Daniel 11:36 - Katɔti Ɔku Kedee

³⁶ “Ɔga ɔmmɔ ni, lɛla lɛni mɔɔyɔ́-nwu kaƒɔ na ɔdubo butaabla. Na ɔdubo lɛlɔ katɔ bɔtalaku na ɔtina ka ubo kenyekɔ utulo baƒiɔ ƒui. Na ɔdubo Katɔti ɔlati buteedumi. Na geen ni, lɛla biala lɛdubo bɔsia kalɛ na ɔɔwia wetédu uwi ɔni na kɔnyi kɔni na Katɔti úti ɔ́kya anwu ɔlati ku nwuna bekyuli kɔ́yɔ-nwu.

Daniel 11:36 ပူးပေါင်းရင်းမြစ်များ

Kɔgya 136:2

Bɛgya benwoti ƒui Unwoti enu. Ɔsika ɔɔyɔ́-bu uwi ndi uwi.

Kɔgya 33:10

Unwoti úbile kadi bekyuli kasusu ku kɔkwɛ biala na baakya kemmo. Na ɔɔyá na kulalɛ ɔbuni.

Agba 19:21

Adubɔkana na eti kasusu kɔkwɛ pii, nsu Unwoti lɛƒɔyɔ kani ndubo bunye.

Yesaia 10:23

Na Unwoti ɔni ndi Ɔyikune Ƒui ɔdubo kalɔ kammɔ ƒui kɔtu kɔmɛni bɔni sɔsɔ.

Yesaia 10:25

Bana bukpoku bɔmmɔ buletu uwi. Na uwi klukwii kemmo ni, kɔnyi kɔni na líti lɛ́kya-mii kɔdubo-mi bɔyɔ na bana lɛlɔ mmomu na kɔnyi kɔdubo-mi bɔkɔ kalɛ na lɛkyula-ma.”

Yesaia 10:5

“Bɔbuɛ beete Asiria, mina ugyii ɔni nda ku kɔnyi. Bana enu kemmo na mina kɔnyi ligyiiku lɛkya!

Yesaia 14:13

Awɔ mɔɔsu na ƒula kayi kemmo anii, “Ndubɔkɔ lisie katɔ katɔ ntése mina liboku na mmɔ na keliekɔ kammɔ kebo kavi Katɔti ayabi, na ndubulie kɔbi kedee kɔmmɔ lɛlɔ katɔ ƒui, ntaadi katɔ bayikune bani ƒui mɔɔsála mmɔ lɛlɔ.

Yesaia 14:14

Na ndubɔkɔ lisie katɔ katɔ ƒui, na ami ku Unwoti Ɔyikune Ƒui bɔdubɔbla likeke.”

Yesaia 26:20

Mina bekyuli, bɛgyu lɛgba na bitákalɛ lɛlɔ bɛkya lɛtɔ wetédu ka Unwoti kɔnyi kɔni ala na ɔdubo bina bekisine bɔbla kɔ́vi.

Yesaia 30:33

Na ɔ́si kukuuku ni, Katɔti ɔ́ɔklibi kesii kadi úse úte Asiriaƒuɔ baƒiɔ bani na baatu lili aani ɔga ɔni ndubo bukpi. Na ogya ɔmɛni kasalakɔ kadi ubu voo ɔni na nwuna kemmo kábɛbɛ na bátɛ ekyweni bése béte-nwu. Na ogya agyabi ku ɔnyi ɔni na Katɔti ɔdubɔnwuna ɔlɛku nwuna lɛlɔ kemmo na ɔdubuti ɔtu ɔkya ekyweni ammɔ.

Yesaia 46:10

Lɛla biala kalɔ kesekɔ ƒui na lɛ́su líse ala ani ndubo abálɛ asa na aalɛ́ ɔmwi na bɛɛnu. Na ɔɔtina ka lɛ́di mina litemi lɛlɔ.

Yesaia 57:9

Bɛɛkpí taawɛɛ ligyulo ƒɛƒɛɛ lidu lidu na biisié taatákpa Molek baƒiɔ. Na bɛɛtala batu na ɔlɔgyu na beesié taatálɔ ku bekpine ayu muedi teeye ala teenu.

Esekiel 28:2

“Esekiel, ɔyawine ubi, su Tiro ɔga anini, ‘Aatalaku lɛlɔ katɔ taavili na aawia ka bekyuli banu-ɔ aani kayaa ɔyikune ɔdi na adi na Tiro ɔma unengudi ɔmmɔ ɔdi ƒula lɛga kadikɔ, nsu ukyuli keeke kani na adi.

Esekiel 35:13

Na bidumi ami ɔlati muedi na línu ɔnaƒui kede kede.

Daniel 11:16

“Na ɔga ɔni nékpo ɔ́si katɔ kakɛ mmɔ ɔdubɔbla kalɛ biala mɔɔyɔ́-nwu kaƒɔ na ɔdubo kalɔ kedee kammɔ muedi buƒie bɔƒɔ na ubile-ka.

Daniel 11:3

Na ɔga ɔyikune ɔdi ɔdubo ubelie liboku lɛlɔ, na mmɔ na anwu utaabla lɛla lɛni mɔɔyɔ́ ɔga ɔlakɛne ɔmɛni kaƒɔ.

Daniel 11:37

Na ɔga ɔmɛni ɔdubo baƒiɔ bani na nwuna bati kuuku bákpa ku baƒiɔ bani na beleku bammɔ baayɔ́ teetulo ƒui buni. Na geen ni, ɔdubuti lɛlɔ unyene kesii kani na kákuku ketulo baƒiɔ bamɛni ƒui kadi ka utulo bana ɔdi biala.

Daniel 12:7

Amu na Katɔti ɔtu ɔmmɔ ɔ́kɔliku nwuna enu anyɔ katɔ na ɔ́su ɔnini, “Na Katɔti ɔni nli ngba uwi ƒui lɛnyi kemmo ni, muusé kenye kpakplaa ka lɛkwa linwi ku akwa anyɔ ku kakɛ. Na lɛla biala lɛdububo kawɔlɔkɔ uwi ɔni na Katɔti bekyuli lɛbibo lɛmmɔ lɛdubɔsa.”

Daniel 2:47

Na ɔga ɔmmɔ ɔ́su ɔnini, “Ɔƒɛni na lɛ́ti ka ƒula Katɔti utulo baƒiɔ bayikune bani ƒui nkya. Ɔsika anwu néte-ɔ ɔyikun na édie abɛla amɛni kalɔ.”

Daniel 4:35

Kalɔ lɛlɔ kadi bekyuli ƒui baaadi lɛla lɛdi na nwuna anumi. Lɛla lɛni mɔɔyɔ́-nwu kaƒɔ na ɔɔbla Ɔɔdi ayabi ku kayaa kammɔ ƒui lɛlɔ. Na ɔɔdi ukyuli biala lɛlɔ na kalɔ lɛlɔ. Na si Katɔti ɔ́bla lɛla lɛdi ni, bulakana-nwu bɔbala iye buye bɔnii, “Bi ndi lɛla lɛni na ábla mɛni?”

Daniel 5:19

Ala enengudi ammɔ udu na Katɔti ɔ́bla úte-nwu na ɔ́bla kayawi adi lidu batɛmine ƒui dɛye dɛye, na lɛlɔ lɛ́tɔ-ma ku bɔyia geen. Ƒ'ɔti ɔ́kɛ ɔyikun geen na ukyuli biala lɛlɔ ɔni na ɔkana na ɔya na elie ngba iye ɔya na badu-ɔ muedi, na ɔkana na ɔkɔliku-ɔ katɔ iye ɔyila-a udu kalɛ biala na ɔ́su na ɔdi-nwu lɛƒɔyɔ.

Daniel 5:20

Nsu ka úbo ɔɔbla atuɔkplu na ɔɔtalaku lɛlɔ katɔ na ɔsɔ ulabu Katɔti ni, úkpeli nwuna lɛgadi lɛmmɔ ɔ́lɛku-nwu lɛkɔkɔ.

Daniel 7:8

Uwi ɔni na nnye mɔɔbla kasusu taasiku ese amɛni lɛlɔ kani na lise blii lɛdi lɛ́kɔ lɛ́lɛ. Na kɔnakunwi ni, ese atɛ ágyu álɛ ana kunyekɔ na éte libliidi lɛmɛni kuƒi. Na bekyuli anumi alɛ lise blii lɛmɛni lɛlɔ ku kenye kani muutemi ku lɛmɛnɛ bɔkun pii geen.

Daniel 8:19

Na ɔ́su ɔnini, “Se kɔtu na enu, na ndubɔsu-ɔ lɛla lɛni ndubo libalɛ na kayawi kawɔlɔkɔ kani na Katɔti ɔ́ƒuna úse ka udie nwuna kɔnyi keyi.

Daniel 8:4

Koƒonu kɔmɛni kɔ́sɔku usi kɔ́kya, na kusie ɔƒɛ kanukɔ, na kusie kada kakɛ, na kusie katɔ kakɛ lɛnɔ. Na ebuo ɔyikune bamba ɔdi uuubo na unye ɔsiaku-nwu. Na lɛla lɛdi lɛnɔ liiibo na ɔƒɔ ute bebuo bamɛni. Anwuɔsu kútuku lɛlɔ laa kalɛ na kɔɔyɔ́ na ɔyikun kani na kɔ́sɔ kɔ́kɛ kúbu.

Sakaria 11:16

Na nsɔ ndubo bɔya na ukyuli keeke ɔni naaadaku unwini baƒonu bammɔ ɔdane. Ukyuli ɔni naaadubo bɔdaku baƒonu bani mɔɔyii ulu ulakpete bani muuƒi na ɔbwi-ma iye ute-ma adila muedi na badi. Mmomu anwu ɔlati ɔdubɔkun baƒonu bani nélie lɛmwi mmɔ ƒui, na kebu ekubi ekubi.

Yohane 5:30

“Lɛɛɛdubo lɛla lɛdi bɔkana bɔbla na ami ɔlati ɔyikun kemmo. Mmomu ndubɔtɛku bekyuli litemi aani kalɛ na mina Ɔti ɔ́su-mi. Anwuɔsu mina litemi bɔtɛ buse siin, ɔsika naaabla mina lɛƒɔyɔ. Mmomu Katɔti ɔni nátala-mi ni, nwuna lɛƒɔyɔ na mɔɔbla.

Yohane 6:38

Ɔsika ńtasi katɔ ńtebo nnii mɔɔbla ami ɔlati lɛƒɔyɔ. Mmomu líbo nnii mbabla anwu ɔni nátala-mi lɛƒɔyɔ.

Batalane Kabla 4:28

Nsu, awɔ, na ƒula ɔyikun ku lɛnunda kemmo ni, énye ánu na básala bábla ala ani na ásu ése.

Lɛkpa Ulu 10:17

Ɔsika bina Unwoti Katɔti ubo ɔyikun utulo ɔyikun biala na ɔlɛka buti ɔbu bute-nwu geen. Na ɔdi Unwoti ɔni na ulánu anumi taabla lɛla lɛdi na ulabɛ taaƒɔ lɛla lɛdi ukyuli kudɔ.

Tesalonikaƒuɔ 2 2:3

Bitaya na ukyuli ɔdi ɔtɔlɔ-mii na ulu biala lɛlɔ. Ɔsika Blɔti limeyi lɛmmɔ lilebo tɔ utédu uwi ɔni na bekyuli pii badubuni Katɔti asa na ukyuli ukpidi ɔmmɔ ɔni na Katɔti údie úse ka ɔkyula ɔda ɔlɛ.

Tesalonikaƒuɔ 2 2:4

Na ɔdubɔta unye utile kɔyu ɔyikun biala ulu na ɔtina ka anwu lɛti ndi ayu ƒui utulone. Na ɔdubo bɔta muedi butélie Katɔti kakpakɔ na ɔbla lɛlɔ aani anwu ndi Katɔti ɔmmɔ.

Tesalonikaƒuɔ 2 2:8

Na ɔmɛni kama ni, Katɔti ɔdubudie ukyuli ukpidi ɔmmɔ keyi ɔtina. Na si uwi ɔni na Blɔti Yesu Kristo úbo ni, ɔdubuti nwuna kenye ɔƒɛƒɛɛ ku bukeye ɔkyula-nwu na ɔyila-nwu udu ƒui.

Yosua 22:22

“Unwoti Katɔti ndi Katɔti Ɔyikune Ƒui. Na anwu ndi Unwoti, na ɔgyi lɛla lɛni ɔsu na bɔ́bla lɛla lɛmɛni. Na abu lɛnɔ bɔɔyɔ́ ka amii lɛnɔ bɛti lɛla lɛni ɔsu na bɔ́tu lɛkpabi lɛmɛni. Na si bɔtu na bɔ́tu-nwu ka buuti bɔta bunye Unwoti lɛlɔ iye ka bɔɔlɛ́-nwu kama ni, bibo kuƒi ka bɛdu-bu.

Budie Taatina 10:7

Kabla kabɛdi kani na ɔ́su nwuna kenye bediene bani ndi nwuna kabla bablane ka kadubɔlɛ ni, kadubo kete lɛni si Katɔti ɔtu maatɛdi ɔmmɔ ɔ́vwi nwuna kakpɛɛ.”

Budie Taatina 12:14

Amu na Katɔti úte uleku ɔmmɔ aasɛ bonwu avwi kalɛ na uveyi uteesie nwuna keliekɔ na ketele kemmo. Mmɔ na badubo-nwu bɔgyumana akwa atɛ ku kakɛ ɔsiku kɔlakpi kɔmmɔ kudɔ.

Budie Taatina 13:1

Ɔmɛni kama lɛ́nu eƒiebuo ɔdi ka ɔ́lɛ ɔ́si ɛpu kemmo ɔ́kɔ ɔɔlɛ́. Ubo eli maatɛ na ese leevu alɛ-nwu eli ammɔ lɛlɔ. Na lise biala lɛlɔ ni, kagabwa kebi. Na nwuna lili biala lɛlɔ ni, lɛnyi lɛdi lɛsia lɛni muudumi Katɔti.

Budie Taatina 17:17

Ɔsika Katɔti úti ɔ́kya-ma kayi kemmo kalɛ babla lɛla lɛni na anwu Katɔti ɔɔwia. Na bénu lɛlɔ kalɔ ka beti bana ɔyikun bete eƒiebuo ɔmmɔ na ɔdi lɛga uti utédu ka Katɔti etemila ani na ɔ́su úse ébo-nwu kemmo lɛni.

Budie Taatina 17:3

Ɔtu ɔmmɔ ɔ́kpanku-mi úsienku ketele kemmo na kɔyu kemmo. Mmɔ na lɛ́nu uleku ɔdi ka ulie eƒiebuo ugyiedi lɛlɔ. Na bénweni anyikpi ani muudumi Katɔti ƒui básia eƒiebuo ɔmmɔ lɛlɔ. Na eƒiebuo ɔmmɔ mbo eli maatɛ ku ese leevu.