ESAIA 51:3 - Lacid Common Language Bible

³ «Ngoo gi Yerusalem yo' nya: da" byo, yoin" jo, jang" moo nyid boem da" bang: dangain" ri nheig khyeug myid ci: shug byid: wa. Nya: mungdain: gi dain" pyoid yoo nghoid loug we' ngoo gi hau: ziri ngoo koid to" da Eden khyam: yhang: ti" da" khyam: ri koid pyam wa. Gau yi ngei pyo: zigi houg moo jo, loo wa. Jeju" coung" jikhoin" joem khoin" lho: ngoo ri jeju" boin: loo goo" wa.

ESAIA 51:3 ပူးပေါင်းရင်းမြစ်များ

APOEM AYANG: 13:10

Lod gi ayam aqei: khyoo: yu" kaid lho: Yodan pa: dam goin" Zora joyoo gyid myoo: sho' yo" da" Aseing da" khyam: yhang: ti" Egutu mung" yhang: ti" da" joyoo ri yu" myang kaid bye:. (He: zigi Aseing aphyo' shoin' pyam shi" re da" Sodom yo' Gomora voomoo" nghoid.)

COUNG" NGHEI 85:8

Aseing Mangsoo tid nyid da" dang: ri ngoo tam" gyo: nyid. Ngoonu" gi akoo" adau: da" khyoo: moo avhang: lheung lo" nghoid rigi nya byumyu" yi nghoid da- ngoonu" ri ngei pyo: myenjham" khyoo: byid: wa Nya: dangsoo" khoin" too" byid: bye:.

ESAIA 12:1

Meing: byu yigi coung" nghei jikhoin" khoin" da" ayo, ju" loo wa. Hau: zigi Aseing we" ngoo gi nang ri coung"- nang gi ngoo ri nheig yo da:. Nghoid loug we' akhid" nang ngoo ri nheig teing byid: wigi nheig ayoo: loo: nghoid da:.

ESAIA 25:9

Hougsu" bui" lang" yugkhang" moo" gi «Nyang: gi ngoonu" Mangsoo nghoid. Ngoonu" nyang: ri loem khau: nyid lho: nyang: ngoonu" ri khyoid yu abye:. Nyang: gi Aseing nghoid. Nyang: ri ngoonu" loem khau: nyid wigi akhid" ngoonu" ngei pyo: nyid gau yi nyid. Ciwim gari nyang: ngoonu" ri khyoid yu abye:» ga: tid loo goo" wa.

ESAIA 35:6

Khyid gyoug: su: thau" byam wigi go" loo goo" wa. nhoid jed bang: gi ngei pyo: wigi nyho: loo wa. Gyidzoo: gyung: gi dain" pyoid yoo khyo" yau lid loo wa.

ESAIA 41:16

Nang gi nyangnu" ri moug: tho' khyoo: jhu" to' kaid wa. lid gi houg: bang: ri moid tang" lo" byug wa. Nyangnu" gi uglid wigi hau' tang" pyam zi shoug" wa. Hau: thang: nanu" ngei pyo: loo wa. Ciwim gari ngoo gi nanu" Mangsoo nghoid. Nanu" gi Israela da" gyeung" shang: da" ngoo Mangsoo ri coung" nghei loo goo" wa.

ESAIA 43:19

Ngoo koid wa nghoid da" moo" aseig ri zung" yu" we'. Hau: zigi bue" re" nyid abye:- nanu" hau: ziri akhid" yo" myang abye: go". Ngoo gi dain" pyoid yoo khyo" kho' lid: lo" da" khyoodeing ri koid wa. Hougmoo ngoo nanu" ri gyid zoo: gyung: joem yau byid: nhang: wa.

ESAIA 44:26

Nghoid loug we' nga" dei zoo: Lapi: pe: lang" nga" da" myid soin: khyoo: joem ri toin" shid wa shid re" nga" lagyoo: ri nhang: kaid lang" ngoo gi hau: myid soin: khyoo: joem ri koid byid: wigi lapi: dang: ri joeb byeung" loo nhang: wa. Voo byu yi doem nyid loo goo" wa ein: Yerusalem ri ngoo tid. Nyangnu" doem de: nyid loo wa ein: Yuda voomoo" joem ri ngoo tid. Hau: voomoo" joem gi byo, yoin" jo, jang" mo doem to' loo goo" wa.

ESAIA 49:13

Mougkhung: we"- jikhoin" we' myidjang we' gau wigi nyho: yoid ge'. Boem joem ri jikhoin" khoin" nhang: we'. Aseing gi nya: byu yiri nheig teing byid: loo wa. Nyang: gi ashoo" ajhen: kyi" khyeug kham zo: nyid da" nya: byumyu" yiri nheig khyeug byid: loo wa.

ESAIA 49:19

«Re" mungdain: gi byo, jo, wigi jham" coug: youg bue" jo, da:. Nghoid loug we' houg: moo lo nyid wa ju" lo nyid boem mo, shid re" akhid" hau: zigi soung nge loo wa. Nang ri byo, yoin" nhang: too" kho' boem da bang: gi nanu" mo ve da" joyoo khyoo: shu" pyam zi shoug" loo goo" wa.

ESAIA 49:8

Aseing gi nya: byumyu" yiri «Nang ri khyoid yu wa ayo, ju" loo lang" ngoo gi nang ri myonhoo: byid: wigi pang" thoug wa shid re" nang mho' yoid ziri ngoo tam" gyoo: byid: wa. Ngoo gi nang ri lhoug zung" wigi goem loem byid: wa. Houg: lho: nang khyo" wigi byumyu" dangain" yo' dang: theing koid wa. Akhid" jham" coug: youg bue" jo, da" re" mougmyid moo ngoo nang ri dalheing: doem de: nyid nhang: wa.

ESAIA 51:12

Aseing tid zigi «Nang ri yoem: boo nhang: su: gi ngoo nghoid. Myo, gam tho' mo jain" sho' ayo" zeing: kham da" Shid: se' da" byu ri ciwim gyoug la".

ESAIA 52:9

Byo, yoin" jo, da" Yerusalem nang we" gau wigi nyho: kaid we'. Aseing gi nya: voomoo" ri khyoid yu wigi Nya: byu yiri nheig teing byid: loo wa.

ESAIA 61:10

Aseing koid bye: da" lo, moo" yoomo Yerusalem ngei pyo: da:. Nyang: gi nya: lo, xo' pui" shid re" soin' shoung: void ci: da" myhi' seig yo' du loo wa. Mangsoo gi nyang: ri khyoid yu ziyo' oung: doid zi wigi foid too" abye:.

ESAIA 65:18

Ngoo phain" so: to" jang mo apyaid atoo: gau yi ngei pyo: nyid ge'. Ngoo phain" to" da" Yerusalem aseig gi ngei pyo: zi yo' byeung" jo, wa. Houg lho: nya: byumyu" yi we' ngei pyo: loo goo" wa.

YEREMIA 31:25

Myung: bang: ri ngoo yoem: doem lung: byid: wa. Zoo yoid bang: yugkhang" moo" ri zoo: noem wigi nheugdeug nhang: wa.

EZEKIEL 28:13

Nang gi Mangso da" khyam: Eden moo nyid lho: phoug" dab lug zi aja: ja: ri void ci: da:. Hau: joem gi patemya"- sen- utaphaya- myed yue"- jhaung:- nagathue'- nila- mya- lug ni joem nghoid da:. Nang gi shoung: yhoung ci: wa shid re" sheing: zi joem yo" da:. Hau: joem ri re" shid re" nang ri phain" so: kaid uri nyang: koid too" byid: gu nghoid bye:.

EZEKIEL 36:11

Ngoo gi byu joem yo' gougnyhoug joem ri myo: je: loo nhang: wa. Nanu" gi shid phyang" tho' je myo: lo wigi nanu" gi zooshang: myoo" sho' yo" loo goo" wa. Ngoo gi nanu" ri hau: joyoo moo nanu" lhung nyid lid: lo kho' ziyo' dayhang: ti" nyid nhang: wa. Houg: lho: ngoo gi nanu" ri shid phyang" tho' je nyid gi yab ge nhang: wa. Houg: lang" ngoo Aseing nghoid ziri nanu" se' loo goo" wa.

EZEKIEL 36:35

Yugkhang" moo" gi shid phyang" dalheing: dain" pyoid yoo bue" jo, da" he: mougmyid gi Eden khyam: yhang: ti" bue" loo bye: ziyo' phyo' khyo' pyam- lhoid yu pyam bye: lho: byo, yoin" jo, bye: da" he: voomoo" joem gi akhid" khasu" byu doem nyid lho: gyidab voomoo" bue" lo khyoo: ri tid loo goo" wa.

YOELA 2:3

Nyangnu" gi myi: yo' dakhyoo" ti"- shivoo: shiloem joem dangain" ri zo: pyam boem ago". Nyangnu" da" shidkhoin" moo- hau: mougmyid gi Eden khyam: yo' du da:. Nghoid loug we' nyangnu" da" nungthang moo gi kyug byug da" dain" pyoid yoo ti" bue" byug wa. Nyangnu" mo ci" we' aloid nghoid da:.

1PETERU 1:8

Nanu" gi Khristu ri amyang yu" boem nghoid loug we' jheddab nyid-akhuid" amyang shi" nghoid loug we' nanu" gi Aseing: ri loem" jeung" nyid bye- hougsu" nghoid yoomo nanu" gi nhoid, yo' tid loo, a-oung: loo: sho' gau yi ngei pyo: ziyo' ngei pyo: nyid boem bye.