2 Petrus 3:9 - Taaz Weru Witu u Nunuwu'en Tombulu

⁹ Si Mahpiara én zéi'kan mahuré-uré i mangun a méitaaz-Na, zozo' im wéwéhan sé tou mahkua ni Sia én tahlous uré. Taan ni Sia én ezen im wia ni kamu, pahpaan kasoo-Na zozo' in esa wéwéhan sé tou maikaléwo'. Kapaaz-Na péléng sé tou én tumula'ula a singkéla' wo mawuri sumaup i mahlé'os ang kapaaz-Na.

2 Petrus 3:9 ပူးပေါင်းရင်းမြစ်များ

Roma 13:11

Niia u léwo'zéi' im wangunen niou pahpaan ni kamu mata'umo a mahmuali in tarékan, i ni kamu sé timekel én orasnamo in tumooz. Pahpaan un oras si Yesus Mahpiarata i mawurimé sumaup, i milot ni kita im witu ung kaayahan léwo' kenu é lelezo, lumelezpé'mé i ni kita taré ma'émanla im puuna.

Roma 13:12

Un orasta i menou-nou wia ung kaayahan én tawimo maapu masuat wo um wengi i maendomo. Un endo si Mahpiara i méyé én zéi'mo uré. Niitumo, kumana'mola i mahwangun a léwo'an tanu am pemangu-mangunen né tou menou-nou wana ang karimbengbengan. Tanu sé suraro nimimeko ang kokoro' i masumaru sé kakoro', ni kita kangkasii é léwo'zéi' i mahwangunla an toro sumawang ni kita i sumaru a léwo'an.

Roma 2:4

Kaa iperorosmu u raraatéan-Na, ung kaezenan-Na wo ung kalé'osan-Na un totoz wangko' im wia ni ko? Zéi'kan kata'uannu wé ung kalakoan u raraatéan ni Opo Empung u mahkit ni ko in tumula'ula a singkéla'mu?

Roma 9:22

Téntu kangkasii um winangun ni Opo Empung. Ni sia éng gimenang i mapailek un upi'-Na wo mapailek ung kawasa-Na. Taan ni Sia én ezen im wia sé tou tinotoz-Namo i léwo'en pahpaan nimanguno ni Sia in totoz maupi'.

1 Timutius 1:16

Taan pahpaano niitu an aku iraraatémé ni Opo Empung, wo si Yesus Kristus toro mapaileké péléng ung kaezenan-Na wia ni aku, si tou totoz lakez singkéla' kenu. Karia in téntu ni aku é nimaéndo kékéréan né tou sé ma'éman wia si Yesus wo sé makailek ung katou-touan makaz ing kauré-uré.

1 Timutius 2:4

Kapaaz-Na péléng sé tou én ipilot im witu un ukuman itii wo mata'u an tutuzu' ulit.

Ibrani 10:37

Pahpaan witu um Pinantik Lenas é méipantik téntii, “Zéi'mo uré, si méyé itii é méyémo, ni Sia i méyé én zéi'kan ikaurémé.

1 Petrus 3:20

Sé roh itii é roh né tou sé soo mahtali-talinga si Opo Empung im witu un oras ung katou-touan ni Nuh. In toro niitu si Opo Empung én ezen i ma'ento' sé tou in tumula'ula a singkéla' néra, karegas si Nuh i mahwangun u londéi tua'na. Taan toyo' uman sé tou nimuntep witu u londéi tua'na itii, ni séra ém walu uman sé tinulung ni Opo Empung im witu un ampuhan.

2 Petrus 1:4

Karia in téntu, ni Sia én timambéro wia ni kita an taaz zéi'kan kakuaan wo totoz wangko' u mangun ung katou-touan niou ikapiloté witu ung genang u mahkiit uman a lelo léwo' un awak niou u mahléwo' ung kaayahan kenu, wo am pahwangunen niou én tanu am pahwangunen ni Opo Empung.

2 Petrus 3:15

Genangenola ung kaezenan ni Mahpiarata én témpo niou in ipilot im witu un ukuman wana a singkéla'. Ang kenu é masuat wo u méipantik ni Paulus an iwéhé wia ni kamu pahpaan ang katulapanna a méitambéré ni Opo Empung wia ni sia. Ni sia éng katuarita esa pa'émanen wo ikararaatéta.

Wahyu 2:21

Si wéwéné itii ém winéhang-Kumoma oras in tumula'u am pahwangunenna itii, taan ni sia é soo tumula'u am pahwangunenna im wana ang kasamekanna itii.