Matius 10:28 - Taaz Weru Witu u Nunuwu'en Tombulu

²⁸ Ni kamu én tia' maindé' wia sé tou sé makawawa uman i munu' un awak niou, taan zéi'kan makawawa i munu' si roh niou. Taan maindé'la ni Sia si wéwéhan ung kawasa i munu' un awak wo si roh niou witi naraka.

Matius 10:28 ပူးပေါင်းရင်းမြစ်များ

Matius 10:26

Niitumo ni kamu én tia'mo maindé' wia ni séra, pahpaan zéi'kan siapa ang kineleuan an zéi'kan mawukaan wo zéi'kan siapa a méikawuni an zéi'kan makata'uan.

Matius 25:46

Sé tou kenu én iuntep witi tampa pahukuman makaz ing kauré-uré, taan sé tou ulit én iuntep witu ung katou-touan makaz ing kauré-uré.”

Matius 5:22

Taan in tarékan ni Aku éng kumuama wia ni kamu: Séi uman sé maupi' wia si katuarina, ni sia é léwo'zéi' in ukumen. Séi si mahsalou si katuarina, ni sia é léwo'zéi' in isaru wia sé Mahkama Agama. Wo séi si mahkua si katuarina i letup, ni sia é léwo'zéi' in ilombo' witu un api naraka zéi'kan mahpaté.

Yohanes 5:29

Wo ni séra é mondol im witu um woso linewengan ni séra. Sé tou nimangunomé a lé'os é matou sumaup i makailek ung katou-touan makaz ing kauré-uré, taan sé nimangunomé a léwo'an é matou sumaup i makailek un ukuman.

Kisah Rasul-rasul 21:13

Taan si Paulus nimingkot umané, “Kaa kamu mahamé', taka-takazan nimangun un atéku i rumara? Ni aku én zéi'kan uman paaz in apusen taan ni aku kangkasii ém paaz i maté witi Yerusalem pahpaan i mahwoka' u ngaran ni Yesus Mahpiara.”

Ibrani 10:31

Totoz makaindé'en sa kita ukumen ni Opo Empung si menou-nou.

Ibrani 11:35

Pahpaan i ma'éman, sé woopira wéwéné é nimakailek sumaup sé tou ikararaaté néra sé nimatémo pahpaan méitou sumaup ni Opo Empung im wia sé nimaté. Taan wéwéhan kasii sé pahpaan i ma'éman, nimazézéha makaz nimaté pahpaan ni séra soo ipilot sa totoz kumana' i ma'éman wia si Opo Empung. Wo in tumondong i ni séra itou sumaup ni Opo Empung é makailek ung katou-touan lumouspé'mé ung kawangunan ung katou-touan im puuna.

Yakobus 4:12

Si Opo Empung si mahkawasa i milot sé tou im witu un ukuman wana a singkéla' wo luméwo' sé tou, ni Sia uman si mahwangun an ukum wia sé tou wo si Mahtotoz sé tou. Taan, séi ndéén ko wé akaz ko paaz i mahtotoz si kasuat tou?

1 Petrus 3:14

Taan zozo' ni kamu i mendan an zézéha pahpaan i memangu-mangun an ulit, ni kamu é mahpaa-paazola. Tia'mo maindé' kaapa paharétan im wia sé mahzézéha ni kamu.

Wahyu 2:10

Tia'mo maindé' wana an zézéha a léwo'zéi' im pendanen niou. Gena-genangen! Pahpaan i ma'éman ni Aku, sé woopira im wia ni kamu én iuntep ni tonaas né sétang witi bui im pema'wa'en wo zézéhan witu, mapulu'na endo ung kauréna. Taan zozo'pé' in téntu, ni kamu én tia' mazéi' i ma'éman wia ni Aku makaz i maté, wo ni kamu ém wéhang-Ku ung katou-touan makaz ing kauré-uré. Niitu ung kukulu-Ku wia ni kamu.