Kolose 3:16 - Chipangano Chabwangu

¹⁶ Lekeni amashiwi aku Klistu aamuchinshi alokwikala mumitima yenu. Mulokusambilishanya nokupandana amano. Mulokwimba inyimbo ishakutondayisha Lesa isha Malumbo, neshakutotela, nenyimbo shimbi ishakulumbanya Lesa. Mulokwimbila Lesa nokumutotela mumitima yenu.

Kolose 3:16 ပူးပေါင်းရင်းမြစ်များ

Mateyo 26:30

Ulo bayimbile ulwimbo, balifuminemo nokuya kulupili lwa Maolife.

Luka 2:51

Elo Yesu nomba ayile nabo ku Nasaleti uko alikwikala nokubomfwila. Banyina balisungile mumutima wabo fyonse ifyasosekelwe.

Yohane 15:7

Nga mukoyikalilila muli nebo, namashiwi anji ayikala muli mwebo, fumbeni chonse incho mukofwaya, elo chikoyisa kupelwa kuli mwe.

Loma 10:17

Epo ichichetekelo chifuma mukumfwa Ubutumi Bwawama, nobutumi mbu bwisa mukubilisha ifyaku Klistu.

Loma 15:14

Mwe bawesu, nalishininkisha ukwebati mulikwete ubumi ubuweme, mulishibile fyonse ifisuma nokusambishanya.

1 Kolinto 14:15

Nomba nkochita shani? Nakulomba nomutima wanji, elo namano anji. Nakwimba nomutima wanji, elo namano anji.

1 Kolinto 14:26

Findo nakusosa bawesu? Ulo mulongana pamo, umbi ali nolwimbo, umbi neshiwi alefwaya ati asambilishe, umbi ali nakantu kambi ako Lesa amufisulwila, umbi naye akusosa mundimi ishitayishibikwapo, elo umbi naye wakwalula. Nomba fyonse mfi fichitwe mukukoselesha ichilonganino.

Efeso 1:17

Nkolomba kuli Lesa waku Bashikulu Yesu Klistu, Bata wamuchinshi, amupele Umupashi Wabuta uupa umulangwe uwakufisulula Lesa ukuti mumwishibe bwino.

Efeso 5:17

Echo mwibapo abapuneme, kuntu mwishibe ifyo Bashikulu bafwaya ukuti muchite.

Efeso 5:19

Musoshanye namashiwi aamalumbo, nenyimbo shaku Lesa, neshakutondayisha Lesa. Mwimbile Bashikulu mukutondayisha nomutima onse.

Efeso 5:26

ukwebati achibutishe. Achibutishe pakuchisamfya namenshi, elo namashiwi aakwe.

Kolose 1:28

Nomba tushimikila Klistu kubantu bonse, tuchenjesha nokusambishako abantu bonse pachinso chaku Lesa ukuti babe abakosa muli Klistu.

Kolose 1:9

Pali nchi, nafwebo, ukutatika nkalya kasuba twaumfwile, tatwalekapo ukumulombela. Tulalomba Lesa ukuti amwiushe amano nomulangwe ifyo Mupashi Wabuta apela ukwebati mumfwikishe fyonse ifyo Ye afwaya.

Kolose 4:6

Ukusosa kwenu kube ukuweme inshita shonse ishakusekelesha abantu, nakambi mulingile ukwishiba ukwasuka muntu bwino.

1 Tesalonika 1:8

Ukufuma kuli mwebo amashiwi aku Bashikulu, tayafikilepo kwenka ku Masedoniya naku Akeya iyowo, kuntu yafikile monse-monse. Napali nchi, tapapo fwebo ifyo twingasosapo.

1 Tesalonika 4:18

Kanshi mukoseleshanye muli nga mashiwi.

2 Tesalonika 3:15

Mumulinge ukubati kapondo kenu, kuntu mumuchenjesheko bwaka ukubati niwenu.

1 Timoti 6:17

Ubebe ababuboni panonshi ukuti tabalingile ukuyitutumuna nangula ukuchetekela pabuboni bwabo ubutekalililapo. Nomba balingile ukuchetekela kuli Lesa uyo uutupela ifintu fyonse ukuti tusekele nafyo.

2 Timoti 3:15

nakambi ukufuma ulo wali ulucheche walishiba Amalembo Aabuta, ayo angakupela umulangwe wakupulushiwa ukupitila mukuchetekela Klistu Yesu.

Taitasi 3:6

Muli Yesu Klistu, Umupulushi wesu, Lesa alifungulula ifiso fyakwe nokutupela Umupashi Wabuta.

Yemusi 1:5

Kati umo pali mwe takwetepo umulangwe, alombe kuli Lesa uupela namaboko abili ukwambula ukuyilishanya.

Yemusi 3:17

Nomba umulangwe uufuma kumulu waba uwalungama ukufikapo, elo wamutende, uwafuuka, tautalikishanya, uwayiwula nenkumbu, elo nemilimo iiweme. Taukwetepo akapatulula nangu ukutumpayika.

Yemusi 5:13

Napo umbi pali mwebo akochula? Kalombe. Napo umbi akosekelela? Kayimbe inyimbo ishakulumbanya.

1 Yohane 2:14

Nkolembela mwe bana banji, pantu mwalishiba Bata. Nkolembela mwe bashifwe, pantu muli mwishibile uyo uwabako ukufuma kukutatika. Nkolembela mwe balumbwana, pantu muli nefiso. Ishiwi lyaku Lesa likala muli mwebo, mwamuchimfya Umubi ngulya.

1 Yohane 2:24

Nomba mwebo musunge fyonse mwaumfwile ukufuma pakutatika. Nga mfi fyayikalilila muli mwebo, ekwebati mwayikalilila muli Bata namu Mwana.

1 Yohane 2:27

Lelo mwebo Klistu alimusuba no Mupashi Wabuta uyo uwayikala muli mwe. Pamulandu waku nchi, takufwayikapo umuntu nangu umo ukuti amusambishe. Umupashi Wabuta uyo mwasubwa wakulamusambisha fyonse. Fyonse ifyo akomusambisha fyachine nakambi tamuli ifyabufi iyowo. Echo kubati nimfilya amusambishe, mwikalilile muli Klistu.

2 Yohane 1:2

Tukomulembela mfi pantu ichine chaba muli fwebo nakambi chakuba nafwebo inshiku shonse.

Ukufisulula 14:3

Abantu bo balikwimba ulwimbo ulwabwangu pantanshi yachipuna chabufumu napamenso yafyabumi fine, nabachilolo. Tapalipo nangu umo uwakulusambilila ndu ulwimbo ukufumyako bwaka abantu mbalya abali 144,000 abo abapulushiwe ukufuma pano chalo.

Ukufisulula 15:3

Balikwimba ulwimbo lwakwa Mosesi umupyungi waku Lesa, nolwimbo ulwa Mwana wambelele ati, “Bashikulu Lesa Uwafiso fyonse, imilimo yenu ikulu nakambi yakushimbwisha. Ishila shenu shalilungama nakambi shachine, mwe Imfumu yamitundu yonse iyabantu.

Ukufisulula 19:10

Epo nalifukeme pamakasa akwe ukwebati mulombe, kuntu ye asosele kuli nebo ati, “Wichitapo mfi iyowo! Nandibo ndimupyungi bwaka kubati niwe. Nandibo ndi uwabachetekela kubati niwe nabanobe abo abakochitila Yesu bukamboni. Ulokulomba Lesa!” Pakuti ukuchitila Yesu bukamboni ebusoseshi ubwine-bwine.

Ukufisulula 5:9

Balikwimba nolwimbo ulwabwangu ati, “Niwebo uulingile ukupoka ibuku ndi, nokukambatula ifishibilo fyaliko. Pakuti niwebo bayipeye, mumfwa yenu mwashitile abantu, ukuti babe abantu baku Lesa abafuma kumishobo yonse, kundimi shonse, kumutundu wonse, elo nakuchalo chonse.