Tesalonikaƒuɔ 1 5:12 - Katɔti Ɔku Kedee

¹² Banwa, buuvele-mii bɔnii biti ɔbu geen bite bina batɔnkune bani mɔɔtina-mii Kristo ngba bulie ala lɛlɔ.

Tesalonikaƒuɔ 1 5:12 ပူးပေါင်းရင်းမြစ်များ

Luka 10:7

Bɛsɔ bɛkya kaduli kani kemmo na báƒɔ-mii. Na lɛla biala lɛni na badubuti bete-mii ni, bɛdi na bɛni-ni. Ɔsika kabla ɔblane biala ni, ɔlɛka bete-nwu nwuna lɛyuƒɔla. Bitatáka bitamana ɔ́si kaduli kani úsie kani.

Yohane 4:38

Lɛ́tala-mii nnii bitáƒɛ edula ani na ɔɔɔdi amii nákya-nya. Bekyuli bamba nábla kabla kpakplaa kamɛni na edula amɛni bɔƒɛ kɔsia kani na amii bíbakɛ.”

Batalane Kabla 20:28

Ɔmɛni ɔsu ni, binye lɛlɔ kagyumana. Katɔti Kɔyu nábla-mii batɔnkune ɔnii bɛda nwuna bebi bani na Katɔti úti úte-mii bɔda kɔkɔɔkɔ. Bɛda-ma kaduɛ, ɔsika Katɔti úwi Ubidi ubugya kalɔ úti udie-ma lili.

Batalane Kabla 20:35

Lɛ́bla ala amɛni ƒui líti lɛ́tina-mii kalɛ na buteebunku bawabane, na binyimo litemi lɛni na Blɔti Yesu ɔ́su ɔnini, ‘Bute bɔdia butulo bɔƒɔ.’ ”

Romaƒuɔ 16:12

Bigyele beleku bani ndi Triƒaina ku Triƒosa bani nábla kabla na Blɔti kemmo. Na bigyele mina ɔkpana ɔyɔne Persi ɔni ndi uleku ɔbambadi ɔni lɛnɔ nábla kabla kpakplaa na Blɔti kemmo.

Romaƒuɔ 16:6

Na bigyele Maria ɔni nábla kabla kpakplaa úte bina lɛkpa lɛmmɔ.

Korintoƒuɔ 1 12:28

Na baƒɔtaadine lɛkpa kemmo ni, Katɔti úti bula ƒui úse ekpo ani námanku-bu. Udeedi ni, batalane. Na unyɔdi ni, kenye bediene. Na ɔtɛdi ni, ala batinane, asa na bani mɔɔbla akɔla budie taatina. Na bani mbo ɔyikun ɔni na babwi lɛlɛ iye bebunku bekyuli iye banu kabla lɛlɔ iye batɛmi adi lidu lidu lɛnɔ basia-ma kama.

Korintoƒuɔ 1 15:10

Nsu ɔkɛnku Katɔti lɛƒɔndia ɔsu ni, ndi ukyuli ɔni ndi ɔƒɛni. Na nwuna kaƒɔbuni ala ani na úte-mi ni, ánwu ebi. Na lɛ́bla kabla kpakplaa lítulo batalane bakladi ɔni na bekyuli baaasia anu ina ka ɔɔɔdi ami ɔlati ɔyikun kemmo na ɔdi. Mmomu Katɔti ɔyikun nkɛ-mi lɛlɔ na lɛ́bla ɔmɛni.

Korintoƒuɔ 1 16:16

biti ɔbu bite batɔnkune bamɛni ku babambadi bani muubunku-ma kabla kammɔ.

Korintoƒuɔ 1 16:18

Báya na lɛ́sɔ lɛ́kɛ ɔkplu aani kalɛ kani na bákya-mii ɔkplu. Na bekyuli bamɛni udu bámanku ka babu-ma geen.

Korintoƒuɔ 1 3:9

Ɔsika bɔdi bakpana na kabla kenwi kemmo. Na bɔ́sala bɔɔbla-ka teete Katɔti. Na amii bise aani Katɔti kemmo kani lɛlɔ na bunye bɔɔtuma. Na bise lɛnɔ aani ɔtɔ ɔni na Katɔti ɔ́tu.

Korintoƒuɔ 2 11:23

Kristo kabla bablane na badi? Ndi Kristo kabla ɔblane ntulo-ma. Báya na mɔɔtɛmi aani ukyuli ɔni muukpi libuo, nsu ɔdi litemi geen ka lɛ́bla Kristo kabla lítulo-ma. Bekyuli bani muukisi Kristo ni, bákya-mi aban ɔtɔ kɔlɛ kɔlɛ. Na bébo-mi lɛnɔ kɔlɛ kɔlɛ. Na líduo kukpi ku ngba ntɛ uwi pii.

Korintoƒuɔ 2 5:9

Na lɛla lɛni na bɔɔwia teetulo ndi ka si mɛni na bɔkya o-o iye Katɔ Ɔga Ɔma o-o ni, na bɔbla Blɔti lɛƒɔyɔ.

Korintoƒuɔ 2 6:1

Ka bunye bɔɔblaku Katɔti kabla ɔsu ni, buuvele-mii bɔnii bitebile Katɔti kɔnyana bɔnu.

Galatiƒuɔ 4:11

Liƒu lɛɛda-mi na bina lɛlɔ. Na ɔɔbla-mi aani ka kabla kani na lɛ́bla líte-mii ƒui kadi kabla keeke.

Ƒilipiƒuɔ 2:16

Na bɛda ngba litemi lɛmmɔ kaduɛ. Na si bɛ́kana na bɛ́bla ɔmɛni ni, ndubɔkɛ kenyekɔ na lɛkun lɛmɛnɛ na limeyi lɛni lɛlɔ na Yesu wada walɛ. Ɔsika ɔdubɔtina ka ńtekeli usi ɔmmɔ keeke iye ńtebo abi ńtewiakun.

Ƒilipiƒuɔ 2:19

Si Katɔti ɔ́tunaku-mi ni, uwi klukui kama ndubɔtala Timoteo lɛkya-mii, kalɛ na lɛkɛ ɔlɔkplu si línu bina lɛlɔ lɛla lɛdi lɛsiku-nwu kudɔ.

Koloseƒuɔ 1:29

Ɔmɛni ɔsu na muukpóku lɛlɔ ɔkɛnku Kristo ɔyikun ɔni nkya-mi lɛlɔ kemmo ɔɔbla kabla kamɛni kenye.

Tesalonikaƒuɔ 1 2:9

Banwa binyimo ka uwi ɔni na bɔ́kya-mii kudɔ na bɔ́su-mii litemi buni lɛmɛni ni, búni ewulu usien ku ɔƒɛ na bɔ́bla kabla na bútenwini etila bútasia-mii lɛlɔ.

Tesalonikaƒuɔ 1 4:1

Banwa, mina lɛla likplodi lɛni muuvele-mii ndi ka ni, bilie ngba bɔni mɔɔyɔ́ Katɔti kaƒɔ aani kalɛ na bɔ́tina-mii. Bɛdaku ɔkplu bɔkya bɔdi, nsu bɔɔkya-mii ogya na Blɔti Yesu lɛnyi kemmo bɔnii bɛbla bitulo lɛni.

Tesalonikaƒuɔ 1 5:14

Lɛnɔ ni, banwa, bɔɔwia kpakplaa ka bɛkɛ litemi bɛsu bakɔsɔne. Na bɛkya bani na liƒu lɛɛda ɔkplu. Na bibunku bani mɔɔwia kebunku. Na bɛkɛ kayi buɛɛ bite ukyuli biala.

Timoteo 1 5:1

Tadɔnku ukyuli ɔni nábi lɛlɔ utulo-ɔ momoomo. Mmomu die ala kalɔ te-nwu ku kayi buɛɛ aani ƒula ɔti kalɛ. Na ada bakloƒu aani banwani kalɛ.

Timoteo 1 5:20

Na bekyuli bani nli nte ekpidi bɔbla ni, ɔlɛka edie alɛ-ma na adɔnku-ma na baƒɔtaadine ƒui anumi. Na ɔmɛni ɔdubɔkya bakladi liƒu.

Timoteo 2 2:6

Umonsene ɔni nábla kogyoklo geen na nwuna kemmo ni, anwu mɔɔka edula ammɔ bɔdi.

Tito 1:3

Údie ngba ƒui litemi ɔ́tina-bu na nwuna litemi lɛni mɔɔsu mɛni kemmo na uwi ɔni lɛlɔ na anwu ɔlati úse úse lɛlɔ. Ɔmɛni na úti ɔ́kya-mi enu kemmo na mɔɔkɔ́-ni lɛsa teete kadi. Na Blɔti ɔni ndi bula Ɔƒɔne násu-mi ɔnii nkɔ lɛsa lɛmɛni.

Tito 1:5

Lɛ́ya-a na ásɔ akya Kreta kalɛ na aklibi ala ani nébu bɔklibi. Na ɔma biala kemmo ni, die benengu bani menye baƒɔtaadine kenye aani kalɛ na lɛ́su-ɔ nnii bla.

Tito 2:15

Tina ala amɛni ku kenyekɔ kani na Katɔti úte-ɔ, na akya bekyuli bani ƒui muunú-ɔ litemi ɔkplu, na abɔku bani naaabla taasiaku ulu lɛlɔ lɛnɔ. Na taya na ɔdi ɔnu-ɔ ɔnii ásɔ.

Hebriƒuɔ 13:17

Binu bina batɔnkune litemi na biboku lɛlɔ kalɔ bite-ma na badi-mii lɛlɔ. Ama mɔɔnu-mii lɛlɔ aani bekyuli bani na ɔlɛka babu akunta bete Katɔti. Bɛbu-ma kalɛ na bana kabla kenwini lɛlɔyɔ na ulabla-ma etila. Ɔsika ɔmmɔ ulete-mii kenyekɔ kabuni kadi.

Hebriƒuɔ 13:7

Binyimo bina batɔnkune bani násu-mii Katɔti litemi. Na bɛbu bɛnu kɔsia kɔni na bákɛ na ulu ɔni na béti bélie ngba kemmo. Na bɛnu bana bɔƒɔtaadi bɛtɛya.

Budie Taatina 1:20

Ayabi maatɛ ani na ánu na mina kɔdianu ku sika ugyiedi ligyii lɛmmɔ enye ete lɛla lɛdi. Na ana kalɔ na ndubo budie mɛni. Ayabi maatɛ ammɔ ndi Katɔti batu maatɛ ute baƒɔtaadine akpa maatɛ ammɔ. Na sika ugyiedi ligyii lɛmmɔ ndi baƒɔtaadine akpa maatɛ ammɔ.”

Budie Taatina 2:12

Na ɔ́su-mi ɔnini, “Nweni ɔku te Pergamo baƒɔtaadine lɛkpa ɔtu anii, “Ami Yesu mbo kewii kani bádɔ-ka lɛvi inyɔ mmɔ. Na ami mɔɔsu kenye kamɛni.

Budie Taatina 2:18

“Nweni ɔku te Tiatira baƒɔtaadine lɛkpa ɔtu anii, “Ami Yesu ndi Katɔti Ubidi. Na mina anumi aada aani ogya na mina lɛgba liikeye aani lɛbuala lɛni bákya ogya na lígyie. Ami mɔɔsu kenye kamɛni.

Budie Taatina 2:3

Ngyi ka binye lɛbibo lɛmmɔ kenye kpakplaa na bɛɛkya ɔkplu na ami ɔsu, na enu átaƒɛ-mii.

Budie Taatina 2:8

Na ɔ́su-mi ɔnini, “Nweni te Smirna baƒɔtaadine lɛkpa ɔtu anii, “Ami Yesu ndi Udeedi ku Ukplodi. Na líkpi, nsu lɛ́sɔ lɛ́ta líbo nli ngba. Na ami mɔɔsu kenye kamɛni.

Budie Taatina 3:1

Ɔ́sɔ ɔ́su-mi ɔnini, “Nweni te Sardi baƒɔtaadine lɛkpa ɔtu anii, “Lɛni na ukyuli ɔni mɔɔdi ayu maatɛ ani mɔɔbla Katɔti kabla na nwuna lɛga boku anumi lɛlɔ na ɔda ayabi maatɛ ammɔ na nwuna kɔdianu ɔɔsu.

Budie Taatina 3:14

Na ɔ́sɔ ɔ́su-mi ɔnini, “Nweni te Laodikea baƒɔtaadine ɔtu anii, “Lɛni na anwu ɔni mɔɔyá na lɛla biala lɛɛsia lɛni ɔɔsu. Na ɔdi Katɔti kenye udiene geen ɔni mɔɔbla ala ulu lɛlɔ, na anwu mɔɔdi Katɔti ala ani ƒui na údie lɛlɔ.

Budie Taatina 3:7

Ɔmmɔ kama ni, ɔ́su-mi ɔnini, “Nweni te Ƒiladelƒia baƒɔtaadine lɛkpa ɔtu anii, “Lɛni na anwu ɔni nse kedee na nwuna litemi lɛdi litemi geen ɔɔsu. Anwu nda Ɔga Dawid ɔyikun ɔni na si ɔ́lɛmi kayakun kadi ni, ɔdi ɔsɔ ulakana-ka bɔkalɛ. Na si ɔ́kalɛ-ka ni, ɔdi ulakana-ka bɔlɛmi.