Ibrani 9:11 - Taaz Weru Witu u Nunuwu'en Tombulu

¹¹ In tarékan si Kristus é niméyémo im Walian Wangko' si mahalimé péléng am wangun a méitaaz ni Opo Empung wia ni kita. Si Kristus im Walian Wangko' é mahpaayango witi Ténda ni Opo Empung un totoz wangko' wo zéi'kan siapa pahséro'an. Un Ténda itii én zéi'kan winangun né tou; ung kalakoana én zéi'kan wia ung kaayahan um winangun uman kenu a méyé.

Ibrani 9:11 ပူးပေါင်းရင်းမြစ်များ

Matius 11:3

An iatunama sé pahtuzu'enna i malumigau wia si Yesus in téntii, “Ama', apa ni Komo si méitaaz ni Opo Empung i méyé, kaapa wéwéhan tou walina si totoz in ento'en nai?”

Matius 2:6

‘Wo ni kamu in tou Betlehem witi tana' Yehuda, um wanua tua'na niou én zéi'kan ung kumori-kori' im wana am wanua tua'na witi Yehuda, pahpaan im wia ni kamu é méyé si maéndo tonaas, si matuméiz sé tou-Ku Israel.’ ”

Markus 14:58

“Tinalinga nai si tou kenu kimuala in téntii, ‘Ni Aku éng kumemu um Walé ni Opo Empung wo witu un teluna endo ni Aku é rumendai um Walé ni Opo Empung walina, un zéi'kan winangun né tou.’ ”

Yohanes 1:14

U Nuwu' ni Opo Empung itii é nimaéndomo tou wo menou-nou im wia ni kita wo ni kita é nimileko ung kawangko'an-Na. Ung kawangko'an-Na itii éng kinailekan-Na pahpaan ni Sia én Oki' esa uman ni Opo Empung. Wo ni Sia én tumuzu'mé i si Opo Empung én ulit wo ni Sia mahtambéré ung kamang wia ni kita.

Yohanes 4:25

Kuan ni wéwéné itii wia ni Sia, “Kata'uangku i si Mesias si pahkuan kasii Kristus é méyé, i ni Sia méyé é mémapata'u péléng am péléng wia ni kai.”

Kisah Rasul-rasul 7:48

Taan, si Opo Empung si Totoz Rakék én zéi'kan mahwitu-witu um walé um winangun né tou, tanu u méikua ni nabi in téntii,

2 Korintus 4:18

Pahpaano niitu, ni kai én zéi'kan mahwéhé genang wana am pahileken wia ung kaayahan kenu, pahpaan am wia ung kaayahan én zéi'kan makaz ing kauré-uré. Taan am pahwéhan nai genang an zéi'kan kailekan, am witi kasendukan a méyé u makaz ing kauré-uré.

2 Korintus 5:1

Ung kata'uan nai, un awakta im wia ung kaayahan é masuat uman wo un ténda pahento'anta u maléwo'. Si Opo Empung é méhé wia ni kita um walé witi kasendukan. Um walé itii ém winangun ni Opo Empung, zéi'kan maléwo' makaz ing kauré-uré, zéi'kan winangun ni tou.

Kolose 2:11

Pahpaan nimaesamo karia ni Kristus, ni kamu é sinunat. U sunat itii én zéi'kan u sunat um pahwangunen uman né tou, taan u sunat um pahwangunen ni Kristus, u nimangun ni kamu méipiloté im witu ung kawasa u lelo un awak u mahwangun ni kamu i mahsingkéla'.

Ibrani 10:1

A méipantik witu un ukum Torat én tanumokan um wangun u mahéyé taan zéi'kan totoz masuat karia un ulitna um wangun itii. Sa ikiit un ukum Torat, sekez in ta'un, sé tou paaz marumété wia si Opo Empung é léwo'zéi' i mahalima sé tatamun kinerizo in iragés, taan un ukum Torat itii én zéi'kan mamuali i mangun sé tou maéndo zéi'kan siapa pahséro'an.

Ibrani 12:27

Ung kukuan “Makasapé',” ung kalakoana péléng am winangun ni Opo Empung wia ung kaayahan én iéhzo' wo kemun, taan an zéi'kan nyéhzo' én ikatula'u.

Ibrani 13:14

Pahpaan im wia ung kaayahan kenu ni kita én zéi'kan siapa um wanua tua'na um pahento'an makaz ing kauré-uré, taan ni kita é mahpenéro um wanua tua'na ento'anta in tumondong witi kasendukan.

Ibrani 2:17

Niitumo, wana péléng am péléng ni Sia é léwo'zéi' i maéndo tou uman kasuat né katuari-Na wo ni Sia maéndo Walian Wangko' si totoz rumaraaté wo ni Sia mahwangun péléng a méiatu ni Opo Empung mengiit un ikapaaz-Na im wangunen, i meresi a singkéla' né tou wo séra mawurian sumaup karia ni Opo Empung.

Ibrani 3:1

Katuari-katuari sé linenas wo sé tinawahmo i maayang wia si Opo Empung. Wéhan nioula genang si Yesus si niéndo Aatu ni Opo Empung wo Walian Wangko', si pa'émanenta in ulit wo zéi'kan maindé' in ipahwoka'ta wia sé tou walina.

Ibrani 4:15

Pahpaan si Yesus, si Walian Wangko'ta én toro kangkasii mendan an zéi'kan enté'ta. Ni Sia ém pinema'wa'mo i ni Sia wia ung kaayahan tanu am pahpendanenta in tarékan, taan ni Sia én zéi'kan nimahwangunla a singkéla'.

Ibrani 7:1

Si Melkisedek éng kolano witi wanua tua'na Salem wo ni sia kangkasii é walian ni Opo Empung si Totoz Rakék. Ni siamo si simungkul wo niméhé ung kamang wia si Abraham i si Abraham nimawurimé ing kimoro' kimalamé sé kolano.

1 Yohanes 5:20

Kata'uanta kasii i si Oki' ni Opo Empung é niméyémo wo niméhémo ung katulapan wia ni kita. Karia in téntu, ni kita mata'u Si Ulit wo maesa karia Si Ulit pahpaan nimaesa karia si Oki'-Na, si Yesus Kristus. Ni Siamo si Opo Empung, si ulit wo si mahwéhémé ung katou-touan makaz ing kauré-uré.

2 Yohanes 1:7

Pahpaan im wia ung kaayahan é lakez sé tou mahlululu uman wo soo makaulit i si Yesus Kristus é niméyémo wia ung kaayahan in tou uman. Sé tou itiimo sé melulu, wo kakoro' ni Kristus.