Matius 16:27 - Taaz Weru Witu u Nunuwu'en Tombulu

²⁷ Pahpaan si Oki' ni Tou é méyé sumaup karia né malaekat-Na wo karia ung kawasa ni Ama'-Na. In toro niitu, ni Sia é maér wia si tou mengiit am pinahlé'osa ni esa wo ni esa.

Matius 16:27 ပူးပေါင်းရင်းမြစ်များ

Matius 13:41

Si Oki' ni Tou é matu sé malaekat-Na i maruméwok sé tou witi Kakolanoan-Na sé nimangun sé tou walina i mahsingkéla' wo péléng sé tou zéi'kan mahkiit um paaz ni Opo Empung.

Matius 13:49

Téntumo kangkasii u mamuali witu un endo kaakazan ung kaayahan. Sé malaekat é méyé wia ung ka- ayahan wo métumampas sé tou léwo' im wia sé tou niéndo ulit ni Opo Empung.

Matius 24:30

In toro niitu, sé tou é milek a mamuali witi langit un tumuzu'mé i si Oki' ni Tou é méyémo sumaup. Péléng sé tou wia ung kaayahan é mamé' wo ni séra é milek si Oki' ni Tou si witu um wawo u ninahak witi langit karia péléng ang kawasa wo ang kawangko'an-Na.

Matius 25:31

Ang kuan ni Yesus, “I si Oki' ni Tou méyé karia ung kawangko'an-Na wo péléng sé malaekat é méyé karia-Na, ni Sia é rumumez witu u rurumezan-Na ing Kolano um pahsigi'en wo pahloozen.

Matius 26:64

A si Yesus mingkotla, “Ni ko éng kimuamomé niitu, taan ikua-Kuma wia ni kamu, rengan in tarékan ni kamu é milek si Oki' ni Tou i rimumez witu ung kakan ni Totoz Mahkawasa wo méyé witu um wawo a ninahak witi langit.”

Matius 8:20

Ang kuan ni Yesus wia ni sia, “Sé longkoi ém wéwéhan an tuleng néra, sé tumétéwél ém wéwéhan a salah néra. Taan si Oki' ni Tou én zéi'kan siapa un toro rewaan-Na.”

Markus 14:62

A si Yesus mingkotla, “Ni Akumo Sia, wo ni kamu é milek si Oki' ni Tou i rimumez witu ung kakan ni Totoz Mahkawasa wo méyé witu um wawo a ninahak witi langit.”

Markus 8:38

Pahpaan im wia sé tou zéi'kan ma'éman wo mahsingkéla' kenu, séi uman si maizang makaulit i mahkii-kiit ni Aku wo pahpaan an ipahkua-Ku, si Oki' ni Tou kangkasii é maizang pahpaan si tou itii, i ni Sia méyé sumaup karia ung kawangko'an ni Ama'-Na kinariamé né malaekat lenas.”

Lukas 21:27

In toro niitumo péléng sé tou é mamilek si Oki' ni Tou si witu um wawo u ninahak méyé karia péléng ang kawasa wo ang kawangko'an-Na.

Lukas 22:69

Taan rengana in tarékan si Oki' ni Tou é marumumez witu ung kakan ni Opo Empung si Totoz Mahkawasa.”

Lukas 9:26

Pahpaan séi uman si maizang makaulit i mahkii-kiit ni Aku wo an ipahkua-Ku, si Oki' ni Tou kangkasii é maizang i makaulit i si tou itii é mahkii-kiit ni Aku wo an ipahtuzu'-Ku, i ni Sia méyé sumaup karia ung kawasa-Na wo ung kawasa ni Ama'-Na wo né malaekat lenas.

Yohanes 21:22

Ang kuan ni Yesus, “Sa sia kapaaz-Ku menou-nou makaz ni Aku i mawurimé sumaup, niitu én zéi'kan urusannu. Taan ni ko, kumiitomé ni Aku.”

Yohanes 21:23

An ikaserama im wia sé katuari sé mahkii-kiit si Yesus itii u sirita i si pahtuzu'en itii én zéi'kan maté. Taan si Yesus én zéi'kan kimuama wia si Petrus i si pahtuzu'en itii én zéi'kan maté. U méikua-Na, “Sa ni sia kapaaz-Ku menou-nou makaz ni Aku i mawurimé sumaup, niitu én zéi'kan urusannu.”

Kisah Rasul-rasul 1:11

Ang kuan né tou zua itii wia ni séra, “É kamu tou Galilea, kaa kamu meloho-loho'pé' witi langit? Si Yesus é mawénétoma nimangé witi kasendukan. Kuramo Sia i niilek nioua i mawénéta nimangé witi kasendukan téntu kangkasii Sia i mawurimé sumaup.”

Roma 14:12

Niitumo, ni kita péléng si esa wo si esa é mamingkot am peligauen ni Opo Empung tumoro am pinahwanguntamé.

Roma 2:6

Si esa wo si esa é makailek um wawaér ni Opo Empung mengiit am pinahwangunnamé.

1 Korintus 15:23

Péléng sé tou nimaté én itou sumaup ni Opo Empung mengiit un orasna. Si kataré-taré é si Kristus, pahpaan ni Sia én tanu um wua'na kataré im wana an tinanem. Tumondong niitu é sé tou ni Kristus, i ni Sia méyé sumaup wia ung kaayahan.

1 Korintus 3:13

Im witu un endo si Opo Empung in tumotoz ulit kaapa zéi'kan am pahwangunen né tou, ung kawangunan um pinaayang ni esa wo ni esa é maikatuzu'. Pahpaan un endo itii é méyé karia un api wo un api itii un tumuzu'mé um pinaayang ni esa wo ni esa im wangun kaapa zéi'kan.

1 Korintus 8:8

Ang kakanen én zéi'kan mahwangun ni kita ing kalelezna wia si Opo Empung. Ni kita ing kiman ang kakanen mémoiragés wia sé opo-opo, zéi'kan siapa u méikaawesé wia ni kita. Tentu kangkasii ni kita in zéi'kan kiman ang kakanen mémoiragés wia sé opo-opo, zéi'kan siapa u nimaina'mé wia ni kita.

2 Korintus 5:10

Pahpaan ni kita péléng é léwo'zéi' i maisaru witu u rurumezan ni Kristus ing Kolano i matotozen ulit kaapa zéi'kan, wo sé tou si esa wo si esa é makailek um wawaér mengiit am winangunna, niitu im wangun kaapa léwo'.

Efesus 6:8

Kata'uan niouo im péléng sé tou, sia in ata kaapa zéi'kan ata sa sia nimangun a lé'os é makailek um wawaér um wia si Mahpiara a méyé.

Kolose 3:25

Séi uman si mahwangun ang kasumalaan, ni sia é makailek um wawaér mengiit ung kasumalaanna itii, pahpaan si Mahpiara i méhé un ukuman én zéi'kan mahpélé-péléng.

1 Tesalonika 1:10

Ni séra kasii sé simirita tumoro kura kamu i ma'ento' si Yesus, si Oki' ni Opo Empung si witi kasendukan wo méyé, si méitoumé sumaup ni Opo Empung im wia sé nimaté, si milot ni kita sé ma'éman wia ni Sia im witu un upi' ni Opo Empung u méyé in tumondong.

1 Tesalonika 4:16

I méyé um perénta witi kasendukan, si tonaas né malaekat én totoz rimez i numuwu'ma wo um pontuang ni Opo Empung én zumanimé, a si Yesus Mahpiara tumumpamé im witi kasendukan wo sé tou ma'éman wia ni Sia sé nimatémo ém puuna in itou sumaup.

Yakobus 5:7

Pahpaano niitu, katuari-katuari, meze-ezenla makaz si Mahpiara i mawurimé sumaup. Si mahuma én ezen i ma'ento' am wua'na am wéwéhan torona im witu un umana. Ni sia kasii én ezen i ma'ento' un uzan in tumumpamé oras in tumanem wo un uzan in tumumpamé in oras i mahwua'.

1 Petrus 1:17

Pahtawahen niou si Opo Empung in Ama', ni Sia si zéi'kan mahtémbo-témbo i mahtotoz ulit kaapa zéi'kan mengiit am pinahwanguné né tou. Niitumo, ni kamu sé limepuh umané wia ung kaayahan kenu é léwo'zéi' mahsigi' ni Sia.

1 Yohanes 2:28

Niitumo in tarékan, é kamu sé oki'ku, ni kamu é léwo'zéi' i menou-nou nimaesa karia ni Kristus, wo sa Sia méyémo sumaup im witu un endo itii, ni kita én zéi'kan maindé' wo zéi'kan maizang wia ni Sia.

Yudas 1:14

Si Henokh, si suzu kapitu ni Adam éng kimua u méikuamé ni Opo Empung tumoro ni séra, kuana, “Un ulitna, si Opo Empung é méyé karia né mariwu-riwu tou linenas-Na.

Wahyu 1:7

Ilekena! Ni Sia é méyé witu um wawo a ninahak, wo péléng sé tou wia ung kaayahan é milek ni Sia. Téntu kangkasii sé im puuna nimetu ni Sia karia um wengkou é milek ni Sia. Péléng sé tou wia ung kaayahan é mamé' karia i mahkérét pahpaan ni Sia. Niana péléng é mamuali téntu. Éné, amin.

Wahyu 2:23

Péléng sé mahkii-kiit si wéwéné itii ém wunu'eng-Ku, wo toro kata'uala né jamaat i ni Aku é mata'u am pegena-genangen ni tou wo am witu un aténa. Ni Aku é maér wia sé tou mengiité am pinahwanguné ni esa wo ni esa.

Wahyu 20:12

Ilekengkuma sé tou nimatémo, ni séra é sé tou pahsigi-sigi'en wo sé tou kanaramen, rimendai witu u sinaru u rurumezan ni Kolano itii. In toro niitu, péléng ang kitap ém winukama, am pinantikan péléng am pinahwanguné né tou. Am wukan kasiima ung kitap walina, ung kitap katou-touan. Sé tou nimatémo ém pahtotozen ulit kaapa zéi'kan am pinahlé'os néramé mengiit a mémoipantik wana ang kitap itii.