Kolose 1:15 - Taaz Weru Witu u Nunuwu'en Tombulu

¹⁵ Si Yesus Kristus én tumuzu'mé si Opo Empung si zéi'kan kailekan, ni Sia si kataré-taré wo ipahpuu-puuna im wia péléng sé winangun ni Opo Empung.

Kolose 1:15 ပူးပေါင်းရင်းမြစ်များ

Yohanes 1:1

Ing kataré-taré, puunala ung kaayahan im winangun, u Nuwu' ni Opo Empung ém wiamo. U Nuwu' ni Opo Empung é mengari-ngaria si Opo Empung wo ni Sia é si Opo Empung in esa.

Yohanes 1:14

U Nuwu' ni Opo Empung itii é nimaéndomo tou wo menou-nou im wia ni kita wo ni kita é nimileko ung kawangko'an-Na. Ung kawangko'an-Na itii éng kinailekan-Na pahpaan ni Sia én Oki' esa uman ni Opo Empung. Wo ni Sia én tumuzu'mé i si Opo Empung én ulit wo ni Sia mahtambéré ung kamang wia ni kita.

Yohanes 1:18

Zéi'kan siapa si tou nimahile-ilekola si Opo Empung, akaz uman si Oki'-Na si esa uman si nimileko si Opo Empung. Si Oki'-Na sekezé é mengari-ngaria si Ama' wo ni Siamo si mahtuzu'mé wia ni kita séi si Opo Empung.

Yohanes 14:9

Kuan ni Yesus wia ni sia, “Filipus, urémo ni Aku i memali-mali karia niou, kura kahuman ni ko zéi'kan mata'u ni Aku? Séi uman si nimileko ni Aku, ni sia é nimileko si Ama'. Kura kahuman ni ko mahkua, ituzu'mé si Ama' itii wia ni kai?

Yohanes 15:24

Sa ni Aku zéi'kan nimanguna a makakompo'en an zéi'kan winangunla né tou walina, tantumo ni séra én zéi'kan simingkéla'. Taan in tarékan, zozo' ni séra nimilekola niitu péléng, ni séra é mazi'zis ni Aku wo si Ama'-Ku.

Yohanes 3:16

Pahpaan si Opo Empung totoz rumaraaté péléng sé tou wia ung kaayahan kenu, niitumo ni Sia timambéré si Oki'-Na si esa uman, wo péléng sé tou ma'éman ni Sia zéi'kan maté, taan makailek ung katou-touan makaz ing kauré-uré.

Roma 8:29

Pahpaan péléng sé kata'uano ni Opo Empung rengané im puuna, ni séra én tinotoz-Namo rengané im puuna i maéndo tanu si Oki'-Na. Si Oki'-Na itii é maéndo Oki' tu'a im wia sé lakez mahtuari.

2 Korintus 4:4

Sé tou itii zéi'kan ma'éman pahpaan ung genang néra éng kinawasapé' ni tonaas né sétang si kimawasa wia ung kaayahan kenu. Niitumo, zéi'kan kailekan néra u sena' u Nuwu' Lé'os tumoro ung kawangko'an ni Kristus si totoz masuat wo si Opo Empung.

2 Korintus 4:6

Im puuna si Opo Empung éng kimua in téntii, “Im witu u rimbengbeng a mondolé un ayah!” In tarékan ni Sia kangkasii si nimangun un ayah-Na mahsena' witu un atéta wo toro kata'uantala ung kawangko'an-Na. Ung kawangko'an ni Opo Empung én toro ilekenta witu ung gio ni Yesus Kristus.

Filipi 2:6

Ung katou-touan ni Yesus é masuat karia ung katou-touan ni Opo Empung, taan zozo' in téntu, zéi'kan pahgenangen-Nala ung katou-touan-Na un tanu niitu in anu-Na in esa u léwo'zéi' in tio-tionan-Na,

Kolose 1:13

Ni Sia si nimilotomé ni kita im witu ung kawasa ni sétang si wana ang karimbengbengan wo ni Sia kangkasii nimahwali ni kita witi tampa sumena-sena', ung Kakolanoan ni Oki'-Na si ikararaaté-Na.

1 Timutius 1:17

U looz wo u sigi' wangko' makaz ing kauré-uré wia si Opo Empung laléi, si Kolano makaz ing kauré-uré, si zéi'kan pahileken wo si esa uman! Amin.

1 Timutius 6:16

Ni Sia uman si zéi'kan kinala um patéan, menou-nou witu un ayah un zéi'kan mata'u kalelezan. Zéi'kan siapa tou si nimileko ni Sia wo un ulitna én zéi'kan siapa si tou toro milek ni Sia. Péléng a sisigi'an wo ang kawasa ém wia ni Sia uman makaz ing kauré-uré. Amin.

Ibrani 1:3

Ni Siamo si mahsena'mé u sena' ni Opo Empung wo mengiité ni Sia kita toro milek si Opo Empung. Karia u Nuwu'-Na un totoz mahkawasa, si Yesus mahtéiz péléng am wia ung kaayahan. Kumawusa Sia i miloté sé tou im witu un ukuman wana a singkéla', ni Sia rimumez witu ung kakan ni Opo Empung si totoz wangko' witi tampa totoz rakék.

Ibrani 1:6

Wo kasii, i si Opo Empung nimatumé si Oki'-Na si wiamo puunala péléng am péléng im winangun, ni Sia éng kimua, “Péléng sé malaekat ni Opo Empung é léwo'zéi' i mongkot wo sumigi' wia ni Sia.”

Ibrani 11:27

Pahpaan i ma'éman, si Musa timula'uma un tana' Mesir. Ni sia i nimangé én zéi'kan maindé' un upi' ni kolano né Mesir taan pahpaan ni sia én tanu mahilekoma si Opo Empung si zéi'kan kailekan itii.

Wahyu 3:14

Ang kuan kasii ni Oki' ni Tou, “Ipantikmula wo iwéhéma wia si malaekat si wia sé jamaat witi Laodikia in téntii: ‘Kenumo a Nuwu' am wia Si Amin, Si toro pa'émanen wo ulit i mahkua ang kata'uan-Na tumoro u Nuwu' ni Opo Empung, wo péléng am winangun ni Opo Empung ém wia ni Sia a méyé.