Na ndubɔya na awɔ ku uleku ɔmɛni binwini bekisine, na ƒula ubi ku uleku ɔmɛni ubi lɛnɔ benwini bekisine. Ɔdubo-ɔ lili bubo bɔbwɛ, na awɔ adu-nwu lɛnikpo.”
Unwoti ɔdubɔƒɔ kayu kabuni bute-nwu na ute-nwu kenyekɔ kenengudi ku ɔyikun na kalɛ na úbo abi útédu ku kukpi kemmo na ɔ́ƒɔ kayu na bekyuli ƒui lili ɔsu. Báka-nwu bákya bekyuli bekpidi akɔ. Ɔsika bekyuli pii ekpidi na ɔ́ƒɔ ɔ́sia lɛlɔ, na úti lɛlɔ ɔ́kpa na bana lili, na ɔ́ƒɔ-ma ngba.
Nsu si ukyuli ɔni mbo ɔkplu utulo-nwu úbo úbekpoku-nwu na ɔ́di-nwu lɛlɔ ni, uuƒie nwuna ekpola ani lɛlɔ ɔ́sia anu taaƒɔ na anwu ku nwuna bakpana beti ukyuli ɔmmɔ akɛla ani na béyu bele.
Ɔmmɔ kama ni, kawɔlɔkɔ kammɔ kadububo. Na Kristo ɔdubɔyila bayikune ku kenyekɔ ku ɔyikun ƒui udu. Na Kristo ɔdubuti lɛga kadikɔ kammɔ ɔkya Katɔti ɔni ndi Ɔti enu kemmo.
Nsu ni, bɔ́gya Katɔti enu! Na bula unwi bɔbla ku Kristo ni, Katɔti ɔɔtɔnku-bu uwi biala na bɔkɛ bekyuli bani muusié taavi na Kristo lɛlɔ bɔdi kemmo. Na Katɔti ɔsia-bu lɛlɔ na udie Kristo ɔtina kayawi ƒui aani kalɛ na ɔnyi ƒɛƒɛɛ ɔɔƒɔ́ likpo lɛdi ƒui.
Na bekyuli bammɔ ni, ukisine ɔmmɔ ɔ́bwɛ ama bani naaaƒɔ taadi anumi. Na uutile-ma kuƒi kalɛ na balanu bukeye bɔmmɔ. Na bukeye bɔmɛni bɔɔsí litemi buni lɛni nkɛnku Kristo bukeye bɔni ndi Katɔti ɔmmɔ ɔlati udu geen kemmo.
Na ɔkɛ nwuna baƒɔtaadine lɛlɔ ni, bayikune ku kenyekɔ biala kani mbo ɔyikun na kayaa batɛya Katɔti lɛnunda bonwu lɛni mɔɔbla kabla na lilu pii lɛlɔ na nwuna baƒɔtaadine akɔ.
Na ɔkɛnku anwu ɔmmɔ lɛlɔ na Katɔti údie ala ani ƒui nkya katɔ ku kalɔ kamɛni kemmo, ala ani na bɔɔnu ku ani na bulánu aani lɛgadi ku bagadine ku bayikune ku kenyekɔ biala ƒui lɛlɔ. Ɔkɛnku ubi ɔmmɔ lɛlɔ na údie ala ƒui, kalɛ na lɛla biala lɛbu Kristo ɔmmɔ.
Na bábɔku liƒu kɔlakpi kɔmmɔ béboku kalɔ. Aku ndi kɔlakpi kɔkukudi bonwu kɔni baalɔ ukisine ɔmmɔ iye Satan, na ɔɔtɔ́lɔ kayawi kemodi ƒui. Bábɔku anwu ku nwuna batu ƒui bábava kalɔ lɛlɔ mɛni.