2 Petrus 2:3 - Taaz Weru Witu u Nunuwu'en Tombulu

³ Pahpaan ung kaangkuman né méster towo itii, ni séra é mahtututu' i menéro zoit lakez wia ni kamu karia i mahsirita a sirita winangun néra uman. Taan pahpaan am pahwangunen néra itii, un ukuman wia ni séra én urémo niimek wo un endo si Opo Empung i luméwo' ni séra én zéi'mo isoro'.

2 Petrus 2:3 ပူးပေါင်းရင်းမြစ်များ

Matius 23:14

Ikaléwo'la kamu sé tou tulap un Torat wo kamu sé sana réwok tou Farisi, é kamu sé tou mahgau-gau lé'os. Pahpaan sé wéwéné mahesa-esamokan ém pahtowoan niou ing kumahat am walé néra. Am pakahpengaléi niou é lambo' i mahwuwuni a léwo'an niou. Pahpaano niitu, ni kamu én ukumen totoz wutez.]

Lukas 18:8

Ikua-Kuma wia ni kamu: ni Sia én zéi'kan mahuré-uré i sumawang ni séra im wana am pahéndo-éndoan néra. Taan, sa si Oki' ni Tou méyé, apa wéwéhampé' sé tou wia ung kaayahan kenu sé ma'éman wia ni Sia?”

Lukas 20:20

Sé tou tulap un Torat wo sé tonaas né walian nimatuma sé tou i mangé mahtata'u si Yesus. Sé tou itii é mahtowo-towo tanu tou ulit mangé wia si Yesus i mahwewetes ni Sia karia u liligau, wo Sia toro iayo néra witu ung kawasa ni gubernur né pemerénta Romawi.

Lukas 22:47

I si Yesus karegaspé' mahnuwu', méyé sé sana réwok tou wo si mahpuuna im wia ni séra é si Yudas si esaané im wia sé pahtuzu'en-Na. Si Yudas rumétéma wia si Yesus i sumiom ni Sia.

Yohanes 2:16

Im wia sé mahwangkér sé bombo ni Sia éng kimua, “Pakaéndona péléng ang kenu im wia'i, tia' kamu mangun um Walé ni Ama'-Ku maéndo pemamangkéran.”

Roma 16:18

Pahpaan sé tou téntu én zéi'kan mahpaayang wia si Kristus, si Mahpiarata, taan ni séra é mahpaayang i mahwuwutul uman am pemandungen néra. Karia an eenou wo a nunuwu'en tariis im pahtalingan, ni séra é mahtowo wia sé tou sé zéi'kan siapa kata'uan.

2 Korintus 2:17

Ni kai én zéi'kan mahwangun tanu sé tou lakez walina, pahpaan ni séra i mahwoka' u Nuwu' ni Opo Empung én tanu mahwangkér i menéro uman ang kawa'ilanan néra. Taan ni kai i mahkiit si Kristus én uli-ulit mahwoka' uman u Nuwu' ni Opo Empung wia sé tou, witu u sinaru-Na wo mahkiit uman a méiperénta-Na.

1 Tesalonika 2:5

Pahpaan kata'uan niou i ni kai én zéi'kan kawisa i mahenou ni kamu karia a nunuwu'en tariis uman im pahtalingan wo zéi'kan kawisa i mahtuzu' ni kamu i menéro ung kauntungan karia i mahwuni-wuni. Si Opo Empung si mata'u péléng niitu.

1 Tesalonika 5:3

Wéwéhan un orasna sé tou ing kumua in téntii, ‘Ung katou-touanta én ena' wo zéi'kan siapa ikaindé'.’ Taan kumompo'mé ni séra é mendan u meléwo' tanumokan si wéwéné mahawa-awak, si kumompo'mé é mahpendano u rumara in tumoumo si oki'na. Zozo' in esa zéi'kan siapa si tinalez.

1 Timutius 3:3

zéi'kan matetewelen, zéi'kan uupi'en taan lé'os uman, paaz mahwangun sé tou malé'osan wo zéi'kan megena-genang uman an zoit.

1 Timutius 3:8

Téntu kangkasii sé diaken, ni séra é léwo'zéi' in tou lé'os sé pahsigi-sigi'en né tou, zéi'kan koliwiles, zéi'kan matetewelen, zéi'kan megena-genang uman an zoit,

1 Timutius 6:5

mahsingku-singkutan zéi'kan siapa zéi'na, ung genang ni tou itii é nimakazo wo zéi'mo ulit. Ni sia mahgenangla i mawa'ilan pahpaan mahragés wia si Opo Empung.

Titus 1:11

A sumah né tou tanu ni séra é léwo'zéi' im pekipenes, pahpaan lakez sé sana awu pahkayo'en néra karia an tutuzu' towo, makaz am pahkailekan néramé é lakez taan karia in zéi'kan wangun.

Titus 1:7

Si tonaas né jamaat é mahimek um walé ni Opo Empung, niitumo ni sia é léwo'zéi' in zéi'kan siapa pahséro'an, zéi'kan wera', zéi'kan raranguan, zéi'kan matetewelen, zéi'kan tangkoro'en wo zéi'kan uman megena-genang an zoit,

1 Petrus 2:8

Ni séra ém pahkasangkil wia ni Sia pahpaan zéi'kan mahtalinga u Nuwu' ni Opo Empung. Téntu un tinotozo ni Opo Empung i mamuali wia ni séra.

1 Petrus 5:2

Piarala sé domba ni Opo Empung sé wia ni kamu. Tia' karia in totoz pahlusun, taan karia u mahpaa-paaz tanu ung kapaaz ni Opo Empung. Tia' menéro-néro uman ang kauntungan, taan iwéhéla un tou niou in uli-ulit mahsawang.

2 Petrus 1:16

Pahpaan ni kai i mahtuzu' wia ni kamu tumoro si Yesus Kristus Mahpiarata i mawurimé sumaup tanu si Kolano karia ung kawasa-Na, zéi'kan mahkiit a sirita towo am winangun uman né tou, taan ni kai sé nimilek wo sé timalinga ung kawangko'an-Na.

2 Petrus 2:1

Rengané im puuna ém wéwéhano sé nabi towo kimaria sé tou ni Opo Empung. Téntu kangkasii in tumondong im wia ni kamu ém wéwéhan sé méster towo. Ni séra é matumuzu' an tutuzu' zéi'kan ulit, u mahlululu uman sé tou makaz sé tou é maikaléwo'. Lumousé niitu ni séra é mahkélong i si Yesus Kristus é si mahkawasa si timubus ni séra. Niitu u nimangun ni séra i rewek léwo'en.

2 Petrus 2:9

Niana péléng an tumuzu'mé wia ni kita, i si Opo Empung é mata'u in tumulung sé tou sé mahkiit um paaz-Na, sa séra wana am pema'wa'en. Wo ni Sia kangkasii é mata'u i muntep sé tou léwo' witi bui in zézéhan witu un endo i ni Sia tumotoz am pinahmuali néramé,

Yudas 1:11

Ikaléwo'la séra pahpaan ni séra éng kimiit um pinahmualimé ni Kain wo ni séra éng kimiit si Bileam si nimahlulumé sé tou pahpaan im pahwaéran. Ni séra kasii én ikaléwo' pahpaan mahsaru si Opo Empung tanu si Korah.

Yudas 1:15

Ni Sia é métumotoz ulit kaapa zéi'kan am pinahwanguné né tou wo mémukum sé tou léwo' pahpaan a léwo'an pahmualin néra wo péléng a nuwu' zéi'kan wangun an ipahkua né tou mahsingkéla' itii wia si Opo Empung.”

Yudas 1:16

Sé tou itii é sé mengengu-ngengut wo mema'o-ma'os tumoro am pengalin néra, menou-nou mahkiit a lelo léwo' un awak néra. A sumah néra é mahkua ang kaweraan néra wo meloo-looz sé tou i mahlalakez am pahkailekan néra.

Yudas 1:4

Pahpaan mémoikatuzu'mé im wéwéhano sé tou mahwuni-wuni kimariala ni kamu. Ni séra én urémo tinotoz in ukumen. Ni séra é sé tou zéi'kan pandung si Opo Empung wo mahséa' u raraatéan-Na, wo séra toro menou-nou mengiit u lelo léwo' un awak. Ni séra kasii é soo makaulit i si Yesus Kristus si Mahkawasa wo si Mahpiarata én esa uman.

Yudas 1:7

Téntu u nimamuali witi Sodom wo Gomora karia am wanua tua'na makaliklik witu. Am pahwangunen né tou wana é masuat wo am pahwangunen né malaekat itii, mahwangun a samek wo mahwuwutul uman a lelo léwo' un awak néra an zéi'kan tanu ang kinanaram. Ni séra péléng é niukum karia un api zéi'kan mahpaté-patéla i mapagenang wia péléng sé tou.