Ibrani 7:11 - Taaz Weru Witu u Nunuwu'en Tombulu

¹¹ I si Opo Empung niméhé un ukum Torat wia sé tou Israel, ni Sia kangkasii é niméléng sé suzu ni Lewi i maéndo walian i mahkit sé tou Israel mangun un ukum Torat itii. Taan um pahpaayangen néra itii én zéi'kan nimangun sé tou i lekep witu u sinaru ni Opo Empung. Pahpaano niitu, léwo'zéi' wéwéhan si Walian Wangko' walina si zéi'kan suzu ni Harun taan si mengiit ung katou-touan wo um pakahpaayang ni Melkisedek.

Ibrani 7:11 ပူးပေါင်းရင်းမြစ်များ

Galatia 2:21

Ni aku én zéi'kan kumua soo im wana ang kamang méitambér ni Opo Empung. Pahpaan sa wéwéhan si tou niéndo ulit pahpaan mahkiit un ukum Torat, ung kalakoan si Kristus nimaté én zéi'kan siapa torona.

Galatia 4:3

Téntu kangkasii ni kita: Sa ung katou-touanta é mahasa-asarpé' sé koki', ni kita ém pahata-atampé' an tinotoz wia ung kaayahan kenu.

Galatia 4:9

In tarékan ni kamu é mata'umo si Opo Empung, lumouspé'mé niitu si Opo Empung é mata'umo ni kamu. Kaa kamu mawuri uman taré wana an tinotoz an zéi'kan enté' wo zéi'kan siapa apa in iwéhé wo nimayo kasii un tou niou im pahata-atan an tinotoz itii?

Ibrani 5:10

Ni Sia kangkasii én tinawah ni Opo Empung i maéndo Walian Wangko', mengiit ung katou-touan wo um pakahpaayang ni Melkisedek im puuna.

Ibrani 5:6

Witu u rérékénan walina kangkasii si Opo Empung éng kimua, “Ni Ko ém Walian makaz ing kauré-uré, mengiit ung katou-touan wo um pakahpaayang ni Melkisedek im puuna.”

Ibrani 6:20

Si Yesus si kataré-taré nimuntep witu un tampa itii wo nimuka u lalan wia ni kita wo toro muntep witu. Pahpaano niitu, ni Sia é nimaéndomo Walian Wangko' makaz ing kauré-uré mengiit ung katou-touan wo um pakahpaayang ni Melkisedek im puuna.

Ibrani 7:10

Pahpaan si Lewi én zéi'kampé' nimatoumé i si Melkisedek nimahilekané karia ni Abraham. Niitumo, toro kuan i si Lewi ém wiamo mengiité si Abraham pahpaan si Lewi é maéndo suzu ni Abraham.

Ibrani 7:12

Pahpaan sa si Walian Wangko' én zéi'kan wia sé suzu ni Lewi a méyé, tantumo un ukum Torat kangkasii é sawelan.

Ibrani 7:13

Si Walian Wangko' pahnuwu'entala kenu én zéi'kan wia sé suzu ni Lewi a méyé. Ni sia ém wia sé suzu né walina a méyé wo zéi'kan siapa im wia ni séra si winéhan um paayangen im witi pahtunuan a raragés.

Ibrani 7:15

Im witu um pahkuantala kenu én toro kaile-ilekanta wo kata'uanta, sa wéwéhan si maéndo Walian Wangko' weru, ni sia éng kasuat ni Melkisedek.

Ibrani 7:21

Taan si Opo Empung timotoz si Yesus Kristus i maéndo walian karia un tiwa'-Na, pahpaan si Opo Empung é nimuwu' wia ni Sia, “Si Opo Empung én timiwa'mo wo ung ginenang-Na én zéi'mo mawalina. ‘Ni Ko ém Walian makaz ing kauré-uré.’ ”

Ibrani 8:7

Pahpaan, sa um pinataazan kataré é lekepo, zéi'kan siapa torona i mangun um pinataazan kazua.

Ibrani 9:6

Téntu am witu un Ténda ni Opo Empung i niimek. Sekez in endo sé walian é muntepa witi tampa kataré um pahkuan Tampa Lenas, i mangun am paayangen néra i rumagés wia si Opo Empung.