Ibrani 10:25 - Taaz Weru Witu u Nunuwu'en Tombulu

²⁵ Tia' kita mahzou' im wana am pahréwokan mahwali-wali i mahragés wia si Opo Empung tanu ung kinanaram né tou walina, taan tawimo kita mahsésésaan am wangun pahpaan un endo si Yesus i mawurimé sumaup éng kaleleznamo.

Ibrani 10:25 ပူးပေါင်းရင်းမြစ်များ

Matius 10:15

Uli-ulit ikua-Kuma wia ni kamu: Im witu un endo si Opo Empung in tumotoz ulit kaapa zéi'kan am pahlé'osen né tou, un ukuman wia sé tou witipé' Sodom wo Gomora u rorak taan un ukuman wia sé tou witu um wanua tua'na itii.”

Matius 18:20

Pahpaan sa wéwéhan zua kaapa telu tou sé nimaréwok i mengaléi karia u ngaran-Ku, ni Aku kangkasii é memali-mali karia néra.”

Yohanes 12:48

Si tou soo ni Aku wo soo mahtalinga um pahkua-Ku ém wéwéhano si tumotoz ulit kaapa zéi'kan am pahwangunenna. A Nuwu' méipahkua-Ku, niitumo u matumotoz ulit kaapa zéi'kan um pahwangunenna im witu un endo kaakazan ung kaayahan.

Kisah Rasul-rasul 16:16

I sana endo, ni kai é nimangé sumaup witi walé pahpengaléian né tou Yahudi itii, ni kai nimasungkulan karia ni wéwéné pahata-atan. Si wéwéné itii éng kinawasa ni roh menénémbo makaz ni sia én toro kumua apa u mamuali in tumondong. Karia ni sia mahtémboma u mamuali wia sé tou mahéyéma wia ni sia, lakez an zoit pahkailekan né tuangna.

Kisah Rasul-rasul 2:1

Im witu un endo wangko' Pentakosta, péléng sé tou ma'éman wia si Yesus é nimaréwok witu um walé.

Kisah Rasul-rasul 2:42

Ni séra én uli-ulit mahtalinga an tutuzu' ipahtuzu' né aatu ni Yesus wo meréwo-réwok. Wo ni séra kasii sekezé é mahkan wo mahmengaléi mahwali-wali.

Kisah Rasul-rasul 20:7

In endo kataré witu un duminggu itii, i ni kai nimaréwok mahwali-wali i memété-météng u roti ing kanen, si Paulus é mahnuwu' wia sé katuari esa pa'émanen witu makaz im wengi uré. Pahpaan ni sia éng gimenang i mangémo i masandomé.

Roma 12:8

Sa un tatambér ni Opo Empung é mahenté' un até, wangunenola niitu in uli-ulit mahenté' un até né tou walina. Sa un tatambér ni Opo Empung é mahwéhé wia sé tou walina, wangunenola niitu karia i mahpaa-paaz. Sa un tatambér ni Opo Empung é maéndo tonaas, uli-ulit wangunela niitu. Sa un tatambér ni Opo Empung é rumaraaté sé tou walina, wangunela niitu karia i mahpaa-paaz.

1 Korintus 11:20

Wo sa kamu nimaréwok i mangun um perjamuan, ni kamu zéi'kan mangun niitu ing gumenang um patéan ni Yesus Mahpiara.

1 Korintus 14:23

Niitumo, sa péléng sé jamaat nimaréwok a si esa wo si esa mahnuwu' karia u nunuwu'en un akaz uman si Roh Lenas si mata'u, a muntepé si tou zéi'kan méikauntep wia sé jamaat wo si tou zéi'kampé' ma'éman wia si Mahpiara, tantu ni kamu éng kuan néra im pahléla'en.

1 Korintus 14:3

Taan sa si tou tinambéran u makawawa i mahkua wia sé tou a méikuamé ni Opo Empung wia ni sia, an ipahkuana wia sé tou é mahenté' um pa'émanen, mahsésa wo mahenté' un até néra.

1 Korintus 3:13

Im witu un endo si Opo Empung in tumotoz ulit kaapa zéi'kan am pahwangunen né tou, ung kawangunan um pinaayang ni esa wo ni esa é maikatuzu'. Pahpaan un endo itii é méyé karia un api wo un api itii un tumuzu'mé um pinaayang ni esa wo ni esa im wangun kaapa zéi'kan.

1 Korintus 5:4

Sa kamu nimaréwok, genangenola ung genangku é memali-mali karia niou karia ung kawasa ni Yesus Mahpiarata,

Filipi 4:5

Mahtututu'la wo ung kalé'osan un até niou éng kata'uana péléng né tou. Pahpaan un endo si Yesus Mahpiara i mawurimé sumaup éng kaleleznamo.

1 Tesalonika 4:18

Pahpaano niitu, ni kamu si esa wo sé walina é léwo'zéi' i maheenté'an un até karia an tutuzu' kenu.

1 Tesalonika 5:11

Pahpaano niitu, ni kamu si esa wo sé walina é léwo'zéi' mahsésésaala wo maheenté'ala un até, tanu am pahwangunen niou makaz in tarékan.

Ibrani 10:24

Méyémo kita mahwéha-wéhan genang wia si esa wo si esa, wo kita toro mahsawa-sawangan i rumaraaté sé kasuat tou wo mahwangun a lé'os.

Ibrani 10:37

Pahpaan witu um Pinantik Lenas é méipantik téntii, “Zéi'mo uré, si méyé itii é méyémo, ni Sia i méyé én zéi'kan ikaurémé.

Ibrani 13:22

Katuari-katuari, ni aku é sumésama wia ni kamu, zozo' um pinantikku kenu ém potot uman. Mengalé-ngaléi uman ni kamu é sumungkul um pinantik kenu karia i mahpaa-paaz.

Ibrani 3:13

Taan mahsésésaala si esa im wia sé walina sekez in endo, in toropé' taré kumua “endo kenu”, wo zozo' in esa im wia ni kamu én zéi'kan siapa si matampezéi' pahpaan tinowoan a singkéla'.

Yakobus 5:8

Ni kamu kasii é léwo'zéi' i mezenla wo menté'la un até, pahpaan si Mahpiara i mawurimé sumaup én zéi'mo uré.

1 Petrus 4:7

Ung kaakazan ung kaayahan é lelezokan. Niitumo, pahimikela ung katou-touan niou wo tuméga-tégam, wo kamu toro uli-ulit i mengaléi.

2 Petrus 3:11

Sa péléng niana é maapu tanu niitu, kura ung katou-touan niou? Tantumo, ni kamu i menou-nou é léwo'zéi' i lenas wo mahkiit uman ung kapaaz ni Opo Empung.

2 Petrus 3:14

Niitumo katuari-katuari ikararaatéku, karegas ni kamu i ma'ento' niana péléng i mamuali, ni kamu é léwo'zéi' mahtututu' i menou-nou totoz weresi wo zéi'kan siapa pahséro'an witu u sinaru ni Opo Empung, wo mahlé'o-lé'osan karia-Na.

2 Petrus 3:9

Si Mahpiara én zéi'kan mahuré-uré i mangun a méitaaz-Na, zozo' im wéwéhan sé tou mahkua ni Sia én tahlous uré. Taan ni Sia én ezen im wia ni kamu, pahpaan kasoo-Na zozo' in esa wéwéhan sé tou maikaléwo'. Kapaaz-Na péléng sé tou én tumula'ula a singkéla' wo mawuri sumaup i mahlé'os ang kapaaz-Na.

Yudas 1:19

Sé tou itii é mahkayo' wo mahkiit um paaz ung kaayahan wo menou-nou zéi'kan siapa si Roh Lenas.