Roma 8:5 - Taaz Weru Witu u Nunuwu'en Tombulu

⁵ Pahpaan sé menou-nou mahkiit um paaz un awakna in esa é megena-genang uman i mangun um paaz un awakna in esa; taan sé menou-nou mahkiit um paaz ni Roh ni Opo Empung é megena-genang uman i mangun ang kapaaz ni Roh ni Opo Empung.

Roma 8:5 ပူးပေါင်းရင်းမြစ်များ

Markus 8:33

A si Yesus luméngéma a mileka wia sé pahtuzu'en-Na a si Petrus séro'en-Nala, “Mangémo ko tonaas né sétang! Ni ko é mahgenang uman ung ginenang ni tou, zéi'kan ung ginenang ni Opo Empung.”

Yohanes 3:6

Si tou matoumé im wia si tou é mahkiit uman um paazna in tou uman, taan si tou si matoumé im wia si Roh ni Opo Empung, menou-nou mahkiit um paaz ni Roh ni Opo Empung.

Roma 8:9

Taan ung katou-touan niou én zéi'kan mahkiit ung kapaaz un awak niou in esa taan mahkiit ung kapaaz ni Roh ni Opo Empung, pahpaan si Roh ni Opo Empung é nimaesamo karia niou. Si tou zéi'kan siapa Roh ni Kristus witu un aténa, ni sia én zéi'kan anu ni Kristus.

1 Korintus 15:48

Péléng sé menou-nou wia ung kaayahan kenu, an awak néra é masuat wo un awak ni tou kataré, tana' am wangunen ni Opo Empung. Taan sé menou-nou witi kasendukan, an awak néra é masuat wo ni Sia si witi kasendukan a méyé.

1 Korintus 2:14

Taan si tou zéi'kan siapa Roh ni Opo Empung é soo tumalinga an ipahtuzu' ni Roh ni Opo Empung, pahpaan niitu ém pahkuana ing kalemouan. An ipahkua ni Roh ni Opo Empung én zéi'kan kata'uanna, niitu é makata'uannamokan sa si Roh ni Opo Empung sumawang ni sia i mata'u niitu.

2 Korintus 10:3

Zozo' ni kai é menou-noupé' wia ung kaayahan, taan um pakahsaru nai sé tou mahtuzu' an zéi'kan ulit én zéi'kan tanu um pakahsaru né tou wia ung kaayahan.

Galatia 5:17

Pahpaan u lelo un awak i mahwangun a léwo' é nimatamburian karia um paaz ni Roh Lenas wo um paaz ni Roh Lenas é nimatamburian karia u lelo un awak i mahwangun a léwo'. Un zua kenu é nimatamburian taka-takazan ni kamu sekezé én zéi'kan mahwangun ang kapaaz niou.

Efesus 5:9

Pahpaan si tou menou-nou witu un ayah é mahwua'mé ang kawangunan, zéi'kan mahsanaweka wo ulit.

2 Petrus 2:10

sé ipahpuu-puuna é sé tou sé mahkiit uman a lelo léwo' un awak néra a mahwangun ni séra in zéi'kan wangun wo mahséro' ung kawasa ni Opo Empung. Sé méster towo itii én totoz wuaya wo wera', makaz ni séra én zéi'mo maindé' i mahséro' sé pahloozen wo pahsigi'en witi kasendukan.