɔ́gyila ɔ́lɛku bekpine akɔ na ɔsɔ ulekpi kudii. Yesu ɔmɛni mɔɔdi kayawi baga ƒui lɛlɔ. Na ɔɔyɔ́-bu. Na úti nwuna ubugya ɔ́kpa na bula lili, na ɔ́ƒɔ-bu ɔ́lɛku bula ekpidi kemmo.

Budie Taatina 12:7

Amu na kekpo kálɛ na katɔ. Na Katɔti ɔtu unengudi ɔni ndi Mikael ɔ́tɔnku Katɔti batu bakladi na báta, na ama ku liƒu kɔlakpi kɔmmɔ ku kuna batu lɛnɔ békpo.

Budie Taatina 13:8

Na bekyuli bani ƒui nlie kalɔ lɛlɔ badubɔlɛ akɔnkɔ bete-nwu, ntu bekyuli bani anyi na bénweni bákya ngba ɔku kemmo bése asa na Katɔti údie kayawi. Ngba ɔku ɔmmɔ ɔdi Koƒonu Ubi ɔni na béti bákpa ɔdi.

Budie Taatina 17:14

Na badubɔta na bekpoku Koƒonu Ubi ɔmmɔ. Nsu Koƒonu Ubi ɔmmɔ ku nwuna bekyuli baƒunadi ku nwuna baƒɔtaadine geen badubo-ma lɛlɔ bɔdi. Ɔsika anwu ndi Blɔti ɔni ndi Bati Ƒui Ɔti ku Baga Ƒui Ɔga.”

Budie Taatina 20:12

Na lɛ́nu ka bekpine ƒui benye lɛgaboku lɛmɛni anumi, banamu ku benengu, na bébimi lɛku lɛdi béwi. Na básɔ bébimi ɔku ɔbambadi ɔni ndi ngba ɔku lɛnɔ béwi. Na lɛku lɛmɛni kemmo na baanu taatɛku bekpine ƒui litemi ɔkɛnku ala ani na bábla na bénweni bákya lɛku lɛmmɔ kemmo lɛlɔ.

Budie Taatina 20:15

Na ukyuli ɔni na bétenweni-nwu lɛnyi bátakya ngba ɔku ɔmɛni kemmo ni, béti-nwu bébo bákya lɛgyavonku lɛmmɔ kemmo.

Budie Taatina 3:5

Ukyuli ɔni madi ekpidi lɛlɔ ni, ɔdubɔda ala aƒualadi aani bana kalɛ. Na lɛɛɛdubo-ma anyi bɔda budie ngba ɔku kemmo. Na ndubudie-ma kenye na mina Ɔti ku Katɔti batu ƒui anumi ka badi ami badi.

Budie Taatina 7:14

Amu na lɛ́su-nwu nnini, “Ati, lɛɛɛgyi-ma. Awɔ ngyi bekyuli bamɛni.” Amu na ɔ́su-mi ɔnini, “Bekyuli bamɛni ndi bani nénye lɛbibo bonwu lɛmmɔ kenye, na bálɛ-nwu kemmo. Bábla sɛɛn na Koƒonu Ubi ɔmmɔ ubugya ɔsu, aani kalɛ na baaƒɔ lɛwu na lɛɛƒuala.