2 Kolinto 6:4 - Chipangano Chabwangu

⁴ Nomba muli fyonse tulayilanga abapyungi baku Lesa pakushipikisha ukwinekantu mumachushi, mukufinya namumafya.

2 Kolinto 6:4 ပူးပေါင်းရင်းမြစ်များ

Luka 21:19

Mube abakosele, elo mwakwipulusha mwebene.

Yohane 16:33

Namweba amashiwi nga ukuti mube nomutende wakuchetekela muli ne. Muno chalo mukaba mukuchula. Nangu chibe mfi, sekeleleni pantu nachimfya ichalo.”

Imilimo ya batumwa 2:22

“Mwe bena Isilaeli bananji, umfweni amashiwi anji. Yesu waku Nasaleti ali muntu uwo Lesa abweneshe ukuti eye asala. Nchi achibweneshe ukupitila mufiso ifikulu ifyakushimbwisha nefishibilo ifyo Lesa achitile muli Ye. Nokwishiba mwebene mwalishiba pantu fyalikuchitika pali mwebo.

Imilimo ya batumwa 20:34

Mwe mwalishiba ukuti nalikuyipyungila namaboko anji nga ukusanga ifyo nebo nambalya twalinabo twalikukabila.

Imilimo ya batumwa 9:16

Elo nebo nenka nakumulanga ifintu fyonse ali nokuchula pamulandu waku nebo.”

Loma 14:18

Uyo uukopyungila Klistu muli nji nshila, asekesha Lesa. Elo nabantu balamusuminisha ukuba umupyungi waku Ye.

Loma 16:10

Nkoposha umutende kuli Apelesi, umwina Klistu uwakosa. Mubaposhe umutende abamunanda yakwa Alisitobulasi.

Loma 3:5

Findo ifyakuchitikapo kati ububi bwesu bulanga ukuti Lesa aba uwalungama? Napo twingasosa ati Lesa taba bwino ulo atupela umulandu? (Nkososa nchi mukabelo kabuntu.)

Loma 5:8

Nomba Lesa alitulanga ifyo atutemwa ichakuti ulo twali mbifi Klistu atufwilile.

1 Kolinto 3:5

Mba Apolosi ninani? Mba Paulo naye ninani? Bapyungi bwaka abaku Lesa abaletele Ubutumi Bwawama kuli mwebo ubo mwachetekele. Umo-umo muli fwebo apyungile bwaka umulimo uyo Bashikulu bamupela.

1 Kolinto 4:1

Mwebo mulingile ukutubona nga bapyungi baku Klistu abasontwa ukwangalila ifyafisama fyaku Lesa.

1 Kolinto 9:11

Nga fwebo twalibyala ifiweme ifyakumupashi pakati kenu, nomba tatungapokapo shani kuli mwe ifyo tubulisha mubumi bwesu?

2 Kolinto 11:23

Napo bo bapyungi baku Klistu? Nkososa nga muntu uufuntile, ndimupyungi ukubachilapo. Nalipyungile imilimo ukubachilapo. Ilinji nali apepi nokufwa.

2 Kolinto 11:27

Nalibombele umulimo uunasha. Elo ilinji nshabwenepo utulo. Nalyumfwile insala nachilaka. Ilinji nshakwetepo ifyakulya, nalikumfwa impepo elo nokutakwatapo ifyakufwala.

2 Kolinto 11:9

Elo ulo nali kuli mwe, panshita ulo nshakwetepo akantu, nshachushishepo umuntu nangu umo. Pakuba bawesu bambi abafuma ku Masedoniya balimpele fyonse ifyo nshakwete. Pali fyonse nalisungile ukuti nimba kubati katundu uwakumulemena. Elo nakutwalililapo ukuchita mfi.

2 Kolinto 12:10

Echo ndasekelela ulo ndiwanaka, abantu bakontuka, bakomfinya, nolo nkoumfwa ukutinya namafya onse pamulandu waku Klistu. Pakuba ulo ndiwanaka, elo ndi nefiso.

2 Kolinto 12:12

Nalishininkishe ukwinekantu mukushipikisha ukuti ndi mutumwa ulo namubweneshe ifyafiso ifikulu nefyakushimbwisha.

2 Kolinto 2:17

Fwebo tatulipo nga abantu abenji abakochita amakwebo namashiwi aku Lesa. Nomba, pakuti tuli muli Klistu nga abantu abatumwa na Lesa, tusosa muchine, ukulingana nokufwaya kwakwe.

2 Kolinto 3:6

Eutupela ifiso ifyakupyungila chipangano chabwangu, temumafunde aalembwa, kuntu mu Mupashi Wabuta. Pakuti Amafunde aalembwa aleta imfwa, nomba Umupashi Wabuta upela ubumi.

2 Kolinto 4:17

Amachushi esu alyanguka, elo yakashita kanini, nomba yakutuletela umuchinshi uukulu ukuchilapo, elo wamuyayaya.

2 Kolinto 4:2

Twaposele inshila shonse ishamubumfisolo neshansha nsoni. Tatubomfyapo ubuchenjeshi nangula ukwalula amashiwi aku Lesa. Tufwaya ukuti abantu bonse batusuminishe nemitima yabo.

2 Kolinto 4:8

Tulachushiwa munshila ishapusana-pusana, nomba tatushonwapo. Amano alashila, nomba tatutompokapo umutima.

2 Kolinto 7:11

Boneni ifyo insoni shenu ishifuma kuli Lesa ifyo shamuchitila: Shamupela ukuchinchila, ukushininkisha ukwebati tamukwetepo umulandu, ukunyeka imitima nomwenso uukulu. Shamupela ukufunga ukumbona, ukufwayilisha ukungafwilisha, elo nokupela umulandu abachita ifibi. Pali fyonse mfi, pali ukushininkisha ukwebati tamwabifishepo iyowo.

Kolose 1:11

Tulelomba ukuti Lesa amukoshe ndi mufiso fyakwe ifyabuleme, ukuti mulokuba abakushipikisha, abakuteka imitima mufintu fyonse.

Kolose 1:24

Nomba ndibwaka uwasekelela pakuti nachulila mwebo, pantu mukuchula kwanji, emo nkoshilishisha amachushi aasheleko aali kubati aku Klistu, ayo achulile umubili wakwe, ekwebati ichilonganino.

1 Tesalonika 3:7

Pali nchi, mwe bawesu, mumafya namumachushi yesu onse, ukuchetekela kwenu kwatalalika imitima yesu.

1 Tesalonika 5:14

Mwe bawesu, tukomupapata ukuti muchenjeshe abanang’ani, mukoseleshe abena Klistu abakutintilila, mwafwilisheko abanaka. Mulokuteka umutima kubantu bonse.

1 Timoti 2:15

Nomba umwanakashi akwisa kupulukila mukufyala bana, ichikulu ashipikisha mukuyichefya, muchichetekelo, muchitemweko, elo nomutima uwabuta.

1 Timoti 4:6

Nga wasambisha bawesu ifintu mfi, wakuba umupyungi uuweme uwaku Klistu Yesu, uwakulila mumashiwi achichetekelo chesu, ekusambisha ifyachine ifyo wakonka.

1 Timoti 6:11

Webo we muntu waku Lesa ulokufitina fyonse mfi. Ulokwesha ukuba nobumi ubwakaele, ubwakuchinshika Lesa, ubwakuchetekela, ubwakutemwa, ubwakushipikisha nobwakuyichefya.

2 Timoti 1:8

Wibapo nensoni ukubela bukamboni Bashikulu wesu. Nakambi wibapo nensoni pamulandu waku nebo ne uuli muchifungo pamulandu wakwe. Nomba uyipekanye ukuchula pamulandu Wabutumi Bwawama ukulingana nefiso ifikupela Lesa.

2 Timoti 2:24

Umupyungi waku Bashikulu talingilepo ukuba uwalubuli iyowo, kuntu uwamutima uuweme kubantu bonse. Alingile ukuba umuntu uwayishiba bwino ukusambisha nomutima umo.

2 Timoti 4:5

Nomba webo uyilame inshita shonse. Shipikisha mukuchula. Ulokushimika Ubutumi Bwawama nokupyunga bwino imilimo yobe yonse.

Hebele 12:1

Nomba pakuti kuli bakamboni abenji abatushingulukile, katupose konse akalema nobubi bo ubukotukakatila. Elo katutwalilile nefiso ulwendo twatatika akale.

Ukufisulula 1:9

Nine Yohane wenu, nakambi muli Klistu ndi namwebo pamo mumachushi, mubufumu namukushipikisha. Nalikakilwe pachishi cha Patimosi pamulandu wakusambisha Amashiwi aku Lesa ukubela bukamboni pali Yesu.

Ukufisulula 3:10

Pakuti walilama amashiwi anji nokushipikisha, nandibo nakukusunga panshita iyamafya ayo ayakwisa pabantu bonse pachalo ukuti beshekwe.