Ibrani 2:10 - Taaz Weru Witu u Nunuwu'en Tombulu

¹⁰ Si Opo Empung si nimangun péléng am péléng ém wanguno i nimangun si Yesus zéi'kan siapa pahséro'an pahpaan ni Sia é nimazéhamo makaz i nimaté. Karia in téntu, si Yesus é nimaéndo memumuka lalan wo sé tou makailek ung katou-touan makaz ing kauré-uré. Téntu kangkasii, si Opo Empung é nimangun sé tou lakez maéndo oki'-Na taka-takazan pahloozen wo pahsigi'en tanu ni Sia si pahloozen wo pahsigi'en itii.

Ibrani 2:10 ပူးပေါင်းရင်းမြစ်များ

Lukas 13:32

A séra wingkotela ni Yesus, “Mangémo wo maikuala wia si longkoi itii, ‘Ni Aku moho sé sétang wo lumé'os sé saki in endo kenu wo i sando. Im witu un endo katelu am pahpaayangeng-Ku é maisampet-Ku.’

Lukas 2:14

“U sigi' wo u looz én iwéhé uman wia si Opo Empung si witi kaséndukan! Wo ung kaluasan witu un até wia sé tou wia ung kaayahan, sé mahwangun si Opo Empung mahpaa-paaz.”

Lukas 24:26

Totoz kata'uan nioula i si Mesias é léwo'zéi' mazézéhapé'la taré makailek u looz wo sigi'.”

Lukas 24:46

Kuan-Na wia ni séra, “Wéwéhan u méipantik téntii: Si Mesias én totoz mazézéha wo matou sumaup im wia sé nimaté witu un endo katelu.

Yohanes 11:52

Wo zéi'kan uman wia sé tahsasana wanua itii taan kangkasii i ruméwok wo mapaheesa sé oki' ni Opo Empung sé méikasera.

Yohanes 19:30

Makapé'anla un anggor esem itii, a si Yesus kumuama, “Simampetola.” A Sia tumuktukla an iayo-Nala ung katou-touan-Na.

Kisah Rasul-rasul 3:15

Ni Sia si mahwéhémé un uli-ulit katou-touan wia péléng sé tou ém winunu' niouola. Taan ni Sia é méitoumomé sumaup ni Opo Empung im wia sé nimatémo. Ni kaimo sé nimilek a nimamuali itii.

Kisah Rasul-rasul 5:31

Ni Sia si méirakék ni Opo Empung karia ung kawasa-Na é nimaéndo Memumuka lalan wo Memimilot sé tou im witu un ukuman wana a singkéla', wo sé tou Israel toro tumula'u a singkéla' néra wo makailek un ampungan.

Roma 11:36

Pahpaan péléng am péléng ém winangun-Na, wo wia ni Sia a méyé, wo wia ni Sia uman. U looz wo sigi' ém wia ni Sia uman makaz ing kauré-uré. Amin.

Roma 9:23

Si Opo Empung kangkasii éng gimenang i mapailek ung kawangko'an-Na u malake-lakez, un iwéhé-Na wia ni kita sé kararaaté-Na. Ni kitamo sé méisanapa'-Na i makailek ung kawangko'an-Na.

1 Korintus 2:7

Taan an ipahwoka' nai itii éng katulapan ni Opo Empung a méikawunipé' wo zéi'kampé' kata'uan. Ang katulapan ni Opo Empung itii é niimek-Namo puunala ung kaayahan kenu im winangun. Niitu ém winangun ni Opo Empung wo kita sigi'en wo loozen.

1 Korintus 8:6

taan im wia ni kita: si Opo Empung én esa uman, ni Siamo si Ama'ta. Ni Sia si nimangun péléng am péléng wo pahpaan ni Sia kita menou-nou. Si Mahpiara én esa uman, ni Sia é si Yesus Kristus. Pahpaano ni Sia am wangunen péléng am péléng, pahpaano ni Sia ni kita én toro menou-nou.

2 Korintus 3:18

Ni kita péléng sé ma'éman, zéi'mo siapa u nimapé' um pakahgena-genangta. Niitumo, ni kita én toro milek ung kawangko'an ni Mahpiara, ni kita én tanu u lélénoan u sumena'ma ung kawangko'an ni Mahpiara. Si Mahpiara sekezé é mahweru ung katou-touanta makaz ni kita kauréna éng kasena'na i mahsena'ma u sena' ni Mahpiara. Ni Sia si nimangun ni kita nimaténtu, ni Siamo si Roh Lenas.

2 Korintus 4:17

Pahpaan an zézéha rorak uman am pahpendanen nai in tarékan én zéi'kan mauréma wo niitu u nimangun ni kai in totoz pahloozen wo pahsigi'en makaz ing kauré-uré, niitu é lumouspé'mé an zézéha pinendan naimé.

2 Korintus 5:18

Péléng ang kenu ém winangun ni Opo Empung. Winangun-Na kita toro mawurian sumaup karia-Na witu um pinaayang ni Kristus. Ni kai kasii ém winéhan-Na um paayangen i mahwoka' u Nuwu' Lé'os tumoro si Yesus wia sé tou makaz séra ma'éman wo mawurian sumaup karia-Na.

2 Korintus 6:18

Wo ni Aku é maéndo Ama' niou, ni kamu é maéndo koki'-Ku tuama wo koki'-Ku wéwéné. Niitu u Nuwu' ni Mahpiara, ni Sia si kimawasa péléng am péléng.”

Galatia 3:26

Pahpaan ni kamu péléng én oki'mo ni Opo Empung mengiité um pa'émanen niou wia si Yesus Kristus.

Efesus 2:7

Si Opo Empung mangun niitu, wo in tumondong sé tou toro milek u raraatéan-Na un zéi'mo kakuaan wo u lé'os-Na wia ni kita pahpaan nimaesa karia ni Kristus Yesus.

Efesus 3:10

Wo mengiité sé jamaat, si Opo Empung in tarékan toro mapata'u ang ginenang-Na tumoro péléng ang katulapan-Na wia sé mahperénta wo sé mahkawasa witi kasendukan.

Kolose 3:4

Si Kristus si mahwéhémé ung katou-touan wia ni kita. I ni Sia méyé sumaup wia ung kaayahan, ni Sia ém pa'ileken péléng né tou, ni kamu kangkasii é mapa'ileken né tou wo makailek u sigi' wo u looz karia-Na.

2 Timutius 2:10

Niitumo, ni aku én ezen i nimasaan an zézéha pahpaan sé tou pinéléng ni Opo Empung, wo séra toro ipilot im witu un ukuman wana a singkéla' mengiité si Kristus Yesus, karia u sigi' wo looz makaz ing kauré-uré.

Ibrani 12:2

Mahweren umana wia si Yesus si mahtu'tul um pa'émanenta wo nimangun um pa'émanenta nimalekep. Ni Sia ezen i nimazézéha witu u salip wo zéi'kan pandungen-Na zozo' niitu makaizangen, ni Sia mahgenang umana u mahpaa-paaz u mapendanen-Na in tumondong. In tarékan ni Sia é rimumezo witu ung kakan u rurumezan ni Opo Empung ing Kolano.

Ibrani 6:20

Si Yesus si kataré-taré nimuntep witu un tampa itii wo nimuka u lalan wia ni kita wo toro muntep witu. Pahpaano niitu, ni Sia é nimaéndomo Walian Wangko' makaz ing kauré-uré mengiit ung katou-touan wo um pakahpaayang ni Melkisedek im puuna.

Ibrani 7:26

Niitumo, si Walian Wangko' téntu si pemandungenta. Pahpaan ni Sia é linenas ni Opo Empung, zéi'kan nimahsala-sala'la, zéi'kan siapa pahséro'an, méikatampas im wia sé tou simingkéla' wo ni Sia é nimakaileko un tampa totoz rakék wo pahsigi'en witi kasendukan.

Ibrani 7:28

Pahpaan wana un ukum Torat é méitotoz kura sé tou mahsingkéla' i maéndo Walian Wangko'. Taan un tiwa' méikua ni Opo Empung maapuma un ukum Torat itii i méiwéhé én timotoz si Oki'-Na i maéndo Walian Wangko', si zéi'kan siapa pahséro'an makaz ing kauré-uré.

1 Petrus 1:12

Sé nabi itii éng kinuaan sa am pahtata'un néra én zéi'kan méipapata'u in tumulung uman un tou néra in esa, taan in tumulung ni kamu. Sé nabi itii éng kinawasa ni Roh Lenas si witi kasendukan a méyé i mapata'u u Nuwu' Lé'os tumoro si Yesus wia ni kamu. A méipahtuzu' nérama itiimo ang kapaaz né malaekat im pahtata'un.

1 Petrus 5:1

Ni aku ém penatua tanu ni kamu wo ni aku éng kumuama a niilekku wo an tinalingaku tumoro an zézéha pinahpendané ni Kristus im puuna. Ni aku kangkasii é lamakailek wéténg im witu ung kawangko'an-Na i si Kristus mémapailek ung kawangko'an-Na. Niitumo ni aku é sumésama wia ni kamu:

1 Petrus 5:10

Si Opo Empung si mahtambéré ung kamang, si timawahmo ni kamu sé ma'éman si Kristus witu ung kawangko'an-Na makaz ing kauré-uré é mangun ung katou-touan niou ing kawangunna, menté' am pa'émanen niou, menté' an até niou, wo mangun um pa'émanen niou wia si Kristus zéi'kan mawalina, kumawusla kamu i mendana an zézéha zéi'kan mauréma.

Wahyu 4:11

“O Mahpiara wo Opo Empung nai. Ni Ko uman si wangun i makailek u lolooz wo sisigi'an wo ung kawasa. Pahpaan péléng am péléng ém winangun-Mu, wo pahpaan ing kapaaz-Mu, niana péléng ém winangun wo wia.”

Wahyu 7:9

Kumawusa niitu, ilekengkuma sé sana réwok tou totoz lakez sé zéi'mo karékénan. Ni séra ém wia péléng sé tahsasana wanua, tahsasana suzu, tahsasana réwok mahtuari, wo sé tahsasana nunuwu'en. Ni séra péléng é rimendai witu sinaru u rurumezan ni Kolano wo witu sinaru ni Anak ni Domba, kimarai ang karai tonton kulo', timion am pala'pa'na am palem.