6 Badɔlɔdi beeebo kadɔ bɔdɔ, na bana kama ku ugyii.
Ɔdɔlɔdi uuubo kɔnyi buti. Nsu ukyuli ɔni náda anu ni, si ina bédumi-nwu muedi ɔɔkɛ́ kayi buɛɛ.
Bekyuli bani mɔɔtalaku lɛlɔ katɔ baakya unyeƒi pii. Na bekyuli bani muunú bɔlɛ baadá anu.
Banundane baatí lɛlɔ kalɛ na beekeli ɔgbankpi. Badɔlɔdi ama baatu lili taakya lɛla biala kemmo ku kayi kekpidi.
Badɔlɔdi enyekpi muunwíni kugyiimi kɔni mɔɔsia-ma kama. Nsu banundane ala ani na baasu ni, eedie-ma na ɔgbankpi kemmo.
Si ése kadɔ kalɔ ni, use aani kalɛ na baalɛmi kuƒi teete ketu kani báda-ka kavinkɔ ulu na kéyi.
Bekyuli bani muuti kɔnyi pla pla ni, badubɔƒɔ ama alati lɛtuni kayu. Si áƒɔ-ma kunwi ni, agyi anii asɔ adubo-ma bɔƒɔ kunyɔdi.
Bekyuli bani muudumi bekyuli taama ni, Unwoti ɔdubo-ma kɔtu bɔni. Na badɔlɔdi kama kadubo kugyiimi butaaƒɔ.
Ukyuli ɔni mɔɔda kekpo ni, ɔbu likpose lɛdi nsia-nwu lɛlɔ. Badɔlɔdi kani mɔɔkya ka ogya.
Bɛbɔku bekyuli bani muudumi bekyuli taama bɛlɛku bina akɔ, na kekpo ku kadɔ ku bekyuli budumi bɔdubɔyii ƒui.
Si awɔ lɛti elie ƒula lɛyu lɛdi kemmo kpoo ni, ɔdia-a utulo ka awɔ ku uleku ɔni mɔɔyɔ́ ɔgyani kenye ɔdi bɛkya lɛgbanya lɛdi kemmo.
Lɛtabi libo unu na kɔnwinimi kuse gbɛn, nsu kayi kemmo ɔlɛ ɔni na ɔdɔlɔdi ɔɔkya ukyuli kayi ni, ubo unu utulo alakpa anyɔ ammɔ ƒui.
Si ɔnundane úti ɔdɔlɔdi úsienku litemi katɛkɔ ni, kɔvanu kukpludi ku kɔdɔlɔ ala kani na mɔɔlɛ́ ɔdɔlɔdi ɔmmɔ kenye na uléboku keyi buɛɛ.
