Kolose 1:23 - Taaz Weru Witu u Nunuwu'en Tombulu

²³ Niitumo, ni kamu én tia'mo kumana' i ma'éman wo tia'mo mahzua-zua genang. Ni kamu én uli-ulit ma'émanla wo tia' ipahtutula'u um pahéré'an niou witu u Nuwu' Lé'os tumoro si Yesus, un tinalinga niouo itii. U Nuwu' Lé'os itii é méikawoka'mo wia ung kaayahan, wo ni aku, Paulus, si mahpaayang a méiatu ni Opo Empung i mapata'u u Nuwu' Lé'os tumoro si Yesus itii.

Kolose 1:23 ပူးပေါင်းရင်းမြစ်များ

Markus 16:15

Ang kuan-Na wia ni séra, “Mangémo wia péléng ung kaayahan, wo iwoka'la u Nuwu' Lé'os ni Opo Empung wia péléng sé tou.

Lukas 22:32

Taan ni Aku é nimengaléio ni ko wo um pa'émanennu zéi'kan mazéi'. Wo sa ko mawurimomé sumaup wia ni Aku, ni ko é léwo'zéi' i menté' um pa'émanen né katuarimu.”

Lukas 6:48

Ni sia é masuat wo si tou rimendai um walé. Ni sia éng kimiarla um woso rarem an izeta'nala witu am watu a mato'tolan i rumendai um walé. I lumewuhmé wo u séwélna un zano witi so'so'an tumoromé um walé itii, um walé itii én zéi'kan mogémé, pahpaan am watu to'tolan rinendaian um walé itii én enté'.

Yohanes 15:6

Séi uman si zéi'kan nimaesa karia-Ku, ni sia én tanu am panga pera a maitia' wo réwoken né tou wo ilombo' witu un api wo la'ungen.

Kisah Rasul-rasul 1:17

Im puuna si Yudas itii én esaané wia ni kita wo kapaayangta.”

Kisah Rasul-rasul 1:25

Si tou itiimo si masumawel um paayangen ni Yudas i maéndo aatu ni Yesus. Pahpaan si Yudas é nimatémo wo nimangémo witu un tampa um wangun im wia ni sia.”

Kisah Rasul-rasul 1:8

Taan si Roh Lenasokan si tumumpamé wia ni kamu wo ni kamu makailek ung kawasa. Tumondong niitu, ni kamu sé makumua um pina'ilek wo tinalinga niou tumoro ni Aku wo matumuzu' wia sé tou witi wanua tua'na Yerusalem, witi péléng an tana' Yudea wo Samaria makaz witi pondol ung kaayahan.”

Kisah Rasul-rasul 11:23

I si Barnabas méikaayomola witu, an ilekennala kura si Opo Empung in timambér ung kamang wia ni séra, ni sia én totoz mahpaa-paaz. A séra sésaanala in zéi'kan toro mazéi' i ma'éman wia si Yesus Mahpiara.

Kisah Rasul-rasul 14:22

Im witu, ni séra nimenté' un até né tou ma'éman wo mahsésa wia ni séra in tia' mazéi' i ma'éman wia si Yesus. Ni séra zua kasii mahkua i sé tou sé muntep witi Kakolanoan ni Opo Empung é léwo'zéi' i mendan an zézéha.

Kisah Rasul-rasul 2:5

In endo mahpésta itii, lakez sé tou Yahudi sé uli-ulit mahragés wia si Opo Empung, sé siméngkot wana péléng am wanua wia ung kaayahan é niméyé witi Yerusalem.

Kisah Rasul-rasul 20:24

Taan ni aku én zéi'kan mahwéhé genang witu ung katou-touangku kenu, asal uman um paayangen méiwéhé ni Yesus Mahpiara wia ni aku én toro ipakasampetku i mahwoka' u Nuwu' Lé'os tumoro si Yesus u méitambéré ni Opo Empung.

Kisah Rasul-rasul 26:16

Taan in tarékan, tumoozé wo rumendaiomé. Ni Aku é nimapailek un tou-Ku wia ni ko, in tumotoz ni ko maéndo tou si mahpaayang wia ni Aku wo si tou si mahkua tumoro péléng an niilekmu wo an tinalingamu wia ni Aku wo tumoro an ipapailek-Ku wia ni ko in tumondong.

Kisah Rasul-rasul 4:12

Akaz uman si Yesus si toro milot sé tou im witu un ukuman wana a singkéla', zéi'kan siapa ngaran walina. Pahpaan im wia ung kaayahan kenu, zéi'kan siapa ngaran walina si winéhan ni Opo Empung ung kawasa i milot sé tou im witu un ukuman wana a singkéla' néra.”

Roma 10:18

Taan ni aku é meligau: Apa sé tou Yahudi én uli-ulit zéi'kampé' timalinga u Nuwu' Lé'os tumoro si Yesus itii? Ni séra én timalingamo niitu. Pahpaan witu um Pinantik Lenas é méipantik in téntii, “Si nimahalimé an ipapata'u é nimapata'umoma wia péléng ung kaayahan, wo u méikua nérama én tinalingamoma makaz witi pondolna ung kaayahan.”

Roma 15:16

Ni Siamo si nimatumé ni aku i maéndo memamaayang ni Kristus Yesus i mangé wia sé tou zéi'kan Yahudi i mahwoka' u Nuwu' Lé'os ni Opo Empung. Um paayangengku én tanu sé walian i mengangali a raragés makaz sé tou zéi'kan Yahudi én toro sungkulen ni Opo Empung tanu a raragés a linenas ni Roh Lenas wia si Opo Empung.

Roma 2:7

Si Opo Empung é méhé ung katou-touan makaz ing kauré-uré wia sé tou sé zéi'kan mazéi' mahwangun am wangun i menéro u sisigi'an, u lolooz wo ung katou-touan un zéi'kan maléwo'.

Roma 5:5

Wo um pahéré'an én zéi'kan merara un até, pahpaan si Opo Empung timambéré si Roh Lenas wo kita toro mé'an u raraatéan ni Opo Empung.

1 Korintus 15:58

Niitumo, katuari-katuari ikararaatéku, rumendaila menté-enté', tia' mahzua-zua genang i ma'éman. Mahtututu'la i mahpaayang am paayangen méiwéhé ni Mahpiara wia ni kamu, pahpaan kata'uan niouo im witu u sinaru ni Mahpiara, zéi'kan siapa am pinaayang niou an zéi'kan siapa torona.

1 Korintus 3:5

Séi wé si Apolos? Séi wé si Paulus? Ni kai é méiatu uman ni Opo Empung i sumawang ni kamu wo toro ma'éman wia si Kristus. Ni kai é maayang uman a méiatu ni Opo Empung wia si esa wo si esa.

2 Korintus 10:1

Ni aku Paulus, si pahkuan niou in zéi'kan wuaya sa nimasaruan karia niou, taan wuaya uman im wana am pinantikku sa nimazou'an karia niou. Ni aku mahaléi wia ni kamu witu u ngaran ni Yesus Kristus si roros até wo lé'os uman.

2 Korintus 11:23

Ni séra é mahkua i ni séra én aatu ni Kristus? Ni aku é lumouspé'mé ni séra! (Ni aku i mahkua téntu én tanumo si tou pahléla'en). Ni aku i mahpaayang é lumouspé'mé um pakahpaayang néra. Ni akupé' si makalakez méiuntep bui taan ni séra. Ni akupé' si makalakez sinaluk taan ni séra. Ni aku makalakez én tawimo maté.

2 Korintus 3:6

Ni Sia si nimangun ni kai makawawa i maéndo tou maayang a méiatu-Na i mahwoka' um pinataazan weru wia sé tou. Um pinataazan weru itii ém pahpaayangen ni Roh Lenas. Um pinataazan weru itii én zéi'kan am pinantik witu ung kitap Torat. Pahpaan a méipantik witu ung kitap Torat é mahwali sé tou witu um patéan, taan si Roh Lenas é mahwali ni kita witu ung katou-touan.

2 Korintus 4:1

Pahpaan u raraatéan ni Opo Empung, ni kai én toro maéndo tou i maayang a méiatu-Na. Niitumo, makaz in tarékan ni kai én zéi'kan mazéi' i mahéré'.

2 Korintus 6:1

Ni kai éng kapaayang ni Opo Empung, niitumo ni kai sumésama wia ni kamu, tia' ung kamang méitambér ni Opo Empung ung kinailekan niouo én zéi'kan siapa torona.

Galatia 4:11

Ikaindé'ku én taa am pinaayangku wia ni kamu én zéi'kan siapa torona.

Galatia 5:5

Pahpaan um pa'émanenta wia si Yesus Kristus, niitumo si Roh Lenas é mahpaayang wia ni kita. Karia in téntu, ni kita é niméré' uman in éndon ulit witu u sinaru ni Opo Empung tanu um pengento-ngento'enta karia in ezen.

Galatia 5:7

Im puuna, im witu um pahlolowaan, ni kamu é nimahlolowaanola karia im wangun. Niitu én tanu ni kamu wanguno i mahkiit si Yesus. Séi wé si mahapé-apé' wia ni kamu akaz ni kamu zéi'mo mahkiit ung kaulitan?

Galatia 6:9

Tia' maseso' i mahwangun a lé'os, pahpaan sa kita zéi'kan maseso' mahwangun niitu, i méikaayomola witu un oras tinotoz ni Opo Empung, ni Sia é méhé am wangun wia ni kita. Niitu é masuat wo si timanem i mupu' u méitanemna.

Efesus 1:18

Ni aku kasii é mengaléi wia si Opo Empung, wo ung genang niou é mawuka wo toro makatulap um pahéré'an niou wia si Opo Empung si timawah ni kamu. Wo ni kamu kangkasii én toro mata'u kalakez ung kamang totoz wangun u niimeko ni Opo Empung wia sé tou linenas-Na,

Efesus 2:21

Ni Siamo si timu'tul péléng am wéténgna um walé itii maéndo walé Lenas ni Opo Empung.

Efesus 3:17

Pahpaan ni kamu ma'éman wia si Kristus, si Kristus é mento' witu un até niou wo u mahraa-raatéan é maéndo to'tolan wo kimawasa ung katou-touan niou.

Efesus 4:16

Sé jamaat én tanu un awak, ni Siamo si nimimek un awak akaz nimatu'tul wangun, wo un esa wo un esa ém pinasondol karia am wuku. Wo un esa wo un esa wéténgna un awak mahpaayang wangun mengiit um paayangenna, péléng un awak é matua'na wo malutu' wo maenté' pahpaan i mahraa-raatéan tanu ni kita in jamaat maenté' pahpaan i mahraa-raatéan.

Kolose 1:25

Ni aku é méiatumo ni Opo Empung i mahpaayang wia sé jamaat, mengiit um paayangen méiwéhé-Na wia ni aku ing kumua péléng a Nuwu'-Na wia ni kamu.

Kolose 2:7

Um pa'émanen niou é léwo'zéi' in enté' tanu un ahmut ung kai in timeptep witu un tana', menou-nou mahkiit uman ni Sia. Um pa'émanen niou kangkasii é léwo'zéi' ing kaenté'na tanu u mémoituzu' wia ni kamu, wo ni kamu kangkasii én tia' mazéi' i mahkua u makasé.

1 Tesalonika 3:3

Karia in téntu, ni kamu én zéi'kan mazéi' i ma'éman wia si Yesus zozo' in zézéha. Ni kamu in esa é mata'umo sa sé tou ma'éman wia si Yesus én tinotozo i mengali an zézéha itii.

1 Tesalonika 3:5

Pahpaano niitu, ni aku nimatuma si Timotius i mangé wia ni kamu, pahpaan ni aku én zéi'mo makaezen i mahtata'u um pa'émanen niou. Kaarétku én taa kamu nienouola ni tonaas né sétang makaz ni kamu zéi'mo ma'éman wia si Yesus. Sa mamuali téntu, am pinaayang nai im puuna én zéi'kan siapa torona.

1 Tesalonika 5:8

Taan ni kita sé menou-nou in endo é léwo'zéi' tuméga-tégam. Wangunela um pa'émanenta wia si Yesus wo u raraatéanta wia sé katuari esa pa'émanen maéndo tanu ung karai uaséi ing kimelung um wezwezta wo um pahéré'anta i ni kita én ipilot im witu un ukuman wana a singkéla', maéndo tanu um porong ing kumelung un ulu.

2 Tesalonika 2:16

Mengalé-ngaléi uman si Yesus Kristus Mahpiarata wo si Opo Empung Ama'ta, si rimaraatémola ni kita wo nimenté'mola un atéta makaz ing kauré-uré wo nimangunola ni kita ezen i ma'ento' am wangun mengiité ung kamang tatambér-Na,

1 Timutius 1:12

Ni aku kumua u makasé wia si Kristus Yesus Mahpiarata, pahpaan ni Sia si nimenté' ni aku i maayang wia ni Sia wo ni aku ém pahgenangen-Nala wangun i maayang um paayangen itii, wo ni Sia niméhé um paayangen wia ni aku i maayang wia ni Sia.

1 Timutius 2:7

Pahpaano niitu, ni aku tinotoz ni Opo Empung i maéndo aatu-Na i mahwoka' u Nuwu' Lé'os wo mahtuzu' wia sé tou zéi'kan Yahudi tumoro um pa'émanen wia si Yesus wo ung kaulitan. Peléng a méikuaku kenu én ulit! Ni aku én zéi'kan mahtowo.

1 Timutius 3:16

Totoz ulit an tutuzu' ulit ni Opo Empung é mémoipapailek-Na witu um pa'émanenta karia ung kawangko'an-Na: “Ni Sia é nimapailek un tou-Na tanu in tou uman, kinua in ulit ni Roh ni Opo Empung wo nimapailek un tou-Na wia sé malaekat. Tumoro ni Sia é méiwoka' wia péléng sé tahsasana wanua. Ni Sia ém pa'émanen im wia ung kaayahan wo winénéta mangé witi kasendukan karia u sigi' wo looz.”

Titus 3:7

Karia in téntu, ni kita in tou sé niéndo ulit pahpaan ung kamang méitambér-Na, toro makailek ung katou-touan makaz ing kauré-uré tanu um pengéré-ngéré'enta.

Ibrani 10:38

Taan si tou-Ku si ulit é menou-nou pahpaan ma'éman. Wo sa sia timula'umoma ni Aku, si tou itii én zéi'kan wangun wia ni Aku.”

Ibrani 3:14

Pahpaan ni kita é nimaesamo karia ni Kristus in tou-Na, niitumo tio-tionan um pa'émanen um wiamo ni kita rengané ing kataré-taré i ma'émanla si Yesus makaz ing kamurian.

Ibrani 3:6

Taan si Kristus in Oki' ni Opo Empung é si mahwangun a méiatu ni Opo Empung im witu um walé-Na wo ni kitamo um walé-Na itii, sa kita zéi'kan mazéi' in totoz ma'éman wo niméré' uman un iwéhémé ni Opo Empung u mangun ni kita i mahpaa-paaz.

Ibrani 4:14

Pahpaan kita in tarékan é makaanumo si Walian Totoz Wangko', si nimangémomé witi kasendukan, si Yesus, si Oki' ni Opo Empung, niitumo tio-tionan um pa'émanenta.

Ibrani 6:19

Si pahéré'anta é si Yesus. Ni Sia én tanumokan un jangkar enté' wo méikateptep, pahpaan ni Sia mahenté' um pa'émanenta. Si Yesus nimahpuunamoma i nimangé witu muri u roko' aapé' witi tampa lenas i rumété si Opo Empung in tumubus a singkéla'ta.

1 Petrus 1:3

Loozela si Opo Empung, si Ama' ni Yesus Kristus Mahpiarata. Pahpaan ung kawangko'an u raraatéan-Na makaz ni kita én toro nimakailek ung katou-touan weru mengiité si Yesus Kristus si méitoumé sumaup ni Opo Empung im wia sé nimaté. Niitu u mahenté' um pahéré'anta i menou-nou.

1 Petrus 1:5

Péléng niitu én iwéhé wia ni kamu sé penaté-natéren karia ung kawasa ni Opo Empung pahpaan ma'éman wia ni Sia. Ni Sia é menaté-natér ni kamu, akaz ni kamu ipilot im witu un ukuman wana a singkéla'. Niitu é niimek-Na wia ni kamu witu ung kaakazan ung kaayahan.

1 Yohanes 2:27

Taan ni kamu ém winéhano ni Yesus Kristus si Roh Lenas ing kumawasa wia ni kamu. Pahpaan si Roh Lenas wiapé' ni kamu, niitumo ni kamu én zéi'mo memandung sé tou walina in tumuzu' ni kamu. Pahpaan si Roh Lenas én timuzu'mo ni kamu tumoro péléng am péléng, wo péléng a méituzu'-Na itii én ulit, zéi'kan towo. Niitumo ni kamu sé im puuna én tinuzu'mo ni Roh Lenas é léwo'zéi' i menou-nou mahkiit um paaz ni Yesus Kristus.

Wahyu 2:10

Tia'mo maindé' wana an zézéha a léwo'zéi' im pendanen niou. Gena-genangen! Pahpaan i ma'éman ni Aku, sé woopira im wia ni kamu én iuntep ni tonaas né sétang witi bui im pema'wa'en wo zézéhan witu, mapulu'na endo ung kauréna. Taan zozo'pé' in téntu, ni kamu én tia' mazéi' i ma'éman wia ni Aku makaz i maté, wo ni kamu ém wéhang-Ku ung katou-touan makaz ing kauré-uré. Niitu ung kukulu-Ku wia ni kamu.