Roma 5:2 - Taaz Weru Witu u Nunuwu'en Tombulu

² Ni kita sé ma'éman ém winéhan u lalan i mé'an ung kamang itambéré ni Opo Empung pahpaan si Yesus Kristus. Ung kamang kenu u nimangun ni kita menou-nou wo mahpaa-paaz pahpaan mahéré'la i makailek u sigi' wo looz ni Opo Empung.

Roma 5:2 ပူးပေါင်းရင်းမြစ်များ

Matius 25:21

Ang kuan ni tuangna wia ni sia, ‘Totoz wangun um winangunmula itii. Ni ko én ata lé'os wo toro pa'émanen. Ni ko én toro pa'émanen i mahpaayang ang kori', niitumo ni ko én tarawésaangku u lumouspé'mé niitu. In tarékan muntepomé wo méyémo i mahpaa-paaz kariaku!’

Yohanes 10:7

Niitumo si Yesus kimua kasiima, “Uli-ulit ikua-Kuma wia ni kamu, ni Akumo si pepenet wia sé domba itii.

Yohanes 10:9

Ni Akumo si pepenet. Séi uman si muntep kimiité ni Aku, ni sia én ipilot im witu un ukuman wana a singkéla'. Ni sia én tanu si domba si muntep wo mondol a makailek kakanen.

Yohanes 14:6

Kuan ni Yesus wia ni sia, “Ni Akumo si lalan i mangé wia si Opo Empung wo mapata'u ung kaulitan tumoro si Opo Empung wo si mahwéhé ung katou-touan makaz ing kauré-uré. Zéi'kan siapa zozo' in esa si mangé wia si Ama' sa zéi'kan mengiité ni Aku.

Yohanes 5:24

Uli-ulit ikua-Kuma wia ni kamu: Séi uman si timalinga u méikua-Ku wo ma'éman wia ni Sia si nimatumé ni Aku, si tou itii é makailek ung katou-touan makaz ing kauré-uré wo zéi'kan makailek un ukuman, pahpaan ni sia é méikapilotomé im witu um patéan wo niméramoma witu ung katou-touan.

Kisah Rasul-rasul 14:27

I méikaayola witi Antiokhia, tawahen néramé sé jamaat i maréwoké. An isirita nérala péléng am pinaayang ni Opo Empung mengiité ni séra. Ni séra kasii simiritala i si Opo Empung é nimukamoma u lalan wia sé tou zéi'kan Yahudi i ma'éman wia si Yesus.

Roma 11:20

Niitu én ulit téntu! Taan gena-genangen ang kenu, ni séra sé tanumokan um panga itii éng kinetora pahpaan ni séra én zéi'kan ma'éman, taan ni kamu in tou zéi'kan Yahudi toro nimaesa karia ung kai itii pahpaan i ma'éman. Niitumo, ni kamu én tia' mahlooz un tou niou, taan tawimo ni kamu i maindé'la.

Roma 12:12

Mahpaa-paazola im wana am pahéré'an, meze-ezen im wana am pengalin wo tia' mahkana' i mahmengaléi.

Roma 14:4

Séi ndéén ko wé taka-takazan ni ko mapahsasala' am pahwangunen ni pahayoan né tou walina? Si tuang ni pahayoan itii uman si mata'u sa sia ulit kaapa simala'. Taan ni sia é mamemangu-mangun an ulit pahpaan si Mahpiara é mahsawang ni sia.

Roma 15:13

Mengalé-ngaléi uman si Opo Empung, si mahwéhémé am pahéré'an é méhémé malake-lakez wia ni kamu u mahpaa-paaz wo ung kaluasan witu un até pahpaan ni kamu ma'éman wia ni Sia. Wo karia ung kawasa ni Roh Lenas, um pahéré'an niou é malake-lakez wia si Opo Empung.

Roma 2:7

Si Opo Empung é méhé ung katou-touan makaz ing kauré-uré wia sé tou sé zéi'kan mazéi' mahwangun am wangun i menéro u sisigi'an, u lolooz wo ung katou-touan un zéi'kan maléwo'.

Roma 3:23

Pahpaan péléng sé tou é simingkéla'mola wo zéi'mo wangun i makailek u lolooz wo sisigi'an ni Opo Empung.

Roma 5:5

Wo um pahéré'an én zéi'kan merara un até, pahpaan si Opo Empung timambéré si Roh Lenas wo kita toro mé'an u raraatéan ni Opo Empung.

Roma 8:1

Niitumo, in tarékan én zéi'mo siapa un ukuman wia sé menou-nou nimaesamo karia ni Kristus Yesus.

Roma 8:24

Witu um pahéré'an kenumo ni kita méipiloté im witu un ukuman wana a singkéla'. Taan sa um pahéré'anta itii ém pahilekenola, niitu én zéi'mo pahkuan pahéré'an. Pahpaan, kura kahuman kita mahéré' witu um pahilekentamola?

1 Korintus 15:1

In tarékan katuari-katuari, ipapagenangkuma sumaup u Nuwu' Lé'os tumoro si Yesus u mémoipahwoka'ku wia ni kamu. U Nuwu' Lé'os itii éng kinailekan niouo wo uli-ulit pa'émanen niou makaz in tarékan.

2 Korintus 3:18

Ni kita péléng sé ma'éman, zéi'mo siapa u nimapé' um pakahgena-genangta. Niitumo, ni kita én toro milek ung kawangko'an ni Mahpiara, ni kita én tanu u lélénoan u sumena'ma ung kawangko'an ni Mahpiara. Si Mahpiara sekezé é mahweru ung katou-touanta makaz ni kita kauréna éng kasena'na i mahsena'ma u sena' ni Mahpiara. Ni Sia si nimangun ni kita nimaténtu, ni Siamo si Roh Lenas.

2 Korintus 4:17

Pahpaan an zézéha rorak uman am pahpendanen nai in tarékan én zéi'kan mauréma wo niitu u nimangun ni kai in totoz pahloozen wo pahsigi'en makaz ing kauré-uré, niitu é lumouspé'mé an zézéha pinendan naimé.

Efesus 2:18

Pahpaan mengiité si Kristus, kita in tou Yahudi karia né tou zéi'kan Yahudi, winukaan lalan i rumété wia si Opo Empung si Ama' karia in tinulung ni Roh Lenas si esa uman.

Efesus 3:12

Pahpaan ni kita nimaesamo karia ni Kristus wo kita ma'émano wia ni Sia, niitumo ni kita ém wéwéhano lalan i rumété wia si Opo Empung wo zéi'mo maindé' i rumété wia ni Sia.

Efesus 6:13

Niitumo, pakapakéla ang karai pemamakén i makumoro' a méiwéhémé ni Opo Empung, wo kamu makawawa i mahsaru sé kakoro' in endo a léwo'an i mamuali, wo i simampetoma um pahkoro'an itii, ni kamu én enté'pé'.

2 Tesalonika 2:16

Mengalé-ngaléi uman si Yesus Kristus Mahpiarata wo si Opo Empung Ama'ta, si rimaraatémola ni kita wo nimenté'mola un atéta makaz ing kauré-uré wo nimangunola ni kita ezen i ma'ento' am wangun mengiité ung kamang tatambér-Na,

Ibrani 3:6

Taan si Kristus in Oki' ni Opo Empung é si mahwangun a méiatu ni Opo Empung im witu um walé-Na wo ni kitamo um walé-Na itii, sa kita zéi'kan mazéi' in totoz ma'éman wo niméré' uman un iwéhémé ni Opo Empung u mangun ni kita i mahpaa-paaz.

Ibrani 6:18

Si Opo Empung én zéi'kan mamuali in tumowo witu u méitaaz wo un tiwa'-Na. Un zua kenu én zéi'kan mamuali i mawalina, pahpaano niitu kita sé mekikelung wia ni Sia én toro maenté' wo totoz ma'éman witu um pahéré'anta.

1 Petrus 3:18

Pahpaan si Kristus kangkasii é nimaté makasa uman in ziméi' a singkéla'ta. Ni Sia si mahwangun an ulit é nimaté in timubus sé tou mahwangun an zéi'kan ulit, wo kita toro ipahwali-Na wia si Opo Empung. Ni Sia ém winunu' i ni Sia in tou uman, taan ni Sia é méitoumé sumaup ni Roh Lenas im wia sé nimaté.

Wahyu 21:11

Um wanua tua'na itii é mahsena'mé u sena' ni Opo Empung. U sena'na um wanua tua'na itii én tanumokan u sena'na um watu totoz wangun wo mahal, tanumokan um watu yaspis wo ung kalénona én tanumokan ung kaléno ung kristal.

Wahyu 21:23

Um wanua tua'na itii én zéi'kan memandung u sena' ni endo wo u sena' ni loloho'en i sumena' witu, pahpaan u sena' ni Opo Empung é mahsena'ma witu um wanua tua'na itii wo u solo um wanua tua'na itii é si Anak ni Domba.

Wahyu 21:3

An talingangkumé u nuwu' totoz rimez kimérété im witi rurumezan ni Kolano kimuamé, “Ilekena, um pahwéha-wéhan ni Opo Empung ém witumo un unez né tou wo ni Sia é mamento' mahwali-wali karia néra. Ni séra é maéndo tou-Na, wo ni Sia é menaté-natér ni séra wo maéndo Opo Empung néra.

Wahyu 3:21

Séi si nimuntung, énéang-Ku i marumumez karia-Ku witu u rurumezang-Ku ing Kolano, tanu ni Aku i nimuntungo wo rimumez mahwali-wali karia ni Ama'-Ku witu u rurumezan-Na ing Kolano.