2 Timutius 4:7 - Taaz Weru Witu u Nunuwu'en Tombulu

⁷ Ni aku én uli-ulit simapetola um pahlolowaan karia im wangun wo méikaayomola witu un akazna. Ni aku kasii én zéi'kan mazéi' i ma'éman wia si Kristus Yesus makaz ing kamurian.

2 Timutius 4:7 ပူးပေါင်းရင်းမြစ်များ

Lukas 11:28

Taan kuan ni Yesus, “Si mahpaa-paaz é si tou mahtalinga wo mahwangun u Nuwu' ni Opo Empung.”

Lukas 8:15

A méikagogoma witu un tana' rembuz, ung kalakoana é sé tou timalingama u Nuwu' ni Opo Empung, totoz winéhan néra genang akaz nimahmut witu un até lé'os néra wo ni séra zéi'kan mazéi' i memangu-mangun u Nuwu' ni Opo Empung itii.”

Yohanes 17:6

Ni Aku é nimapata'umoma si Ama' wia sé tou wia ung kaayahan kenu sé méiwéhémo ni Ama' wia ni Aku. Ni séra én anu ni Ama' wo si Ama' é niméhémo ni séra wia ni Aku. Ni séra éng kimiito u nuwu' ni Ama'.

Yohanes 4:34

Kuan ni Yesus wia ni séra, “Ung kakaneneng-Ku é mahwangun um paaz-Na si nimatumé ni Aku wo sumampet um paayangen-Na.

Kisah Rasul-rasul 13:25

I si Yohanes mahsasampeto um paayangenna, ang kuana wia sé tou, ‘Kuan niou ni aku é séi? Ni aku én zéi'kan ni Sia si pengento-ngento'en niou. Un ulitna ni Sia i méyé én tumondongé ni aku. Maan i muka uman u sapatu-Na, ni aku én zéi'kan wangun.’

Kisah Rasul-rasul 20:24

Taan ni aku én zéi'kan mahwéhé genang witu ung katou-touangku kenu, asal uman um paayangen méiwéhé ni Yesus Mahpiara wia ni aku én toro ipakasampetku i mahwoka' u Nuwu' Lé'os tumoro si Yesus u méitambéré ni Opo Empung.

Galatia 2:2

Ni aku nimangé wana éng kumiit u méipapata'u ni Opo Empung. Im witu ni aku nimahilekané wo sé tonaas né jamaat wo ni kai én timampasla i simirita. Wia sé tonaas itii, ni aku é nimapata'u u Nuwu' Lé'os tumoro si Yesus u méipahwoka'kumé wia sé tou zéi'kan Yahudi. Karia in téntu, am pinaayangkumomé wo um pahpaayangengku in tarékan ém wéwéhan torona.

Filipi 1:30

Ni kamu é nimileko ni aku i nimazézéha rengan im puuna wo makaz in tarékan ni kamu é mahtalingapé'ma i ni aku é nimazézéhapé'. Ni aku é nimazézéha pahpaan i mahtututu' mahwoka' u Nuwu' Lé'os tumoro si Kristus. Téntu kangkasii, ni kamu é mahtututu' i mahwoka' u Nuwu' Lé'os tumoro si Kristus, niitumo ni kamu kangkasii é nimazézéha tanu an zézéha pahpendanengku.

1 Timutius 1:18

Oki'ku Timotius! Um paayangen kenu é méiwéhéku wia ni ko mengiité u méikua ni Opo Empung wia sé jamaat. Wo u méikuamé ni Opo Empung itii é mangun ni ko maenté' i maayang am paayangen wangun karia um pa'émanen wia si Yesus wo ung genang weresi.

1 Timutius 6:12

Mahtututu'la i menou-nou in tou ma'éman wia si Yesus wo makailek ung katou-touan makaz ing kauré-uré, tanumokan si tou mahlolowaan i makailek ung kukulu. Pahpaano niitu ni ko tinawah ni Opo Empung wo ko nimakaulitola witu u saru-sarun né tou lakez i ni ko é ma'éman si Yesus.

1 Timutius 6:20

Timotius, pahilekela lé'os péléng a mémoitarawésa wia ni ko. Tia' mahkii-kiit i mahsirita an zéi'kan siapa torona wo an zéi'kan mahsigi' si Opo Empung wo a mahzéi-zéi'an tumoro ang kata'uan,

2 Timutius 1:14

Wo karia u sasawang ni Roh Lenas si menou-nou witu un atéta, téi-téizan a sangkum totoz wangun a mémoiwéhé wia ni ko.

2 Timutius 3:10

Taan ni ko éng kimiitola an tutuzu'ku, kura um pahwangunengku, wo um paayongku, um pa'émanengku, ung kaezenangku, u raraatéangku wo kura aku mahtututu' i mahpaayang zozo' in zézéha.

Wahyu 3:10

Pahpaan ni kamu én zéi'kan mazéi' i mahkiit a nuwu'-Ku in ezen ma'ento' ni Aku, niitumo, ni kamu éng kelungang-Ku im wana am pema'wa'en a mamuali wia péléng ung kaayahan i méma'wa' sé tou memia-mia ung kaayahan.

Wahyu 3:8

Kata'uang-Ku péléng am pahpaayangen niou. Ilekena, ni Aku é nimukamoma um pepenet wia ni kamu, wo zéi'kan siapa zozo' in esa si toro menet niitu. Kata'uang-Ku i ni kamu én zéi'kan tahlos enté'. Taan zozo' in téntu, ni kamu é mahkiit a nuwu'-Ku wo zéi'kan kawisa mahkua in zéi'kan ma'éman ni Aku.

Wahyu 6:11

Péléng sé roh itii é nimakailek tata'saan ung karai tonton kulo'. Wo wia ni séra éng kuaan ing kumana'pé'la oki' makaz ung kalakez né kapaayang wo né katuari esa pa'émanen néra, sé winunu' tanu ni séra malekep.