Roma 2:10 - Taaz Weru Witu u Nunuwu'en Tombulu

¹⁰ Taan u lolooz, u sisigi'an wo ung kaluasan witu un até éng kailekan né memangu-mangun a lé'os, kumataréma wia sé tou Yahudi wo kasii sé tou zéi'kan Yahudi.

Roma 2:10 ပူးပေါင်းရင်းမြစ်များ

Matius 10:13

Sa kamu sungkulen nérala, ni séra é makailek ung kamang witu u sigi' niou. Taan sa kamu zéi'kan sungkulen nérala, ung kamang witu u sigi' niou é mawurimé sumaup wia ni kamu.

Lukas 1:79

i mésumena' wia sé tou sé menou-nou witu ung karimbengbengan, wo sé tou kinaindé'an. Ni Sia é mahkit ni kita, wo ni kita menou-nou karia ung kaluasan witu un até.”

Lukas 12:37

Mahpaa-paazla sé ata sé timégam i méileken ni tuang néra. Uli-ulit ikua-Kuma wia ni kamu, si tuang néra itii é mimek un touna, tawahennamé sé ata ing kuman wo ni sia si masumelewir sé atana.

Lukas 19:42

Kuan-Na, “O ndootuu Yerusalem, totoz wangun sa in endo kenu éng kata'uannu kura i makailek u mahlé'o-lé'osan! Taan in tarékan niitu é méikawunipé' witu um werenmu.

Lukas 22:14

I méikaayomola witu un orasna, si Yesus rimumez ing kuman mahwali-wali karia né aatu-Na.

Lukas 9:48

ang kuan-Na wia sé pahtuzu'en-Na, “Séi uman si simungkul si koki' tanu si kenu pahpaan ma'éman wia ni Aku, ni sia é simungkul ni Aku. Wo séi uman si simungkul ni Aku, ni sia é simungkul si Opo Empung si nimatumé ni Aku. Séi si zéi'kan ipahréké-rékén im wia ni kamu, ni siamo si totoz ipahpuu-puuna.”

Yohanes 12:26

Séi uman si mahpaayang wia ni Aku, ni sia é léwo'zéi' ing kumiit ni Aku wo wisa uman un angéang-Ku, ni sia é léwo'zéi' im witu. Séi uman si mahpaayang wia ni Aku, ni sia é masigi'en ni Ama'.

Yohanes 14:27

Ung kaluasan witu un até én itula'u-Kuma wia ni kamu. Ung kaluasan witu un até-Ku én iwéhé-Kuma wia ni kamu. Wo ung kaluasan witu un até u méiwéhé-Kuma itii én zéi'kan masuat karia ung kaluasan witu un até u méiwéhé né wia ung kaayahan wia ni kamu. Tia'mo un até niou masusa wo maindé'.

Yohanes 16:33

Péléng niitu méikua-Kuma wia ni kamu, wo un até niou maluasa pahpaan nimaesa karia-Ku. Im wia ung kaayahan kenu ni kamu é mendan an zézéha, taan enté-enté'en un até niou, ni Aku éng kimalamoma ang kawasa wia ung kaayahan.”

Kisah Rasul-rasul 10:35

Péléng sé tou, wisa uman un tahsasana wanua néra sé maindé' wia ni Sia wo mahwangun an ulit ém pahsungkulen-Na.

Roma 14:17

Pahpaan ung Kakolanoan ni Opo Empung én zéi'kan tumoro ang kakanen wo am pengengelepen, taan tumoro ung kaulitan, u mahlé'o-lé'osan wo u mahpaa-paaz wia si Roh Lenas.

Roma 15:13

Mengalé-ngaléi uman si Opo Empung, si mahwéhémé am pahéré'an é méhémé malake-lakez wia ni kamu u mahpaa-paaz wo ung kaluasan witu un até pahpaan ni kamu ma'éman wia ni Sia. Wo karia ung kawasa ni Roh Lenas, um pahéré'an niou é malake-lakez wia si Opo Empung.

Roma 2:7

Si Opo Empung é méhé ung katou-touan makaz ing kauré-uré wia sé tou sé zéi'kan mazéi' mahwangun am wangun i menéro u sisigi'an, u lolooz wo ung katou-touan un zéi'kan maléwo'.

Roma 2:9

Am pengalin wo an zézéha é matumoro si esa wo si esa wia sé tou memangu-mangun a léwo'an, kumataréma wia sé tou Yahudi wo kangkasii wia sé tou zéi'kan Yahudi.

Roma 5:1

Pahpaan um pa'émanenta, ni kita é niéndo ulit ni Opo Empung. Niitumo ni kita menou-nou witu u mahlé'o-lé'osan karia ni Opo Empung, mengiité si Mahpiarata, si Yesus Kristus.

Roma 8:6

Si tou mahgenang um paaz un awakna in esa é mahwali ni sia witu um patéan, taan si tou mahgenang ang kapaaz ni Roh ni Opo Empung é mahwali ni sia witu ung katou-touan wo ung kaluasan witu un até.

Roma 9:21

Si memamangun ung kuré' tana' é mangun ung kuré' tana' itii kiit um paazna. U sana réwok tana' pulut masuat én toro wangunen kuré' peperong wo kuré' pahpakén i mendo-endo.

Roma 9:23

Si Opo Empung kangkasii éng gimenang i mapailek ung kawangko'an-Na u malake-lakez, un iwéhé-Na wia ni kita sé kararaaté-Na. Ni kitamo sé méisanapa'-Na i makailek ung kawangko'an-Na.

Galatia 5:22

Taan sé tou mahkiit um paaz ni Roh Lenas é mahwangun ang kenu: rumaraaté, mahpaa-paaz, mahlé'o-lé'osan, ezen, lé'os uman, paaz mahsawang si kasuat tou, enté' witu um pa'émanen,

Galatia 5:6

Pahpaan sinunat kaapa zéi'kan sinunat é masuat uman im wia sé tou sé nimaesamo karia ni Kristus Yesus. Un totoz ipahpuu-puuna é ma'éman si Kristus Yesus un toro pa'ileken karia i rumaraaté sé tou walina.

Filipi 4:7

Sa kamu mengaléi tanu niitu, si Opo Empung é méhé ung kaluasan witu un até niou, ung kumelung un até wo ung genang niou, pahpaan nimaesa karia ni Kristus Yesus. Ung kaluasan witu un até u méiwéhémé ni Opo Empung itii, zéi'kan katulapan karia ung katulapan niou in tou uman, pahpaan niitu ém wia si Opo Empung in esa a méyé.

1 Timutius 1:17

U looz wo u sigi' wangko' makaz ing kauré-uré wia si Opo Empung laléi, si Kolano makaz ing kauré-uré, si zéi'kan pahileken wo si esa uman! Amin.

Ibrani 2:7

Winangun-Mu si tou im wawa'pé'mé oki' im wia sé malaekat, taan zéi'kan mauréma, wo im wia sé winangun-Mu walina ni sia én tanumokan sé kolano sé pahloozen wo pahsigi'en,

Yakobus 2:22

Ilekenola, um pa'émanen é léwo'zéi' in ipapailekla wana am pahlé'osen. Pahpaan wana am pahlé'osen itii um pa'émanen é malekep.

Yakobus 3:13

Sa wéwéhan si tou tulap wo lakez ang kata'uan im wia ni kamu, ni sia é léwo'zéi' i mapailekla ang katou-touan wangun wo am pahlé'osen wangun karia i roros até wo ung katulapan.

1 Petrus 1:7

Wana am pema'wa'en itiimo toro ikatuzu'mé sa ni kamu uli-ulit ma'éman wia ni Sia kaapa zéi'kan. Um pa'émanen niou itiipé' u mahal taan u mas un toro uman maléwo'. U mas é léwo'zéi' in tunumpé'la i mahtata'u sa niitu wangun kaapa zéi'kan. Um pa'émanen niou wia ni Sia é lumouspé'mé niitu, u léwo'zéi' im wa'wa'en wo niitu maenté'. Karia in téntu ni kamu é loozen wo sigi'en im witu un oras si Yesus Kristus i mawurimé sumaup.

1 Petrus 5:4

Wo i si Kristus si memimiara sé domba si totoz wangko' itii i mawurimé sumaup, ni kamu in tonaas né jamaat é makailek ung kukulu un totoz wangun un zéi'kan mahléwo-léwo'la.