Matius 26:55 - Taaz Weru Witu u Nunuwu'en Tombulu

⁵⁵ A si Yesus kumuala wia sé tou lakez itii, “Pahgenangen nioula ni Aku én tou léwo' taka-takazan ni kamu nimahalimé am pisou wo am wéwélwél i métumion ni Aku? Sekez in endo ni Aku é rimumez wo mahtuzu' witi lésaz um Walé ni Opo Empung, taan ni Aku zéi'kan pahtitionan niou.

Matius 26:55 ပူးပေါင်းရင်းမြစ်များ

Matius 21:23

A si Yesus muntepa witi lésaz um Walé ni Opo Empung. Karegas Sia mahtuzu' im witu, a méyé sé tonaas né walian wo sé pahtutu'an né tou Yahudi. Ni séra meligau wia ni Sia, “Wisa a méyé ung kawasa wia ni Ko i mahwangun péléng niitu? Séi si niméhé ung kawasa itii wia ni Ko?”

Matius 26:47

I si Yesus karegaspé' mahnuwu', méyé si Yudas si esaané im wia sé mapulu' wo zua pahtuzu'en-Na, nimahwalimé karia né sana réwok tou lakez sé mahali-ali am pisou wo am wéwélwél. Ni séra é méiatumé né tonaas né walian wo né pahtutu'an né tou Yahudi.

Markus 10:1

A si Yesus mangé witi tana' Yudea wo witi tana' leweta u so'so'an Yordan. Sé tou lakez kasii méyé rimimbung limiklik ni Sia. Wo tanu ung kanaramen, ni Sia é mahtuzu' ni séra.

Markus 12:35

I si Yesus karegas mahtuzu' witi lésaz um Walé ni Opo Empung, ni Sia éng kimua, “Kura sé tou tulap un Torat toro kumua i si Mesias é suzu ni Daud?

Lukas 19:47

Sekez in endo ni Sia é mahtuzu' witi lésaz um Walé ni Opo Empung. Sé tonaas né walian wo sé tou tulap un Torat karia né tou pahsigi-sigi'en né tou Yahudi itii é mahtututu' i munu' ni Sia,

Lukas 20:1

I sana endo, i si Yesus mahtuzu' sé tou lakez witi lésaz um Walé ni Opo Empung wo mahwoka' u Nuwu' Lé'os tumoro si Opo Empung, méyé sé tonaas né walian wo sé tou tulap un Torat karia né pahtutu'an né tou Yahudi.

Lukas 4:20

Ang gulungela sumaup ni Yesus um Pinantik Lenas itii, an iwéhéla sumaup wia si mahpaayang witu, a Sia rumumezla. Wo péléng sé tou witu makatengteng wia ni Sia.

Yohanes 7:14

Karegas i mahlé'os um pésta itii, si Yesus muntepa witi lésaz um Walé ni Opo Empung a mahtuzu' witu.

Yohanes 7:28

I si Yesus mahtuzu' witi lésaz um Walé ni Opo Empung, ni Sia mahkérét, “Niitu én ulit i ni Aku éng kata'uan niou wo kata'uan niou wisa ni Aku a méyé. Ni Aku im wia'i én zéi'kan pahpaan um paaz-Ku in esa, taan si Opo Empung si nimatumé ni aku. Ni Sia si nimatumé ni Aku én ulit wo ni kamu én zéi'kan mata'u ni Sia.

Yohanes 8:2

Masandonamé, woondopé' karengan ni Sia ém witimo lésaz um Walé ni Opo Empung wo lakez sé tou mahéyé wia ni Sia. Ni Sia rumumezla a mahtuzu' ni séra.

Yohanes 8:20

Péléng niitu é méikua ni Yesus i ni Sia mahtuzu' witi lésaz um Walé ni Opo Empung rété um penanahu'an an zoit raragés. Taan zéi'kan siapa zozo' in esa si timion ni Sia, pahpaan zéi'kampé' méikaayola witu un oras-Na.