Kolose 3:5 - Chipangano Chabwangu

⁵ Ala, lekeni ukwikala kwenu ukwabuntunse: ubulale-lale, ubuchende, ulwinso ulubi nolunkumbwa ulwabipa. Pakuti ulunkumbwa emusango umo uwakulomba tungosa wakubasa.

Kolose 3:5 ပူးပေါင်းရင်းမြစ်များ

Mateyo 15:19

Pantu mumutima emufuma amalangulushi aabi: ukwipaya, ubuchende, nokuchita ifintu ifyabipa, ukwiba, ubufi, nokwamba abanabo.

Loma 1:26

Nipamulandu wamfi epo Lesa abalekele ukuti balokuchita ifibi ifyamwansha nsoni. Abanakashi baya kubanakashi banabo, ichitalingilepo.

Loma 1:29

Imitima yabo yayiwilemo ubusali bonse: ububi, bukabundulu, imibele iibi, mufimbila, bukepaya, ulubo, ubuchenjeshi nolupato. Balamba,

Loma 6:13

Mwilokubomfya ichilewa chenu chimo ichamubili wenu kububi, kuntu mwipele kuli Lesa nga bantu bafuma kumfwa nokuya kubumi. Mubomfye ifilewa fyamibili yenu mukubombela Lesa imilimo yabulungami.

Loma 6:6

Twalishiba ati akabelo kesu akakale kashilile ulo Yesu asamikilwe pamutashi, ukuti ubwikalo bwesu ubwabubi bonayikwe, elo twiba nakambi abasha babubi.

Loma 7:23

Nomba ndabona ifunde lipyunga mumubili wanji ililwisha ifunde lyaku Lesa ilyo nasuminamo. Ifunde limbi ndi likonka inshila yabubi. Engu uulenga ukuti mbe umusha wabubi.

Loma 7:5

Ulo twalikukonka ubumi bwabuntunse, ifibi fyakoseleshiwe na Mafunde nokukula muli fwe. Elo fyalifyala imfwa.

Loma 8:13

Nga mwayikala mukusekesha ifyabuntunse bwenu, mwakwisa kufwa. Nomba mukutungululwa no Mupashi Wabuta mwasha ukufwaya ifyabuntunse, mwakuba nobumi.

1 Kolinto 5:1

Chalyumfwika mpanga yonse ukuti pali ubulale-lale pakati kenu ubo nabantunse tekuti bachitepo. Chikoumfwika ukwebati banyika bakoulungana nomwana wakusanga munanda.

1 Kolinto 6:11

Bambi muli mwe efyo bali kale. Nomba mwalisambwa kububi nokuba abana baku Lesa. Lesa alimulungamika ukupitila mwishina lyaku Bashikulu Yesu Klistu no Mupashi waku Lesa.

1 Kolinto 6:13

Umbi naye kuti asosa ati, “Ichakulya chamumala, namumala mwachakulya.” Nangu chibe mfi, Lesa wakufyonaula fyonse fibili. Umubili tewakuchitilako ubuchende iyowo, wakubomfiwa mukupyungila Bashikulu. Echo Bashikulu ebene bamubili ngo.

1 Kolinto 6:18

Talamukeni kubuchende. Pakuti ukubifya kumbi umuntu achita kwaba kunse yamubili, nomba umuntu uuchita ubuchende, abifya nomubili wakwe kumo.

2 Kolinto 12:21

Nkotina ukuti nga nayisa nakambi kuli mwe, Lesa wanji kuti amfwisha nsoni pamenso enu. Elo nande nakulila imisonshi pamulandu waku bo ababifishe kale, elo tabalapile pabusali bachitile: Ubuchende bwabo nefibi fyonse ifyo balikuchita.

Galatiya 5:24

Bonse ababa muli Klistu Yesu balisamika pamutashi imibele yabuntunse iibi pamo nolunkumbwa.

Efeso 4:19

Tabakwatapo insoni. Elo baliipela mukuchita ifyabusali nefibi ifili fyonse ukwambula ukuyikanya.

Kolose 2:11

Mukusankana pamo na Klistu emo mwashilimunwa, tekushilimunwapo kwamubili iyowo, kuntu kwaku Klistu umwine, ukwabamo ukulubuka kufiso fyangu mubili wabuntunse.

1 Tesalonika 4:3

Icho Lesa akofwaya chakuti mube ababuta mumitima yenu. Emukuti mufume kubulale-lale.

1 Tesalonika 4:5

Teyalunkumbwapo kubati benafyalo abashamwishibapo Lesa.

1 Timoti 6:10

Pakuti ukutemwa indalama entulo yabubi bonse. Pamulandu wakutemwesha indalama abantu bambi bafumamo munshila iyachichetekelo, elo ifyakufinya ifinji fyabepaya.

Hebele 12:16

Chenjeleni ukuti kwibapo nangu umo uwakuba uwabulale-lale, nangula abakusuula ifyaku Lesa kubati ni Esau, uyo washitishe ububele bwakwe nechakulya chimo bwaka.

Hebele 13:4

Ichupo mulokuchichinshika, abalume nabanakashi babo balokuchetekelana pakuti ababulale-lale nababuchende Lesa akabapingula.

Hebele 13:5

Mwilokutemwa indalama, kuntu sekeleleni kufyo mukwete. Pakuti Lesa asosele ati, “Nshakamushepo nangula ukumulekelesha iyowo.”

Yemusi 4:1

Kanshi inkondo nokutalikana pakati kenu fifuma kwisa? Napo tafifumapo kulunkumbwa ulwabuntunse bwenu ulukochita inkondo muli mwe?

1 Petulo 2:11

Mwe batemwekwa, pakuti muli abalwendo panonshi, nkomupapata talamukeniko kufyalunkumbwa ulwamubili ifyo ifilwa namwe.

Ukufisulula 21:8

Nomba abamwenso, abatachetekelwapo, abafwaya ifyabunani, bakepaya, ababulale-lale, indoshi, abalomba tungosa wakubasa, nabonse ababufi. Ichifulo chabo nimuli bemba wamulilo uwaka nasilubale. Nji emfwa yachibili.”

Ukufisulula 22:15

Nomba panse yamusumba paba imbwa, indoshi, ababulale-lale, ifipondo, abalomba tungosa wakubasa nambalya abatemwa nokuchita ifyabufi.