2 Petrus 2:2 - Taaz Weru Witu u Nunuwu'en Tombulu

² Lakez sé tou makumiit ung katou-touan né méster towo u mahkiit uman a lelo léwo' un awak néra im wana an zéi'kan wangun. Am pahlé'osen néra itiimo a nimangun sé tou lakez i mahséro' u lalan kaulitan ni Opo Empung.

2 Petrus 2:2 ပူးပေါင်းရင်းမြစ်များ

Matius 22:16

An iatu nérama sé woopira pahtuzu'en néra wo sé woopira tou mahkii-kiit si kolano Herodes mangé wia si Yesus i lumigau, “Méster, kata'uan nai, ni Ko én zéi'kan mahtowo wo ulit i mahtuzu' u lalan ni Opo Empung. Wo zéi'kan siapa sé ikaindé'-Mu pahpaan ni Ko zéi'kan mahsanaweka.

Matius 24:24

Pahpaan sé zéi'kan uli-ulit Mesias wo sé zéi'kan uli-ulit nabi é méyé wo ni séra é mangun a makakompo'en zéi'mo kakuaan, wo sa toro, ni séra kasii é lumulu sé tou pinéléngo ni Opo Empung.

Matius 7:14

Taan um pepenet i mangé witu ung katou-touan ém pesut wo u lalan mangé witu ém pesut wo toyo' uman sé tou kumiit witu.”

Markus 12:14

Ni séra é niméyé wia ni Sia ang kumua, “Méster, kata'uan nai, ni Ko én zéi'kan mahtowo wo zéi'kan siapa sé ikaindé'-Mu, pahpaan ni Ko én zéi'kan mahsanaweka wo ulit i mahtuzu' u lalan ni Opo Empung. Mengiit an tinotoz witu um pa'émanenta, toro wé i maér am pajak wia si Kaisar kaapa zéi'kan? Apa ni kai é léwo'zéi' i maér am pajak kaapa zéi'kan?”

Markus 13:22

Pahpaan sé mahwangu-wangun Mesias wo sé mahwangu-wangun nabi é méyé. Ni séra é mémangun a makakompo'en wo an zéi'kan kakuaan i lumulu sé tou. Wo sa toro kangkasii, sé tou pinéléngo ni Opo Empung én ipahlulu néra.

Yohanes 14:6

Kuan ni Yesus wia ni sia, “Ni Akumo si lalan i mangé wia si Opo Empung wo mapata'u ung kaulitan tumoro si Opo Empung wo si mahwéhé ung katou-touan makaz ing kauré-uré. Zéi'kan siapa zozo' in esa si mangé wia si Ama' sa zéi'kan mengiité ni Aku.

Kisah Rasul-rasul 13:10

ang kumua, “É oki' ni tonaas né sétang! Ni ko é mawuta-wuta a léwo'an wo an towo. Ni ko éng kakoro' ang kaulitan. Makaz sawisa u lalan terén ni Opo Empung im pahséa'mu?

Kisah Rasul-rasul 14:2

Taan sé tou Yahudi sé soo an ipahwoka' néra zua é mahaker sé tou zéi'kan Yahudi, wo nimangun ni séra maupi' wia sé tou ma'éman.

Kisah Rasul-rasul 16:17

Ni sia mahipusé wia si Paulus wo ni kai karia i mahkérét, “Sé tou kenumo sé ata ni Opo Empung Si Totoz Rakék. Ni séra é mahwoka' wia ni kita kura wo toro ipilot im witu un ukuman wana a singkéla'.”

Kisah Rasul-rasul 18:26

Karia im wuaya ni sia rengan i mahtuzu' witi walé peraragésan né tou Yahudi. In tinalingala ni Priskila wo ni Akwila a sia ipahwali nérama mangé witi walé néra. Im witu ni séra én uli-ulit timuzu'la wia ni sia u lalan kura ing kumiit si Opo Empung.

Kisah Rasul-rasul 19:9

Taan wéwéhan sé woopira tou soo tumalinga wo soo ma'éman. Witu u sinaru né tou lakez, pahséro'an néra uman taré u lalan kura ing kumiit si Mahpiara. Niitumo ni séra é méitula'umé ni Paulus, wo sé tou ma'éman wia si Yesus é méitampasnamé. Sekez in endo ni sia é mahsirita karia néra witi tampa pahtata'uan makangaran Tiranus.

Kisah Rasul-rasul 22:4

Im puuna, ni aku é mahzézéha sé tou sé mahkiit an tutuzu' ni Yesus Mahpiara makaz ni séra i nimaté. Pahtionangku sé tuama wo sé wéwéné wo ipahuntepa witi bui.

Kisah Rasul-rasul 24:14

Taan ni aku é makaulit wia si tuang i ni aku é mahsigi' wo mahpaayang wia si Opo Empung né nimaopo nai in tou Israel. Ni aku kasii é mahkiit an tutuzu' ni Yesus Mahpiara um pahkuan néra i simala'. Ni aku é ma'éman wana péléng a méipantik witu un ukum Torat wo am pinantik witu ung kitap né nabi.

Roma 2:24

Tanu u méipantik witu un ukum Torat in téntii: “Pahpaano ni kamu in tou Yahudi, u ngaran ni Opo Empung ém pahséro'an im wia sé tahsasana wanua walina.”

1 Timutius 5:14

Niitumo sé wéwéné mahesa-esamokan sé zéi'kampé' tahlous tu'a, kapaazku ni séra éng kumawéngla sumaup. Sa séra kumawéngla sumaup, ni séra én toro makaileké koki' wo mahtu'tul sé sana awuna. Karia in téntu, sé kakoro'ta én zéi'kan mata'u mahtawuruk u ngaranta.

Titus 2:5

menou-nou karia in tulap wo zéi'kan siapa pahséro'an, tulap i mahimek sé sana awu néra, lé'os uman wo mahtali-talinga wia si mahayona. Karia in téntu, u Nuwu' ni Opo Empung én zéi'kan pahséro'an né tou.

Titus 2:8

an ipahkuamu ém wéwéhan torona wo zéi'kan siapa um pahséro'an, makaz sé mahsaru ni ko é maizang pahpaan zéi'kan siapa un ikua néra i mahtawuruk tumoro ni kita.

1 Petrus 2:12

Wangu-wangunen ung katou-touan niou im witu u saru-sarun né tou zéi'kan mata'u si Opo Empung, wo zozo' ni kamu ém pahkuan né tou itii in tou léwo', taan witu un endo si Opo Empung i méyé, ni séra é malumooz wo sumigi' ni Sia, pahpaan ni séra é mahilek am pahwangunen niou an totoz wangun.

2 Petrus 2:12

Taan sé méster towo itii é masuat wo sé binatang lemou sé méianaké én akaz uman in tionan wo wunu'en. Ni séra é mahséro' wana an zéi'kan kata'uan néra, niitumo ung kinawalian taka-takazan ni séra ém wunu'en tanu sé binatang meneza' tou,

2 Petrus 2:15

Pahpaan ni séra én timula'umola u lalan kaulitan, ni séra é méikalulumo. Ni séra é mahkiit um pahmualin ni Bileam, oki' ni Beor, si paaz im pahwaéran i mahmuali a singkéla'.

2 Petrus 2:18

Pahpaan ni séra é menuwu-nuwu' am wera' wo an zéi'kan siapa torona. U lelo léwo' un awak ém pahpakén néra i mahenou sé tou taré ikapiloté im witu ung katou-touan né tou méikalulu.

2 Petrus 2:21

Niitumo, tawimo ni séra én zéi'kan nimata'uma an tutuzu' kaulitan ni Opo Empung, taan ung kinata'uan nérakala an tutuzu' itii taan ing kamurian ni séra én timula'ukala am perénta ni Opo Empung a méipahtuzu'mo wia ni séra.

2 Petrus 2:7

Taan si Lot én tinulung-Na pahpaan ni sia é mahwangun an ulit ang kapaaz-Na. Si Lot én totoz in zézéha pahpaan am pemuali-mualin né tou sé zéi'kan mazéi' i mahmuali a léwo' a mahkiit uman a lelo léwo' un awak néra.

Yudas 1:10

Taan ni séra é mahséro' uman wana péléng an zéi'kan kata'uan néra. Ni séra é mahkiit uman ang genang néra tanu sé binatang lemou. Nianamo a nimangun ni séra ikaléwo'.

Yudas 1:15

Ni Sia é métumotoz ulit kaapa zéi'kan am pinahwanguné né tou wo mémukum sé tou léwo' pahpaan a léwo'an pahmualin néra wo péléng a nuwu' zéi'kan wangun an ipahkua né tou mahsingkéla' itii wia si Opo Empung.”

Yudas 1:4

Pahpaan mémoikatuzu'mé im wéwéhano sé tou mahwuni-wuni kimariala ni kamu. Ni séra én urémo tinotoz in ukumen. Ni séra é sé tou zéi'kan pandung si Opo Empung wo mahséa' u raraatéan-Na, wo séra toro menou-nou mengiit u lelo léwo' un awak. Ni séra kasii é soo makaulit i si Yesus Kristus si Mahkawasa wo si Mahpiarata én esa uman.

Yudas 1:7

Téntu u nimamuali witi Sodom wo Gomora karia am wanua tua'na makaliklik witu. Am pahwangunen né tou wana é masuat wo am pahwangunen né malaekat itii, mahwangun a samek wo mahwuwutul uman a lelo léwo' un awak néra an zéi'kan tanu ang kinanaram. Ni séra péléng é niukum karia un api zéi'kan mahpaté-patéla i mapagenang wia péléng sé tou.

Wahyu 12:9

Si naga tua'na itii é si ulé' tu'a, si pahkuan kangkasii in tonaas né sétang kaapa si sétang mahlulu sé tou. Ni siamo si limulu péléng sé tou wia ung kaayahan wo ni sia kasii méilombo'mé wia ung kaayahan karia né malaekatna.

Wahyu 13:14

Si binatang kazua itii é mahlulu sé tou mahento' wia ung kaayahan karia a makakompo'en, a méiwéhémo wia ni sia im pahwangunen witu u sinaru ni binatang kataré. Méiatu ni binatang kazua itii sé tou mahento' wia ung kaayahan i mangun um patong ni binatang kataré, si pélaan im winira' taan menou-noupé', im pahsigi'en.

Wahyu 13:8

Si binatang itii ém pahongkotan wo pahsigi'en péléng né tou mahento' wia ung kaayahan, sé rengané ung kaayahan kenu im winangun, a ngaran néra én zéi'kan méipantik witu ung Kitap Katou-touan un anu ni Anak ni Domba, si kinerizo.