Ibrani 4:11 - Taaz Weru Witu u Nunuwu'en Tombulu

¹¹ Niitumo, tawimo kita mahtututu'la i muntep witi tampa pahkanaan itii, wo zéi'kan siapa zozo' in esa si zéi'kan méikauntep witi tampa pahkanaan itii pahpaan mahkiit uman am pahwangunen né tou zéi'kan mahtali-talinga si Opo Empung.

Ibrani 4:11 ပူးပေါင်းရင်းမြစ်များ

Matius 11:12

Rengané si Yohanes i mawiamé makaz in tarékan, wéwéhan sé tou léwo' mahsaru wo mahkakawasa sé tou witi Kakolanoan ni Opo Empung.

Matius 7:13

Ang kuan kasii ni Yesus, “Muntepa kumiita witu um pepenet pesut, pahpaan um pepenet loang wo u lalan lempaz é mangé witi naraka, wo lakez sé tou mahuntep mahkiita witu.

Lukas 13:24

Am wingkotela ni Yesus, “Mahtututu'la i muntep kumiit um pepenet pesut itii! Pahpaan ikua-Kuma wia ni kamu, lakez sé tou mahuuntep kumiit um pepenet itii taan sé zéi'kan ikauntep.

Lukas 16:16

A méipantik witu un ukum Torat wo wana ang kitap né nabi ém pahpakémpé' makaz in oras ni Yohanes Menanarani i menou-nou. Rengané in toro niitu u Nuwu' Lé'os tumoro ung Kakolanoan ni Opo Empung én ipahwoka'mo wia sé tou wo péléng sé tou én totoz menutu' i maéndo tou witi Kakolanoan ni Opo Empung.

Yohanes 6:27

Ni kamu én tia'mo mahpaayang i menéro an tikohon rewek maapu wo toro uman mawuul, taan maayangla i menéro an tikohon zéi'kan mawuul, a mahwéhémé ung katou-touan makaz ing kauré-uré un iwéhé ni Oki' ni Tou wia ni kamu. Pahpaan ni Siamo si winéhan kawasa ni Opo Empung, si Ama'.”

Kisah Rasul-rasul 26:19

Pahpaano niitu, o kolano Agripa, ni aku én zéi'kan kawisa wo zéi'kan mahwangun a méiperéntamé ni Yesus mengiité um pina'ilekku.

Efesus 2:2

In toro niitu ni kamu é menou-nou mengiit ang kinanaram né tou wia ung kaayahan, ni kamu mahtali-talinga sé roh léwo' mahkawasa witi langit, ni séramo sé roh mahkawasa witu un até né tou zéi'kan mahtali-talinga si Opo Empung.

Efesus 5:6

Tia' kamu towoan né tou karia a nunuwu'en zéi'kan siapa torona, pahpaan an téntu é mangun uman si Opo Empung in totoz maupi' wia sé tou zéi'kan mahtali-talinga ni Sia.

Filipi 2:12

Katuari-katuari ikararaatéku, ni kamu sekezé é mahtali-talinga wia si Opo Empung. Pahwangunela niitu zéi'kan uman i ni aku mahwali-wali karia niou taan kasii i ni aku zéi'kan mahwali-wali karia niou. Ung katou-touan niou ém wangunela tanu ung katou-touan né tou sé méipiloto ni Opo Empung im witu un ukuman wana a singkéla'. Pahwangunela niitu karia i mahtali-talinga wo mahsigi' si Opo Empung.

Kolose 3:6

Péléng niitu é mahwangun uman si Opo Empung in totoz maupi' wia sé tou soo mahtali-talinga wia ni Sia.

Titus 1:16

Ni séra é mahkua i mata'u si Opo Empung, taan im wana am pemangu-mangunen néra, ni séra é mahkélong ni Sia. Sé tou itii én totoz makazi'zisen, zéi'kan mahtali-talinga wo zéi'mo makawawa i mangun am wangun.

Titus 3:3

Pahpaan im puuna ni kita kangkasii é menou-nou witu ung kalemouan: zéi'kan mahtali-talinga, méikalulu, nimaéndo ata wana a lelo léwo' un awak wo a makapaazen meléwo' un tou, menou-nou mahwangun a léwo'an wo téutéu, ikazi'zis né tou wo mahzizi'zisan.

Ibrani 3:12

Niitumo katuari-katuari, mile-ilek én taa im wia ni kamu ém wéwéhan zozo' in esa si makaaté u léwo'an wo soo ma'éman taka-takazan nimangun ni sia kimana' i mahtali-talinga wia si Opo Empung si menou-nou.

Ibrani 3:18

Séi ndéén wé sé méitiwa' ni Opo Empung in zéi'kan mahunte-untepla witi tampa u makanaan-Na? Zéi'kankuaa ni séra sé zéi'kan mahtali-talinga wia ni Sia?

Ibrani 4:6

Pahpaano niitu, mémoikatuzu'mé im wéwéhan sé woopira sé maikauntep witu un tampa makanaan itii. Taan wia sé nimaopota sé puuna timalinga u nuwu' makapaazen itii, zéi'kan nimuntep witu un tampa makanaan itii, pahpaan ni séra é soo mahtali-talinga wia si Opo Empung.

Ibrani 6:11

Taan un ikapaaz nai, ni kamu si esa wo si esa én uli-ulit i mahraa-raatéan makaz ni kamu ing kalekepala, wo am pengéré-ngéré'en niou é makailekan niou.

2 Petrus 2:6

Téntu kangkasii i si Opo Empung nimukum um wanua tua'na Sodom wo ung Gomora. Lina'ung-Na am wanua tua'na itii i mapagenang wia sé tou, u mamuali wia sé tou in tumondong sé zéi'kan pandung ni Sia.