2 Korintus 7:2 - Taaz Weru Witu u Nunuwu'en Tombulu

² Katuari-katuari, sungkulené kai karia u raraaté. Ni kai én zéi'kan siapa sinala'la wia si séi uman, zéi'kan siapa zozo' in esa si tou tinowoan nai wo zéi'kan siapa zozo' in esa si tou niéndoan nai kauntungan.

2 Korintus 7:2 ပူးပေါင်းရင်းမြစ်များ

Matius 10:14

Sa wéwéhan tou soo sumungkul ni kamu kaapa soo tumalinga an ipahtuzu' niou, mondolomé wo itula'umomé um walé kaapa um wanua tua'na itii, wo itangkaré an awu wana an a'é niou.

Matius 10:40

“Séi uman si simungkul ni kamu, ni sia é simungkul ni Aku. Wo séi uman si simungkul ni Aku, ni sia kangkasii é simungkul ni Sia si nimatumé ni Aku.

Lukas 10:8

Sa kamu muntepa witu um wanua tua'na wo wéwéhan sé tou sumungkulé ni kamu, kanenla un iwéhé néramé wia ni kamu.

Kisah Rasul-rasul 20:33

Ni aku én zéi'kan kawisa niméré' im wéhané né tou am péra' kaapa a mas kaapa ang karai.

Roma 16:18

Pahpaan sé tou téntu én zéi'kan mahpaayang wia si Kristus, si Mahpiarata, taan ni séra é mahpaayang i mahwuwutul uman am pemandungen néra. Karia an eenou wo a nunuwu'en tariis im pahtalingan, ni séra é mahtowo wia sé tou sé zéi'kan siapa kata'uan.

2 Korintus 1:12

Ni kai én totoz mahlooz ung katou-touan nai pahpaan um pahwangunen nai wia sé tou wia ung kaayahan é lé'os wo ulit. Niitu un totoz méisanapa' witu um pahile-ilekan nai karia niou. Witu ung genang lé'os nai, ni kai én totoz mata'u sa niitu é lé'os wo ulit wia si Opo Empung a méyé, niitu kangkasii én tumuzu'ma wia sé tou sa am pahwangunen nai én ulit. Wo péléng am pahwangunen nai itii én zéi'kan karia ung katulapan nai in tou, taan karia ung kamang tatambér ni Opo Empung.

2 Korintus 11:16

Ikuakuma sumaup, kasooku sa wéwéhan si tou im wia ni kamu si mahgenangla i ni aku én tou lemou. Taan sa kamu mahgenangla i ni aku én téntu, sungkulené ni aku, tanu ni kamu sumungkul si tou lemou, makaz ni aku toro lumoozla oki' un touku.

2 Korintus 11:9

Sa am pemandungengku én zéi'kan wutul i mahwali-wali karia niou, zéi'kan kawisa aku sumusa si esa im wia ni kamu. Pahpaan, péléng am pemandungengku én ipahwéhémé né katuari esa pa'émanen sé witi Makedonia a méyé. Ni aku én totoz tégam im wana am péléng, én taa ni aku maéndo pengalin im wia ni kamu. Téntu u mawangunengku.

2 Korintus 4:2

Taan ni kai i mahpaayang én zéi'kan mahwuni-wuni ang kaizangnokané. Ni kai kasii én zéi'kan mahtowo wia sé tou wo zéi'kan mahtuzu' an zéi'kan ulit tumoro u Nuwu' ni Opo Empung. Taan, ni kai mahtuzu' an ulit ing kumiit am paaz ni Opo Empung. Karia in téntu, péléng sé toumokan sé mahtata'ula mengiit ung genang lé'os niou witu u sinaru ni Opo Empung, sa an ipahtuzu' nai ulit kaapa zéi'kan.

Filipi 2:29

Niitumo, sungkulela sia karia i mahpaa-paaz pahpaan ni sia éng katuari esa pa'émanen wo pahsigi'ela sé tou tanu ni sia.

Kolose 4:10

Si Aristarkhus, si binui kariaku é mapaayoma u sigi'na wia ni kamu. Téntu kangkasii si Markus, si oki' né mahtuari wo si Barnabas. (Tumoro ni sia ni kamu é nimakaileko um perénta; sa sia méyé wia ni kamu, sungkulela sia.)

1 Tesalonika 2:10

Ni kamu, téntu kangkasii si Opo Empung é mata'u i ni kai é menou-nou karia un até weresi, zéi'kan mahsanaweka wo zéi'kan penuwu-nuwu'en né tou i menou-nou mahwali-wali karia niou, sé ma'émano.

Filemon 1:12

In tarékan méiatukuma si oki'ku si ikararaatéku itii i mawurima wia ni ko.

Filemon 1:17

Sa ko mahgenangla ni aku ing katuarimu esa pa'émanen, sungkulela si Onesimus tanu ni ko i sumungkul ni aku.

2 Yohanes 1:10

Niitumo, sa wéwéhan si méyé wia ni kamu wo zéi'kan mahtuzu' an tutuzu' ni Kristus, si tou itii én tia' pahsungkulen niou i muntep witu um walé niou wo tia' mahwéhé u sisigi'an wia ni sia.