2 Timutius 1:8 - Taaz Weru Witu u Nunuwu'en Tombulu

⁸ Niitumo, tia'mo maizang i mahkua an tinalinga wo niilekmu tumoro si Mahpiarata. Téntu kangkasii, tia'mo maizang tumoro ni aku im binui pahpaan ni Sia. Taantaré, karia ung ketez méiwéhémé ni Opo Empung, ni ko kangkasii é mazézéhala pahpaan mahkua u Nuwu' Lé'os tumoro ni Sia.

2 Timutius 1:8 ပူးပေါင်းရင်းမြစ်များ

Markus 8:38

Pahpaan im wia sé tou zéi'kan ma'éman wo mahsingkéla' kenu, séi uman si maizang makaulit i mahkii-kiit ni Aku wo pahpaan an ipahkua-Ku, si Oki' ni Tou kangkasii é maizang pahpaan si tou itii, i ni Sia méyé sumaup karia ung kawangko'an ni Ama'-Na kinariamé né malaekat lenas.”

Lukas 9:26

Pahpaan séi uman si maizang makaulit i mahkii-kiit ni Aku wo an ipahkua-Ku, si Oki' ni Tou kangkasii é maizang i makaulit i si tou itii é mahkii-kiit ni Aku wo an ipahtuzu'-Ku, i ni Sia méyé sumaup karia ung kawasa-Na wo ung kawasa ni Ama'-Na wo né malaekat lenas.

Yohanes 15:27

Taan ni kamu kangkasii é léwo'zéi' ing kumua a niilek niou tumoro ni Aku, pahpaan ni kamu é nimemali-malimola karia-Ku rengané ing kataré-taré.”

Yohanes 19:35

Si tou nimilek in esa u nimamuali itii, ni sia in esa si mahkua tumoro an niilekna itii wo un ipahkuana én ulit. Wo kata'uana un ipahkuana én ulit, wo ni kamu kangkasii é ma'éman.

Kisah Rasul-rasul 5:41

Sé aatu ni Yesus itii mondolé im witu um pahtotozan né Mahkamah Agama karia i mahpaa-paaz, pahpaan ni séra é mahgenangla wangun mazézéha im pahséro'an pahpaan u Ngaran ni Yesus.

Roma 1:16

Ni aku én zéi'kan maizang i mahwoka' u Nuwu' Lé'os tumoro si Yesus, pahpaan u Nuwu' Lé'os itii éng kawasa ni Opo Empung i milot péléng sé tou sé ma'éman im witu un ukuman wana a singkéla', kataré-taré é sé tou Yahudi wo kasii sé tou zéi'kan Yahudi.

Roma 16:25

U sigi' wo looz wia si Opo Empung! Ni Sia ém wéwéhan kawasa i menté' um pa'émanen niou mengiit u Nuwu' Lé'os tumoro si Yesus Kristus u méipahwoka'ku mengiit u méipapailek ni Opo Empung, u rengan ing kataré-taré méikawuni im wia sé tou.

Roma 8:36

Tanu u méipantik witu um Pinantik Lenas, “Pahpaan ni Ko, sekez in endo ni kai makalakez nimasaruan karia um patéan. Ni kai én tanumokan sé domba sé mamokerizen.”

Roma 9:33

tanu u méipantik witu um Pinantik Lenas: “Talingana ang kenu. Im witi kentur Sion, ni Aku én zimeta'momé um watu pahkasangkilan né tou, um watu tua'na um pahkazemakan néra, taan sé ma'éman wia ni Sia én zéi'kan papaiza-izang.”

1 Korintus 1:6

Niitu un tumuzu'mé a méipahwoka'ku wia ni kamu tumoro si Kristus én totozo kata'uan niou.

2 Korintus 6:7

Ni kai é mahtuzu' uman an ulit karia ung kawasa ni Opo Empung. Un ulit pahwangunen nai niitu masuat wo u nimaéndo ipahkoro' i mahsaru sé tou kaapa ing kumelung un tou nai.

Efesus 3:1

Pahpaano niitu, ni aku Paulus ém binui pahpaan mahwoka' u Nuwu' Lé'os tumoro si Kristus Yesus wo ung kawangunan niou in tou zéi'kan Yahudi.

Efesus 3:13

Niitumo, pahaléiengku wia ni kamu in tia' ni kamu zéi'mo siapa pahéré'an in timalingama ni aku nimazéha pahpaan mahwoka' u Nuwu' Lé'os tumoro si Yesus wia ni kamu. Pahpaan an zézéha pinendankumé itii é mangun ni kamu toro mahloo-looz karia ni Yesus Kristus.

Efesus 4:1

Niitumo, ni aku, si binui pahpaan mahwangun a méiatu ni Mahpiara, mahaléi wia ni kamu, wo ni kamu in tou tinawahmo i ma'éman wia si Opo Empung é menou-noula mengiit ung kapaaz ni Opo Empung tanu in taré ma'émanla wia ni Sia.

Efesus 4:17

Pahpaano niitu, ni aku kumuama wo sumésama wia ni kamu karia ung kawasa ni Mahpiara: Tia'mo kamu menou-nou tanu sé tou zéi'kan mata'u si Opo Empung sé megena-genang uman an zéi'kan siapa torona.

Filipi 1:7

Ni aku é mapaayo u makasé wia si Opo Empung pahpaan ni kamu ém witu un atéku. Ni aku é nimakailek ung kamang méitambér ni Opo Empung zozo' in tarékan ni aku ém binuipé'. Ni aku kangkasii é nimakailek ung kamang méitambér ni Opo Empung i mahtuzu' sa u Nuwu' Lé'os tumoro si Yesus én ulit, wia sé tou sé mahkua niitu in zéi'kan ulit, wo kasii i mangun ni séra in uli-ulit ma'éman. Ni kamu kangkasii é nimakailek ung kamang méitambér ni Opo Empung tanu ung kinailekangkumé.

Filipi 3:10

Un totoz kapaazku é mata'u si Yesus Kristus wo kasii totoz im paaz i mata'u ung kawasa un timou sumaup ni Sia im wia sé nimaté. Ni aku kangkasii é nimimeko un touku i mazézéha, tanu ni Sia i nimazézéha, wo nimimeko un touku i maté, tanu ni Sia i nimayo un touna i nimaté.

Filipi 4:13

Péléng am péléng én toro pengalingku pahpaan si Yesus Kristus si mahwéhémé ung ketez wia ni aku.

Kolose 1:11

Ni kai kasii mengaléi, wo ung kawasa-Na un totoz wangko' é mangun un até niou i maenté', taka-takazan maan ing kuramokan ung kalakez an zézéha pahsarun niou, ni kamu én zéi'kan mazéi' i ma'éman wo totoz uman ezen i mengali niitu,

Kolose 1:24

In tarékan, ni aku é mahpaa-paaz i nimazéha pahpaan nimapata'u u Nuwu' Lé'os tumoro si Yesus wia ni kamu wo pahpaan mahpaayang wia si Kristus i lumekep un zéha-Na wia sé jamaat sé tanumokan un awak-Na.

1 Tesalonika 3:4

Pahpaan, i ni kai memali-malipé' karia niou, mémoipahkua naila wia ni kamu, i ni kita é mazézéha. In tarékan, tanu ung kata'uan niouo i niitu én uli-ulit nimamualimo.

1 Timutius 2:6

Ni Sia niméhémo un tou-Na in tumubus péléng sé tou. Niitu un tumuzu'mé un endo tinotoz ni Opo Empung.

2 Timutius 1:10

In tarékan si Opo Empung nimapailekomé niitu karia i niméhémé si Kristus Yesus si nimilot sé tou im witu un ukuman wana a singkéla'. Ni Sia éng kimalamoma ung kawasa um patéan wo niméhémé ung katou-touan makaz ing kauré-uré wia ni kita mengiité u Nuwu' Lé'os itii.

2 Timutius 1:12

Pahpaano niitu, ni aku mengali péléng an zézéha kenu. Taan ni aku én zéi'kan maizang, pahpaan kata'uangku séi si pa'émanengku wo totoz ing kata'uangku, ni Sia é mahkawasa i mahtéiz am pahpaayangengku u mémoitarawésa-Na wia ni aku, makaz witu un endo kaakazan ung kaayahan.

2 Timutius 1:16

Mengalé-ngaléi uman si Mahpiara mapaileké u raraatéan-Na wia sé sana awu ni Onesiforus, pahpaan ni séra é makalakezo nimenté' un atéku. Ni sia kasii én zéi'kan maizang i mahileké ni aku im witi bui.

2 Timutius 2:3

Ni ko é léwo'zéi' i mazézéha tanu si suraro ni Kristus Yesus si mahtali-talinga wia ni Sia.

2 Timutius 2:8

Gena-genangen ang kenu: si Yesus Kristus, si méitoumé sumaup ni Opo Empung im wia sé nimaté, si suzu ni Daud, tumoro ni Siamo u Nuwu' Lé'os ipahwoka'ku.

2 Timutius 2:9

Pahpaan i mahwoka' u Nuwu' Lé'os kenumo, ni aku nimazézéha an apusen tanu sé tou léwo'. Taan u Nuwu' ni Opo Empung itii én zéi'kan mata'u apusen.

2 Timutius 4:17

Taan si Mahpiara én timatér wo nimenté' ni aku makaz u Nuwu' Lé'os toro ipakawoka'ku wo talingana péléng né tou zéi'kan Yahudi. Karia in téntu, ni aku é méikapiloté im witu um patéan tanumokan méikapiloté witu u sumah ni singa.

2 Timutius 4:5

Zozo' in téntu, ni ko é léwo'zéi' i mahime-imek un toumu wo ezen im wana an zézéha, ipahwoka'la u Nuwu' Lé'os, wo paayangela a léwo'zéi' im paayangennu wia si Opo Empung.

1 Petrus 1:5

Péléng niitu én iwéhé wia ni kamu sé penaté-natéren karia ung kawasa ni Opo Empung pahpaan ma'éman wia ni Sia. Ni Sia é menaté-natér ni kamu, akaz ni kamu ipilot im witu un ukuman wana a singkéla'. Niitu é niimek-Na wia ni kamu witu ung kaakazan ung kaayahan.

1 Yohanes 4:14

Ni kai é nimileko wo ni kai éng kumuama a niilek nai i si Ama' é nimatumomé si Oki'-Na i milot sé tou wia ung kaayahan im witu un ukuman wana a singkéla'.

Yudas 1:24

Wia ni Sia si mahkawasa si mahtéiz wia ni kamu én taa kamu ikasundui, wo si nimahwali ni kamu sé zéi'kan siapa um pahséro'an karia i mahpaa-paaz i marumendai sumaru witu un tampa-Na um pahloozen wo pahsigi'en.

Wahyu 1:2

Si Yohanes é mahkua péléng a niilek wo an tinalingana tumoro a Nuwu' ni Opo Empung wo péléng a mémoipapailek ni Yesus Kristus, a niileknamo.

Wahyu 1:9

Ni aku, Yohanes, katuari niou esa pa'émanen. Ni kita é nimendanomé an zézéha pahpaan i mahkiit si Yesus, méikauntep witi Kakolanoan ni Opo Empung wo ezen ma'ento' si Yesus i mawurimé sumaup. Ni aku é méitia' witi katanaan makangaran Patmos pahpaan mahkua u Nuwu' ni Opo Empung wo a mémoipapata'u ni Yesus.

Wahyu 12:11

Sé katuari esa pa'émanen itii kasii éng kimalamoma si tonaas né sétang karia un zaha' ni Anak ni Domba, wo karia un tinalinga wo niilek néra tumoro si Anak ni Domba, un ipahkua néra wia sé tou. Ni séra én zéi'mo pandung ung katou-touan néra in esa makaz séra i maté.

Wahyu 19:10

A ni aku kumuruzla witu u sinaru un a'é ni malaekat itii i mongkot wo sumigi' ni sia, taan kuana wia ni aku, “Tia'mo mahasar téntu! Ni aku én ata, masuat wo ni ko karia né katuarimu esa pa'émanen sé mahkua a niilek wo an tinalinga néra tumoro si Yesus. Pahongkotala wo pahsigi'ela si Opo Empung! Pahpaan sé tou mahkua a niilek wo an tinalinga néra tumoro si Yesus ém wéwéhan roh i mahkua a méikuamé ni Opo Empung.”