2 Kolinto 4:4 - Chipangano Chabwangu

⁴ Bo tabachetekelapo pakuti Satana, lesa wapanonshi, alibafimba ukuti belokubona ukusanika kwa Butumi Bwawama. Ukusanika nku kubwenesha umuchinshi waku Klistu. Elo muli Ye Lesa alaboneka.

2 Kolinto 4:4 ပူးပေါင်းရင်းမြစ်များ

Mateyo 13:22

Bambi nabo baba kubati nimbuto ishawile muminga. Mba ebomfwa amashiwi aku Lesa, kuntu pamulandu wakufwayilisha ifintu fyamuchalo nobuchindami, elo mfi fintu filafininkisha amashiwi, epo tabatwalapo ifitwalo.

Yohane 1:14

Elo Ishiwi lyaalukile umuntu, ayishile kwikala mukati kesu uwayiwulamo ubwanshi nokwebesha. Nafwebo twabwene umuchinshi wakwe, umuchinshi wachana chimo chaku Wishi.

Yohane 1:18

Takupo umuntu nangu umo uwabona Lesa, kuntu Umwana uwafyalwa enka uwatemwekwa, uuli ni Lesa, ewatwishibishe ifyaku Lesa.

Yohane 12:31

Nomba enshita yakupingulwa kwabantu banchino chalo, Satana kateka wanchino chalo, akutamfishiwa.

Yohane 12:35

Yesu abasukile ati, “Ukusanika kuli pali mwebo mukanshita kanini. Endeni mukusanika ulo muchili nako ukuti imfishi iimufimbapo, pakuti uukoyenda mumfinshi teshibapo uko akoya.

Yohane 12:40

“Lesa abapofwisha amenso abo, nokwisala amano abo, ukuti amenso ebona, namano abo beumfwa, ukuti beyalukila kuli nebo, ukweba ati nandibo mbaposhe.”

Yohane 12:45

Elo umuntu onse uwabona nebo abona nangulya uwantumine.

Yohane 14:30

Tanshasosepo namwebo inshita iitali, pantu Satana, imfumu ya nchino chalo, ikoyisa. Nomba tayikwetepo ifiso fyakunchila.

Yohane 15:24

Nga nshachitilepo milimo iyishachitwapo kale nomuntu, nga tabakwata ukubifya. Nangu baliibona imilimo yanji, kuntu balimpata nebo pamo na Bata.

Yohane 16:11

Akubashinina pamulandu wabupingushi, pantu Satana, imfumu yabantu ababi abamuchalo, alipingulwa kale.

Yohane 8:12

Panuma Yesu asosele ku Bafalisi ati, “Nine kusanika ukusanikila bantu bamuchalo. Onse uwakunkonka akwisa kuba nokusanika ukwabumi, nakambi tayise kwendapo mumfinshi iyowo.”

Imilimo ya batumwa 26:18

Wakuya kubashibatula amenso, ukubafumya mumfinshi nokubaleta mukusanika. Wakubafumya mufiso fyakwa Satana nokubenjisha mufiso fyaku Lesa pakuti ukupitila mukuchetekela muli nebo bakunakililwa amabifyo abo nokusangana ichifulo mubwikalo pamo nabantu baku Lesa abasalwa!’

Imilimo ya batumwa 26:23

Klistu ali nokuchula nokuba umutanshi ukubuka kubafwa ukuti kukabilishiwe amashiwi epusukilo ku Bayuda nakubenafyalo, akabe ukusanika kuli bo.”

1 Kolinto 10:20

Iyowo, kuntu ifyo abakunse bapupa bapupila kumipashi iibi, te kuli Lesapo iyowo. Nshikofwayapo ukuti mwebo mube abakumbinkana nemipashi iibi.

2 Kolinto 2:11

Ichikulu chakuti Satana etuchengeleka pakuba tulishibile inshila shakwe.

2 Kolinto 2:12

Ulo nafikile ku Tuloasi ukuti nkashimike Ubutumi Bwawama ubusosa ifyaku Klistu, nalisangile Bashikulu baliswile kale inshila ukuti mpyunge umulimo nkulya.

2 Kolinto 3:11

Nomba ifintu ifyakashita kanini fyalishile nomuchinshi, ekwebati ifyakubelelela fyakuba nomuchinshi ukuchilapo.

2 Kolinto 3:14

Nomo imitima yabo yalikosele, ukufika nanduno ichinsalu nchilya chilibafimbile nangu ulo bapenda amabuku ayamuchipangano chakale. Ichinsalu nchilya balachifumya ulo umuntu aba muli Klistu.

2 Kolinto 3:18

Fwe bonse, abatakwetepo ichifimba pamenso esu, tubwenesha umuchinshi waku Bashikulu kubati nimfilya ichilola chilanga umuntu ichinso. Echo umuchinshi wenka ngulya, uufuma kuli Bashikulu, abali Mupashi, balatwalula ukuti tube muchipasho chabo ichamuchinshi uwachilapo.

2 Kolinto 4:6

Lesa asosele ati, “Ukusanika kwise ukufuma mumfishi.” Lesa enka ngu ewatusanikile mumitima yesu ukwebati abantu beshibe umuchinshi waku Lesa ngu uukosanika pachinso chaku Klistu.

Galatiya 1:4

Yesu aliipele pamulandu wamabifyo yesu ukuti atupulushe kumabifyo amuno chalo, ukubati ifyo Lesa Bata balikufwaya.

Efeso 2:2

Panshita njilya, imyendele yenu yalilingene neyabuntunse. Elo mwalikumfwila umukulu wamipashi uwamulwelele. Umukulu ngu mupashi uubi ukobombela muli bo abatanakilapo Lesa.

Efeso 6:12

Pakuba munkondo yesu tatukolwishanyapo nabantu bwaka iyowo. Tukolwishanya neshamfumu, abafiso nentungulushi shapano chalo ichamfishi, elo nemipashi iibi iyamulwelele.

Filipi 2:6

Ye ali nobu Lesa, kuntu tayeseshe ukuti ukulingana na Lesa chintu angayikatilila.

Kolose 1:15

Klistu echipasho chaku Lesa uutabonekapo, nakambi ebeli kufyalengwa fyonse.

Kolose 1:27

Pantu Lesa atemenwe ukuti abenafyalo bonse beshibe ichamfiso ichiweme ukwinekantu ichabuboni ubwabuleme bwakwe. Ichamfiso nchi ningu Klistu uuli muli mwebo, nakambi eumupela ukulindilila kwakupokela ubuleme.

1 Timoti 1:11

Ichisambililo nchi chikosangwa mu Butumi Bwawama ubo Lesa uwamuchinshi nakambi uwashuka ampele.

Taitasi 2:13

Pakuti tukololela ubushiku ubwashukishiwa, ulo twakubona umuchinshi waku Lesa umukulu, no Mupulushi wesu Yesu Klistu.

Hebele 1:3

Muli Ye mukoboneka ukusanika kwamuchinshi waku Lesa, nakambi echipasho chaku Lesa. Euchingilila ifintu fyonse namashiwi akwe afiso. Ulo ashilile umulimo wakunakilila amabifyo abantu, ayile kumulu kwikala kukuboko ukwamulyo kwaku Lesa uwafiso fyonse.

Hebele 6:4

Bo abaposele ichichetekelo chabo, tekuti babwelelepo nokulapila. Lesa alibasanikilepo kale, elo baumfwileko ichabupe ichifuma kumulu. Nabo balipokelele no Mupashi Wabuta.

2 Petulo 1:19

Nomba tulishibile ukuti amashiwi aabasoseshi nga achine. Mwakuchita ichiweme nga mwayomfwila, pakuba ali kubati ninyali iisanika mumfishi kumacha ulo intandala yaluchelo yamba ukusanika mumitima yenu.

1 Yohane 2:11

Umuntu onse uwapata wakwe ali mumfinshi nakambi enda mumfinshi. Teshibapo uko akoya pantu imfinshi yamulenga ukutabona.

1 Yohane 2:8

Nangu chibe mfi, ifunde nkomulembela lyabwangu pantu fyonse likososa fyachitikile muli Yesu nakambi fikochitika muli mwe. Pakuti imfinshi ikoya ikoshila, elo nolubuto ulwine-lwine lwatatika ukusanika.

1 Yohane 5:19

Twalishiba ukuti fwebo tuli bana baku Lesa, nangu chalo chonse chaba muminwe ya Mubi.