Ibrani 1:14 - Taaz Weru Witu u Nunuwu'en Tombulu

¹⁴ Sa téntu, séi ndéén sé malaekat kenu wé? Ni séra é roh sé mahsawang si Opo Empung. Ni séra méiatu ni Opo Empung i mésumawang sé tou ma'éman sé méipilot im witu un ukuman wana a singkéla'.

Ibrani 1:14 ပူးပေါင်းရင်းမြစ်များ

Matius 1:20

Taan i si Yusuf megena-genangpé' niitu, a méyé si malaekat ni Opo Empung witu un ipina, ang kumuama, “Yusuf, suzu ni Daud, tia'mo ko maindé' i méndo si Maria maéndo mahayomu, pahpaan si koki' pahawa-awakenna ém wia si Roh Lenas a méyé.

Matius 13:41

Si Oki' ni Tou é matu sé malaekat-Na i maruméwok sé tou witi Kakolanoan-Na sé nimangun sé tou walina i mahsingkéla' wo péléng sé tou zéi'kan mahkiit um paaz ni Opo Empung.

Matius 18:10

“Gena-genangen! Tia' meroros si esaané im wia sé koki' kenu. Pahpaan ikua-Kuma wia ni kamu, wéwéhan sé malaekat mahtéiz ni séra sé witi kasendukan, sé mengile-ngilek uman ung gio ni Ama'-Ku. [

Matius 2:13

I sé tou tulap sé tototi'en timula'umomé un tampa itii, si malaekat ni Opo Empung nimapaipima wia si Yusuf, ang kumuama, “Tumoozomé, ipahwalima si Koki' itii karia ni ina'-Na wo tumingkasoma mangé witi Mesir. Mento'pé'la wana makaz ni Aku kumuama wia ni ko sa toromo mawurimé, pahpaan si Koki' itii ém pahpenéron ni Herodes im wunu'en.”

Matius 24:31

Ni Sia é matu sé malaekat-Na i mondola karia i simengoma um pontuang ung karimez un zanina zéi'mo kakuaan. Ni séra é ruméwok péléng sé tou pinéléng-Na im wana péléng saruan, sé witi penpen u langit kasaru makaz witi penpen u langit kasaru.”

Matius 25:34

Tumondong niitu, si Kolano éng kumua wia sé tou witu ung kakan-Na in téntii, ‘Méyémo, é kamu sé kinamango ni Ama'-Ku. Muntepomé witu ung Kakolanoan u niimeko wia ni kamu rengané ung kaayahan kenu im winangun.

Matius 4:11

A si Yesus itula'uma ni tonaas né sétang. An ilekena, sé malaekat niméyé i mahselewir ni Sia.

Markus 10:17

I si Yesus mahlampango, a méyé si tou mengara'mé i mémahilekan karia-Na, wo karia ing kimuruzla witu u saru-sarun-Na, si tou itii é meligau, “Méster lé'os, apa u léwo'zéi' wangunengku i makailek ung katou-touan makaz ing kauré-uré?”

Lukas 1:19

Ang kuan ni malaekat, “Ni aku kenu éng Gabriel, si sekezé ém witu u sinaru ni Opo Empung. Ni aku é méiatumé i mékumua u nuwu' lé'os kenu wia ni ko.

Lukas 1:23

I simampetomé un orasna nimaayangé witi Walé ni Opo Empung, a sia mawurima witi waléna.

Lukas 16:22

Matéma si tou zéi'kan siapa apa itii, a sia ipahwalima né malaekat maméirumez witu u rété ni Abraham. Si tou wa'ilan kangkasii é matéma, a sia mailewengé.

Lukas 2:13

Kumompo'mé si malaekat itii éng kinariamo né malaekat sé totoz lakez witi kasendukan sé mahlooz si Opo Empung, kuan néra,

Lukas 2:9

Kumompo'mé si malaekat ni Opo Empung mapaileka un touna witu u rété néra. Wo u sena' ni Opo Empung simena'ma wia ni séra, a séra totoz kinaindé'an.

Kisah Rasul-rasul 11:22

U sirita tumoro u nimamuali kenu éng kinatalingaana né jamaat witi Yerusalem. A sé jamaat itii matuma si Barnabas mangé witi Antiokhia.

Kisah Rasul-rasul 12:23

In toro niitukan a sia ukumela ni malaekat ni Opo Empung, pahpaan ni sia én zéi'kan mahsigi' si Opo Empung. Ni sia nimaté kinan né loloati.

Kisah Rasul-rasul 12:7

Kumompo'mé si malaekat ni Opo Empung é rimendaio witu u rété ni Petrus, wo u sena' é mahsena'mé im witu un untep um bui itii. A si Petrus sepé'ela ni malaekat i mongké ni sia ang kuana, “Mahrewekola in tumoozé!” A mawuswusa u ranté méiapus u lengen ni Petrus itii.

Kisah Rasul-rasul 13:2

I sana endo, i ni séra mahpuasa wo mahragés wia si Mahpiara, a si Roh Lenas numuwu'mé, “I sanapa'mé wia ni Aku si Barnabas wo si Saulus i maayang um papaayangen un tinotoz-Kumo in iwéhé wia ni séra zua.”

Kisah Rasul-rasul 16:26

Kumompo'mé é mahéhzo'mo totoz repet makaz an to'tolan um bui itii én ogémokan. In toro niitukan, péléng am pepenet é nimawukama wo a méiranté wia péléng sé binui é nimawukama.

Kisah Rasul-rasul 27:23

Pahpaan ing kawengi, si Opo Empung si pahongko-ongkotangku in tou anu-Na é nimatu si malaekat-Na mérimendai witu u rétéku.

Kisah Rasul-rasul 5:19

Taan im wengikan itii, si malaekat ni Opo Empung é niméyé a mukama am pepenet um bui, an iondolnamé séra im witu karia i mahkua,

Roma 11:14

Ni aku é mahéré'la sa am pahpaayangengku kenu én toro mangun sé kawanuaku in tuméutéu sé tahsasana wanua walina in ipilot witu un ukuman wana a singkéla', wo karia in téntu sé woopira im wia ni séra én toro sawangangku in ipiloté witu un ukuman wana a singkéla'.

Roma 13:6

Niitumo ni kamu léwo'zéi' i mahwaérla am pajak wia sé pemerénta. Pahpaan sé pemerénta é mahpaayang am paayangen méiwéhé ni Opo Empung wia ni séra.

Roma 15:16

Ni Siamo si nimatumé ni aku i maéndo memamaayang ni Kristus Yesus i mangé wia sé tou zéi'kan Yahudi i mahwoka' u Nuwu' Lé'os ni Opo Empung. Um paayangengku én tanu sé walian i mengangali a raragés makaz sé tou zéi'kan Yahudi én toro sungkulen ni Opo Empung tanu a raragés a linenas ni Roh Lenas wia si Opo Empung.

Roma 15:27

Karia i mahpaa-paaz ni séra timotozla i mangun un téntu. Taan pahilekengkula ni séra é léwo'zéi' sumawang sé tou zéi'kan siapa apa itii. Pahpaan, sa sé tou Yahudi é niméténgo wia sé tou zéi'kan Yahudi ung kamang in timalinga u Nuwu' Lé'os tumoro si Yesus, tantumo sé tou zéi'kan Yahudi sé ma'éman é léwo'zéi' i sumawang sé tou Yahudi karia i méhéla wia ni séra am pemandungen néra.

Roma 8:17

Sa ni kita én oki'-Na, ni kita kangkasii é maéndo tou makasangkum a méitaaz ni Opo Empung. Ni kita é makailek a sangkum itii karia ni Kristus. Niitu éng kailekanta sa ni kita mazéha karia-Na, wo ni kita kangkasii é loozen wo sigi'en karia-Na.

1 Korintus 1:21

Pahpaan maan ing kuramokan ung katulapan ni tou, ni sia én zéi'kan makawawa i mata'u si Opo Empung. Taan si Opo Empung én timotoz i miloté im witu um patéan, sé tou timalinga u Nuwu' Lé'os tumoro si Yesus u méipahwoka' nai a ma'éman wia ni Sia, zozo' sé tou wia ung kaayahan ém wéwéhan sé mahkua sa u Nuwu' Lé'os itii éng kalemouan.

2 Korintus 9:12

Pahpaan a sasawang niou in isawang sé tou ni Opo Empung sé zéi'kan siapa apa witi Yudea, zéi'kan uman i mahwuwutul am pemandungen néra, taan niitu kangkasii é mangun lakez sé tou mahkua u makasé wia si Opo Empung.

Galatia 3:29

Sa ni kamu én anu ni Kristus, ni kamu kangkasii é méikarékéno suzu ni Abraham wo ni kamu é makailek a méitaaz ni Opo Empung wia si Abraham.

Galatia 3:7

Niitumo, ileken nioula, péléng sé tou ma'éman si Opo Empung, ni séramo sé oki' ni Abraham.

Galatia 3:9

Niitumo, séi uman sé ma'éman si Opo Empung, ni séra kangkasii éng kamangen karia ni Abraham si ma'éman itii.

Efesus 3:6

Ung kenu u méikawunipé' itii: Péléng sé tou ma'éman u Nuwu' Lé'os tumoro si Kristus Yesus, ni séra in tou Yahudi kaapa zéi'kan tou Yahudi é makailek um wéwéténgan im wana a méitaaz ni Opo Empung wia sé tou-Na. Ni kita péléng é maéndo esa awak wo makailek u mémoitaaz ni Opo Empung wia sé nimaesa karia ni Kristus Yesus.

Filipi 2:17

Zozo' ni aku ém woo ukumen i maté wo un zaha'ku én isaroi witu um wawo né tatamun kineriz niou in iragés wia si Opo Empung, taan ni aku én zéi'kan mazéi' i mahpaa-paaz tumoro niitu wo ni aku kasii é mahpaa-paaz karia niou péléng.

Filipi 2:25

Si Epafroditus, si katuari esa pa'émanen, si méiatu nioué i mésumawang maayang kariaku im wana am pemandungengku, ni sia si pahgenangengkula wangun i mawurima sumaup wia ni kamu. Ni sia éng kapaayangku wo nimahtututu'momé i mahpaayang kariaku.

2 Tesalonika 1:7

Wo ni Sia é méhé ung kaenaan wia ni kamu sé mahpendan an zézéha wo kasii wia ni kai. Niitu é mamuali i si Yesus Mahpiara tumumpamé im witi kasendukan i mapailek un tou-Na karia né malaekat-Na sé mawuta-wuta ang kawasa wo karia un api melaya-layas.

Titus 3:7

Karia in téntu, ni kita in tou sé niéndo ulit pahpaan ung kamang méitambér-Na, toro makailek ung katou-touan makaz ing kauré-uré tanu um pengéré-ngéré'enta.

Ibrani 10:11

Sekez in endo péléng sé walian é mahpaayang am paayangen néra wo menau-naup mahkeriz sé tatamun sé masuat in iragés. Taan un ipahragés néra én zéi'kan mamuali in zuméi' a singkéla'.

Ibrani 2:3

kura kita in ikapilot sa kita zéi'kan mahwéhé genang witu un ipilot im witu un ukuman wana a singkéla' un totoz wangko' itii? Niitu ing kataré-taré é mémoipahwoka'ma ni Yesus Mahpiara, tumondong niitu, sé tou timalinga niitu in esa im wia si Yesus éng kimua wia ni kita i niitu én ulit.

Ibrani 5:9

Im pinakapendan-Namomé péléng am pengalin-Na, taré si Opo Empung mangun ni Sia zéi'kan siapa pahséro'an wo ni Sia uman si milot sé tou im witu un ukuman wana a singkéla' makaz ing kauré-uré wia sé tou mahtali-talinga ni Sia.

Ibrani 6:12

Kasoo nai ni kamu i maéndo tou sé soo kumura. Taan ikapaaz nai ni kamu menou-nou tanu sé tou nimakailek u méitaaz ni Opo Empung pahpaan ni séra é ma'éman ni Sia wo pahpaan ung kaezenan néra.

Ibrani 6:17

Niitumo, si Opo Empung én timiwa' i menté' un taaz-Na. Kapaaz-Na sé tou sé lamakailek un taaz-Na én uli-ulit mata'u i si Opo Empung é mangun a méitaaz-Na.

Ibrani 8:6

Taan in tarékan si Yesus ém winéhan um paayangen u lumouspé'mé um paayangen né walian wia ung kaayahan. Pahpaan ni Sia si nimahalimé um pinataazan niénéan ni Opo Empung u lumouspé'mé ung kawangunan um pinataazan méiwéhé wia si Musa im puuna.

Ibrani 9:28

Téntu kangkasii, si Kristus é makasa uman i mayo un tou-Na i maté zuméi' a singkéla' né tou. Tumondong niitu ni Sia i mawurimé sumaup, zéi'kan in zuméi' a singkéla' né tou taan i méhé ung katou-touan makaz ing kauré-uré wia sé ma'ento' ni Sia.

Yakobus 2:5

Katuari-katuari ikararaatéku! Talingana, zéi'kankuaa si Opo Empung é niméléng sé tou sé pahkuan né tou wia ung kaayahan kenu in tou zéi'kan siapa apa, i maéndo tou wa'ilan witu um pa'émanen, wo maéndo tou-Na witi Kakolanoan-Na, tanu u méitaaz-Na wia sé tou rumaraaté ni Sia?

1 Petrus 1:12

Sé nabi itii éng kinuaan sa am pahtata'un néra én zéi'kan méipapata'u in tumulung uman un tou néra in esa, taan in tumulung ni kamu. Sé nabi itii éng kinawasa ni Roh Lenas si witi kasendukan a méyé i mapata'u u Nuwu' Lé'os tumoro si Yesus wia ni kamu. A méipahtuzu' nérama itiimo ang kapaaz né malaekat im pahtata'un.

1 Petrus 1:4

Im witu um pahéré'anta itii, pa'émanenta i ni kita én toro makailek a sangkum. A sangkum itii éng kamang ni Opo Empung a méilé'os witi kasendukan an iwéhé wia ni kita. Ang kamang itii én zéi'kan maléwo', zéi'kan makilamu' wo zéi'kan maweles.

1 Petrus 3:7

Téntu kangkasii ni kamu in tuama makamahayo, ni kamu é léwo'zéi' i menou-nou karia im wangun wo si mahayo niou si esa wo si esa. Gena-genangen, ung ketez néra én zéi'kan masuat karia ung ketez niou. Pahsigi'ela séra pahpaan ni séra kasii nimakailek ung katou-touan u méitambéré ni Opo Empung. Pahwangunela niitu wo am pengaléien niou talingan ni Opo Empung.

Yudas 1:14

Si Henokh, si suzu kapitu ni Adam éng kimua u méikuamé ni Opo Empung tumoro ni séra, kuana, “Un ulitna, si Opo Empung é méyé karia né mariwu-riwu tou linenas-Na.

Wahyu 5:6

An ilekengkuma si Anak ni Domba si tanu ing kinerizo, rimendai witu un unez u rurumezan ni Kolano wo né epat tumou-tou, wo sé zuana pulu' wo epat pahtutu'an limiklik ni Sia. Ni Sia ém wéwéhan am pitu sungé wo am pitu weren: niitu é sé pitu Roh ni Opo Empung, sé méiatu-Na i méyé wia péléng ung kaayahan.