2 Petrus 2:1 - Taaz Weru Witu u Nunuwu'en Tombulu

¹ Rengané im puuna ém wéwéhano sé nabi towo kimaria sé tou ni Opo Empung. Téntu kangkasii in tumondong im wia ni kamu ém wéwéhan sé méster towo. Ni séra é matumuzu' an tutuzu' zéi'kan ulit, u mahlululu uman sé tou makaz sé tou é maikaléwo'. Lumousé niitu ni séra é mahkélong i si Yesus Kristus é si mahkawasa si timubus ni séra. Niitu u nimangun ni séra i rewek léwo'en.

2 Petrus 2:1 ပူးပေါင်းရင်းမြစ်များ

Matius 10:33

Taan, séi uman si mahkélong ni Aku witu sinaru né tou, ni Aku kangkasii éng kumélong ni sia im witu u sinaru ni Ama'-Ku witi kasendukan.”

Matius 24:11

Lakez sé nabi towo sé méyé wo lumulu sé tou lakez.

Matius 24:24

Pahpaan sé zéi'kan uli-ulit Mesias wo sé zéi'kan uli-ulit nabi é méyé wo ni séra é mangun a makakompo'en zéi'mo kakuaan, wo sa toro, ni séra kasii é lumulu sé tou pinéléngo ni Opo Empung.

Matius 24:5

Pahpaan lakez sé tou é méyé wo maké u ngaran-Ku wo kumua in téntii, ‘Ni akumo si Mesias’, wo lakez sé tou mailulu néra.

Matius 7:15

Ang kuan kasii ni Yesus, “Mile-ilek im wia sé nabi towo! Ni séra méyé wia ni kamu é mahwangu-wangun lé'os tanu sé domba, taan ndéén ni séra é masuat wo si serigala meneza' tou.

Markus 13:22

Pahpaan sé mahwangu-wangun Mesias wo sé mahwangu-wangun nabi é méyé. Ni séra é mémangun a makakompo'en wo an zéi'kan kakuaan i lumulu sé tou. Wo sa toro kangkasii, sé tou pinéléngo ni Opo Empung én ipahlulu néra.

Lukas 12:9

Taan séi uman si mahkélong i ni sia én tou-Ku witu u sinaru né tou, si Oki' ni Tou kangkasii éng kumélong ni sia im witu u sinaru né malaekat ni Opo Empung.

Lukas 21:8

Am wingkotela ni Yesus, “Tuméga-tégam én taa kamu ilulu. Pahpaan lakez sé tou é méyé wo maké u ngaran-Ku wo kumua in téntii, ‘Ni akumo si Mesias’ wo ‘Un orasna é lelezo’. Ni kamu én tia' mahkii-kiit ni séra.

Lukas 6:26

Ikaléwo'la ni kamu sa péléng sé tou é mahlooz ni kamu, pahpaan téntu kangkasii am pinahwanguné né nimaopo néra wia sé nabi towo im puuna.”

Roma 16:18

Pahpaan sé tou téntu én zéi'kan mahpaayang wia si Kristus, si Mahpiarata, taan ni séra é mahpaayang i mahwuwutul uman am pemandungen néra. Karia an eenou wo a nunuwu'en tariis im pahtalingan, ni séra é mahtowo wia sé tou sé zéi'kan siapa kata'uan.

1 Korintus 11:19

Pahpaan im wia ni kamu é léwo'zéi' wéwéhan sé mahéndo-éndoan, wo toro kata'uan séi si uli-ulit mahkiit si Opo Empung.

1 Korintus 6:20

Ni kamu én tineleso wo pinakawaéro ni Opo Empung. Niitumo, un awak ni esa wo ni esa én ipahsigi' wo ipahlooz uman si Opo Empung.

1 Korintus 7:23

Ni kamu én tineleso wo pinakawaéro ni Opo Empung. Niitumo, ni kamu én tia'mo maéndo ata né tou.

Galatia 2:4

Un tumoro si Titus zéi'kan sinunat é méikakuamé pahpaan im witu ém wéwéhan sé mahkua-kua ma'éman wia si Yesus, taan un ulitna ni séra én towo, ni séra mahtututu' wo si Titus é sunaten. Ni séra é mahwuni-wuni i nimuntepé kimariala ni kai sé uli-ulit ma'émano si Kristus. Ni séra nimangunla an téntu wo séra toro mahilek apa um pahwangunenta i ni kita zéi'mo mahkiit un ukum Torat pahpaan nimaesa karia ni Kristus Yesus. Ni séra é mahtututu' wo kita ikakiit sumaup i mahwangun un ukum Torat. Sa kita ikakiitla, ni kita én tanu pahata-atan un ukum Torat itii.

Galatia 3:13

Pahpaan ni kita én zéi'kan makawawa i mahkiit péléng un ukum Torat, niitumo ni kita é makailek un epa' ni Opo Empung. Taan si Kristus timubuso ni kita im witu un epa' itii, karia i nimayo un tou-Na sinalip i sumawel ni kita. Pahpaan witu um Pinantik Lenas méipantik téntii, “Si tou niukum sinalip é makailek un epa' ni Opo Empung!”

Galatia 4:17

Sé tou walina itii é mahtututu' i mahakat ni kamu wo ni kamu ikakiit ung kalakoan ung ginenang néra un zéi'kan wangun. Pahpaan kapaaz néra ni kamu én tumampasa im wia ni kai, wo ni kamu kalousna i mahwéhé genang ing kumiit ni séra.

Galatia 5:20

mahongkot wo mahsigi' wia sé opo-opo, mahriara, lakez kakoro', tangkoro'en, téutéu, uupi'en, memandung uman un tou in esa, mangun sé tou makahkoro', mahwangun sé tou makayo',

Efesus 1:7

Pahpaan mengiité si Yesus ni kita én tinubus im wana a singkéla' karia un zaha'-Na. Ni kita winéhan un ampungan im wana a singkéla' mengiit ung kamang méitambér-Na an totoz lakez.

Efesus 4:14

Karia in téntu ni kita én zéi'mo tanu sé koki' sé mahkii-kiit uman an tutuzu' nimahwali-walinaan né menunuzu' towo. Niitu én tanumokan u sempa' pemolé-moléi u reges. Ni séra mahlululu uman karia an towo néra.

Filipi 3:19

Ing kamurian sé tou téntu é maléwo'en pahpaan zéi'kan memandung si Opo Empung taan memandung uman um poot néra in esa. Ni séra mahlooz am pahwangunen néra zozo' am pahwangunen néra itii é makaizangen wo am pegena-genangen néra ém wia uman ung kaayahan kenu.

Kolose 2:18

Tia' ipahwaya niou ung kukulu makailekan niou in zéi'en umana né tou sé mahtowo-towo i meroros un tou néra wo mahongkot wia sé malaekat. Ni séra é mapahlolooz un tou néra im wana am pina'ilek néra un tanu im pahipi-ipin, zozo' niitu én zéi'kan uli-ulit téntu. Ni séra é mahlolooz un tou néra karia am pegena-genangen néra u mahkiit uman ung kapaaz ung kaayahan.

Kolose 2:8

Mile-ilek, én taa wéwéhan sé maheenou ni kamu karia an tutuzu' néra an zéi'kan siapa torona wo mahlululu uman um pa'émanen niou um wia si Kristus. An tutuzu' néra én zéi'kan mahkiit an tutuzu' ni Kristus, taan mahkiit uman ang kinanaram né nimaopo néra im puuna wo ung kapaaz né roh wia ung kaayahan.

1 Timutius 5:8

Taan sa wéwéhan tou soo miara sé katuarina, lumouspé' kasiimé sé sana awuna in esa, si tou itii én timamburimola wia si Opo Empung wo ung kaléwo'an ni tou itii é lumouspé'mé sé tou zéi'kan ma'éman.

2 Timutius 4:3

Pahpaan un orasna é méyé i sé tou soomo an tutuzu' ulit. Ni séra ruméwok sé méster mengiit um paaz néra ing kumua ang kapaaz néra in talingan.

Titus 1:11

A sumah né tou tanu ni séra é léwo'zéi' im pekipenes, pahpaan lakez sé sana awu pahkayo'en néra karia an tutuzu' towo, makaz am pahkailekan néramé é lakez taan karia in zéi'kan wangun.

Titus 3:10

Si tou mahkayo' sé jamaat, totoz i séro'ennula makasa kaapa makazua, taan sa sia soo tumalinga tia'mo mahkari-karia ni sia.

Ibrani 10:29

Tantumo lumouspé'mé ung kawutezna un ukuman wia si tou mahséro' wia si Oki' ni Opo Empung wo mahgenangla un zaha' ni Yesus Kristus u lumenas sé tou én zéi'kan siapa torona wo mahséro' wia si Roh si mahtambéré ang kamang.

1 Petrus 1:8

Zozo' ni Sia én zéi'kampé' pinahile-ilek nioula, taan ni Sia én ikararaaté niou. Wo maan in tarékan kasii ni Sia én zéi'kampé' pahileken niou, taan ni Sia ém pa'émanen niou. U mahpaa-paaz niou én zéi'kan kakuaan pahpaan niitu ém wangko'.

2 Petrus 2:3

Pahpaan ung kaangkuman né méster towo itii, ni séra é mahtututu' i menéro zoit lakez wia ni kamu karia i mahsirita a sirita winangun néra uman. Taan pahpaan am pahwangunen néra itii, un ukuman wia ni séra én urémo niimek wo un endo si Opo Empung i luméwo' ni séra én zéi'mo isoro'.

1 Yohanes 2:26

Péléng niana én ipantikkuma wia ni kamu, tumoro sé tou mahtututu' i mahlululu ni kamu.

1 Yohanes 4:1

Katuari-katuari ikararaatéku, péléng sé roh én tia' pa'émanen niou, taan pahtata'ula lumé'o-lé'os sé roh itii, sa sé roh itii ém wia si Opo Empung a méyé kaapa zéi'kan. Pahpaan lakez sé nabi towo sé nimapaileko un tou néra wo mahliklik ung kaayahan.

Yudas 1:18

Pahpaan ni séra éng kimuamo wia ni kamu, “Merétéma ung kaakazan ung kaayahan, mondolé sé menénéro', sé menou-nou mahkiit uman a lelo léwo' un awak néra.”

Yudas 1:4

Pahpaan mémoikatuzu'mé im wéwéhano sé tou mahwuni-wuni kimariala ni kamu. Ni séra én urémo tinotoz in ukumen. Ni séra é sé tou zéi'kan pandung si Opo Empung wo mahséa' u raraatéan-Na, wo séra toro menou-nou mengiit u lelo léwo' un awak. Ni séra kasii é soo makaulit i si Yesus Kristus si Mahkawasa wo si Mahpiarata én esa uman.

Wahyu 13:14

Si binatang kazua itii é mahlulu sé tou mahento' wia ung kaayahan karia a makakompo'en, a méiwéhémo wia ni sia im pahwangunen witu u sinaru ni binatang kataré. Méiatu ni binatang kazua itii sé tou mahento' wia ung kaayahan i mangun um patong ni binatang kataré, si pélaan im winira' taan menou-noupé', im pahsigi'en.

Wahyu 2:13

Kata'uang-Ku um pahwéha-wéhan niou. Ni kamu é mahento' witu un tampa kinawasaan ni tonaas né sétang. Taan zozo' in téntu, ni kamu én zéi'kan mazéi' i ma'éman wia ni Aku, wo ni kamu kangkasii én zéi'kan mahkélong i ma'éman ni Aku. Téntu kangkasii, ni kamu én zéi'kan mazéi' i ma'éman, im witu un endo si Antipas si mengungua a niilek wo tinalingana tumoro ni Aku, si totoz ma'éman ni Aku, im winunu' witu u saru-sarun niou witu un tampa kinawasaan ni tonaas né sétang.

Wahyu 2:9

Kata'uang-Ku ni kamu én zézéha wo zéi'kan siapa apa, taan ni kamu ém wa'ilan im witu u sinaru ni Opo Empung. Kata'uang-Ku kasii an tumoro sé mahtawuruk ni kamu. Ni séra é mahkua i ni séra én tou Yahudi sé pinéléng ni Opo Empung, taan un ulitna én zéi'kan. Un ulitna ni séra én jamaat ni tonaas né sétang.

Wahyu 3:8

Kata'uang-Ku péléng am pahpaayangen niou. Ilekena, ni Aku é nimukamoma um pepenet wia ni kamu, wo zéi'kan siapa zozo' in esa si toro menet niitu. Kata'uang-Ku i ni kamu én zéi'kan tahlos enté'. Taan zozo' in téntu, ni kamu é mahkiit a nuwu'-Ku wo zéi'kan kawisa mahkua in zéi'kan ma'éman ni Aku.

Wahyu 5:9

A sé epat tumou-tou wo sé zuana pulu' wo epat pahtutu'an kumantaré ung kakantaren weru. Kuan néra, “Ni Ko si wangun i makailek ung kitap ginulung itii, wo muka a segelna; pahpaan ni Ko si Anak ni Domba éng kinerizo, wo karia un zaha'-Mu sé tou wia ung kaayahan ém winaér-Mumo im wia sé tahsasana suzu, sé tahsasana nunuwu'en, sé tahsasana réwok mahtuari wo wia sé tahsasana wanua i maéndo anu ni Opo Empung.

Wahyu 6:10

Sé roh itii é mahkérété, “O Opo Empung si Mahkawasa, lenas wo ulit! Sawisamokan wo Ko taré tumotoz am pahwangunen wo mukum sé tou witi kaayahan sé nimunu'mé ni kai?”