Ibrani 3:6 - Taaz Weru Witu u Nunuwu'en Tombulu

⁶ Taan si Kristus in Oki' ni Opo Empung é si mahwangun a méiatu ni Opo Empung im witu um walé-Na wo ni kitamo um walé-Na itii, sa kita zéi'kan mazéi' in totoz ma'éman wo niméré' uman un iwéhémé ni Opo Empung u mangun ni kita i mahpaa-paaz.

Ibrani 3:6 ပူးပေါင်းရင်းမြစ်များ

Matius 10:22

Péléng sé tou é mazi'zis ni kamu pahpaan mahkiit ni Aku. Taan sé tou ezen makaz ing kamurian é makailek ung katou-touan makaz ing kauré-uré.

Matius 16:18

Wo ni Aku kangkasii éng kumuama wia ni ko: Ni ko ém Petrus, ung kalakoana ém watu. Witu um wawo um watu kenu ni Aku é rumendai sé jamaat-Ku, wo um patéan zéi'kan mata'u kumawasa niitu.

Matius 24:13

Taan sé tou ezen makaz ing kamurian é makailek ung katou-touan makaz ing kauré-uré.

Roma 11:22

Niitumo, wéhanla genang kura ung kalé'osan ni Opo Empung wo sa Sia mukum én zéi'kan mahléléong. Ni Sia é uli-ulit mukum sé tou Yahudi zéi'kan ma'éman, taan ni Sia é mangun a lé'os wia ni ko, asal uman ni ko én zéi'kan mazéi' i menou-nou im witu u lé'os-Na. Sa zéi'kan téntu, ni Sia kangkasii én tumia' ni ko.

Roma 12:12

Mahpaa-paazola im wana am pahéré'an, meze-ezen im wana am pengalin wo tia' mahkana' i mahmengaléi.

Roma 15:13

Mengalé-ngaléi uman si Opo Empung, si mahwéhémé am pahéré'an é méhémé malake-lakez wia ni kamu u mahpaa-paaz wo ung kaluasan witu un até pahpaan ni kamu ma'éman wia ni Sia. Wo karia ung kawasa ni Roh Lenas, um pahéré'an niou é malake-lakez wia si Opo Empung.

Roma 5:2

Ni kita sé ma'éman ém winéhan u lalan i mé'an ung kamang itambéré ni Opo Empung pahpaan si Yesus Kristus. Ung kamang kenu u nimangun ni kita menou-nou wo mahpaa-paaz pahpaan mahéré'la i makailek u sigi' wo looz ni Opo Empung.

1 Korintus 3:16

Zéi'kan kata'uan niou wé i ni kamu ém Walé ni Opo Empung wo si Roh ni Opo Empung é mahento' wia ni kamu.

1 Korintus 6:19

Totoz kata'uan niou sa un awak niou ém walé ni Roh Lenas, si mahento' wia ni kamu. Si Roh Lenas itii é méiwéhé ni Opo Empung wia ni kamu. Niitumo, un tou niou én zéi'mo anu niou, anumo ni Opo Empung.

2 Korintus 6:16

Apa u masuat um witu um Walé ni Opo Empung wo um witu um walé né opo-opo? Ni kita i ma'éman ém Walé ni Opo Empung. Niitu én tanu u méipantik witu um Pinantik Lenas, in téntii, “Ni Aku é mamento' karia néra, wo menou-nou karia néra, wo ni Aku é maéndo Opo Empung néra, wo ni séra é maéndo tou-Ku.

Galatia 6:10

Niitumo, im wéwéhampé' un oras wia ni kita, méyémo kita mangun a lé'os wia péléng sé tou, sé ipahpuu-puuna é sé katuarita esa pa'émanen.

Galatia 6:9

Tia' maseso' i mahwangun a lé'os, pahpaan sa kita zéi'kan maseso' mahwangun niitu, i méikaayomola witu un oras tinotoz ni Opo Empung, ni Sia é méhé am wangun wia ni kita. Niitu é masuat wo si timanem i mupu' u méitanemna.

Efesus 3:12

Pahpaan ni kita nimaesamo karia ni Kristus wo kita ma'émano wia ni Sia, niitumo ni kita ém wéwéhano lalan i rumété wia si Opo Empung wo zéi'mo maindé' i rumété wia ni Sia.

Kolose 1:23

Niitumo, ni kamu én tia'mo kumana' i ma'éman wo tia'mo mahzua-zua genang. Ni kamu én uli-ulit ma'émanla wo tia' ipahtutula'u um pahéré'an niou witu u Nuwu' Lé'os tumoro si Yesus, un tinalinga niouo itii. U Nuwu' Lé'os itii é méikawoka'mo wia ung kaayahan, wo ni aku, Paulus, si mahpaayang a méiatu ni Opo Empung i mapata'u u Nuwu' Lé'os tumoro si Yesus itii.

1 Tesalonika 5:16

Tia' kamu mazéi' i mahpaa-paaz.

2 Tesalonika 2:16

Mengalé-ngaléi uman si Yesus Kristus Mahpiarata wo si Opo Empung Ama'ta, si rimaraatémola ni kita wo nimenté'mola un atéta makaz ing kauré-uré wo nimangunola ni kita ezen i ma'ento' am wangun mengiité ung kamang tatambér-Na,

1 Timutius 3:15

wo zozo' ni aku ikauréma, kata'uannumo kura sé tou léwo'zéi' menou-nou i sana awu ni Opo Empung. Sé sana awu ni Opo Empung ém péléng sé jamaat sé anu ni Opo Empung si menou-nou. Sé jamaat kenumo sé nimaéndo to'tolan an tutuzu' ulit ni Opo Empung tanu an tombol wo an to'tolan u nimenté' um walé.

Ibrani 1:2

Taan in tarékan, im wana an endo kaakazan ung kaayahan kenu, ni Sia é nimuwu' wia ni kita mengiité si Oki'-Na, si tinotozo i maéndo makaanu péléng am péléng. Mengiité si Oki'-Na, si Opo Empung nimangun péléng am péléng.

Ibrani 10:19

Niitumo katuari-katuari, pahpaan un zaha' ni Yesus é méikasaroi in zuméi' a singkéla'ta, in tarékan ni kita én zéi'mo maindé' i muntep witi Tampa Totoz Lenas.

Ibrani 10:21

Si Yesus ém Walian Wangko'ta si maéndo tonaas witi Walé ni Opo Empung.

Ibrani 10:23

Méyémo kita enté' i mahéré' wo zéi'kan mahzua-zua genang witu um pa'émanenta wia si Yesus, pahpaan si Opo Empung én zéi'kan maliuz i mangun a méitaaz-Na.

Ibrani 10:35

Niitumo, tia'mo ipahtutula'u um pa'émanen niou pahpaan um wawaérna én totoz wangko'.

Ibrani 11:1

Um pa'émanen én téntii: totoz ing kata'uanta sa péléng am pahéré'anta wia si Opo Empung éng kailekanta, zozo' in zéi'kampé' pahilekentala taan totoz ing kata'uanta ni kita é lamakailek niitu.

Ibrani 3:14

Pahpaan ni kita é nimaesamo karia ni Kristus in tou-Na, niitumo tio-tionan um pa'émanen um wiamo ni kita rengané ing kataré-taré i ma'émanla si Yesus makaz ing kamurian.

Ibrani 4:11

Niitumo, tawimo kita mahtututu'la i muntep witi tampa pahkanaan itii, wo zéi'kan siapa zozo' in esa si zéi'kan méikauntep witi tampa pahkanaan itii pahpaan mahkiit uman am pahwangunen né tou zéi'kan mahtali-talinga si Opo Empung.

Ibrani 4:14

Pahpaan kita in tarékan é makaanumo si Walian Totoz Wangko', si nimangémomé witi kasendukan, si Yesus, si Oki' ni Opo Empung, niitumo tio-tionan um pa'émanenta.

Ibrani 4:16

Niitumo, tia'mo kita maindé' i rumété wia si Opo Empung si rimumez witu u rurumezan-Na ing Kolano. Pahpaan i ni kita mangé witu u sinaru-Na, si Opo Empung é rumaraaté ni kita, zéi'kan mengiit un zéi'kan enté' wia ni kita, taan mengiit ung kalé'osan-Na. Si Opo Empung én tumambéré ang kamang wo menté' ni kita, wo kita tulungen-Na witu un oras ni kita i mekitulung.

Ibrani 6:11

Taan un ikapaaz nai, ni kamu si esa wo si esa én uli-ulit i mahraa-raatéan makaz ni kamu ing kalekepala, wo am pengéré-ngéré'en niou é makailekan niou.

Ibrani 6:18

Si Opo Empung én zéi'kan mamuali in tumowo witu u méitaaz wo un tiwa'-Na. Un zua kenu én zéi'kan mamuali i mawalina, pahpaano niitu kita sé mekikelung wia ni Sia én toro maenté' wo totoz ma'éman witu um pahéré'anta.

Ibrani 7:19

Pahpaan karia i mahkiit un ukum Torat, zéi'kan siapa zozo' in esa si tou niéndo ulit. Taan in tarékan ni kita ém winéhan um pahéré'an u lumouspé'mé un uré, un toro mangun ni kita ing karéténa wia si Opo Empung.

1 Petrus 1:8

Zozo' ni Sia én zéi'kampé' pinahile-ilek nioula, taan ni Sia én ikararaaté niou. Wo maan in tarékan kasii ni Sia én zéi'kampé' pahileken niou, taan ni Sia ém pa'émanen niou. U mahpaa-paaz niou én zéi'kan kakuaan pahpaan niitu ém wangko'.

1 Petrus 2:5

Ni kamu é masuat wo um watu menou-nou u niéndo ni Opo Empung im wangunen Walé-Na Lenas. Karia in téntu ni kamu é nimaéndo walian linenas ni Opo Empung i mahali ung katou-touan in iragés wia si Opo Empung. Si Opo Empung ém paaz méndo a raragés niou pahpaan am winanguno ni Yesus Kristus wia ni kita.

1 Petrus 4:17

Pahpaan in tarékan én orasnamo si Opo Empung in tumotoz ulit kaapa zéi'kan am pahwangunen né tou, wo sé kataré-taré totozen-Na é sé tou-Na in esa. Sa Sia in tumotoz éng kumataréma wia ni kita in tou-Na, kura rékén u mamuali wia sé tou soo ma'éman u Nuwu' Lé'os ni Opo Empung?

Wahyu 2:18

Ang kuan kasii ni Oki' ni Tou, “Ipantikmu kasiila wo iwéhéma wia si malaekat si wia sé jamaat witi Tiatira in téntii: Kenumo a Nuwu' ni Oki' ni Opo Empung, si makaweren u mahsena' tanumokan u layasna un api wo un a'é-Na é meto-petot tanumokan petotna un tambaga méiluleng witu un api.

Wahyu 2:25

Taan am wiamo ni kamu én tio-tionan makaz ni Aku i mawurimé sumaup.

Wahyu 2:26

Séi si nimuntung wo mahwangun ang kapaaz-Ku makaz ni Aku i mawurimé sumaup ém wéhang-Ku ung kawasa i merénta péléng sé tahsasana wanua.

Wahyu 3:11

Zéi'mo uré ni Aku é méyémo! Tio-tionan am wiamo ni kamu, wo zéi'kan siapa sé méndo ung kukulu un tanumokan poporongen ni kolano u méiwéhé-Ku wia ni kamu.