2 Korintus 5:9 - Taaz Weru Witu u Nunuwu'en Tombulu

⁹ Niitumo, ni kai im wiapé' un awak nai wia ung kaayahan kenu kaapa im witumo un awak weru witi kasendukan, ni kai é mahtututu' i sekezé é mahwangun si Mahpiara i mahpaa-paaz.

2 Korintus 5:9 ပူးပေါင်းရင်းမြစ်များ

Yohanes 6:27

Ni kamu én tia'mo mahpaayang i menéro an tikohon rewek maapu wo toro uman mawuul, taan maayangla i menéro an tikohon zéi'kan mawuul, a mahwéhémé ung katou-touan makaz ing kauré-uré un iwéhé ni Oki' ni Tou wia ni kamu. Pahpaan ni Siamo si winéhan kawasa ni Opo Empung, si Ama'.”

Kisah Rasul-rasul 10:35

Péléng sé tou, wisa uman un tahsasana wanua néra sé maindé' wia ni Sia wo mahwangun an ulit ém pahsungkulen-Na.

Roma 14:18

Pahpaan séi uman si pakahpaayangna wia si Kristus én tanu niitu, ni sia é nimangun si Opo Empung mahpaa-paaz wo ni sia é sigi'en né kasuat tou.

Roma 14:8

Sa kita menou-nou, ni kita é menou-nou wia si Mahpiara, wo sa kita maté, ni kita maté wia si Mahpiara. Niitumo, ni kita i menou-nou kaapa i nimaté, ni kita én anu ni Mahpiara.

Roma 15:20

Un toro ipahloo-loozku i ni aku é nimahwoka'mé u Nuwu' Lé'os itii wana an tampa zéi'kampé' mata'u si Kristus. Ni aku é soo in tumerusokan am paayangengku witi tampa pinahwokaané né tou walina, tanumokan si tou rumendai um walé witu un to'tolan winangun né tou walina.

1 Korintus 15:58

Niitumo, katuari-katuari ikararaatéku, rumendaila menté-enté', tia' mahzua-zua genang i ma'éman. Mahtututu'la i mahpaayang am paayangen méiwéhé ni Mahpiara wia ni kamu, pahpaan kata'uan niouo im witu u sinaru ni Mahpiara, zéi'kan siapa am pinaayang niou an zéi'kan siapa torona.

2 Korintus 5:6

Pahpaan kata'uan naimo, ni kai é makailek un awak weru, niitumo un até nai é nienté-enté'. Kata'uan nai kasii i ni kai memia-miapé' un awak nai kenu, ni kai én zou'pé' im witu um walé u mapahwéha-wéhan nai karia ni Mahpiara.

2 Korintus 5:8

Taan un até nai én enté', wo ung kapaaz nai én tumula'uma un awak wia ung kaayahan kenu wo lamahwali-wali karia ni Mahpiara witi kasendukan.

Efesus 1:6

Niitumo, ni Sia ém pahloozen pahpaan ung kamang méitambér-Na én totoz wangko'. Niitu méiwéhé-Na wia ni kita mengiité si Yesus Kristus si Oki'-Na si ikararaaté-Na.

Kolose 1:10

Karia in téntu, ung katou-touan niou ém wangun im witu u sinaru ni Mahpiara wo ni kamu éng kapaaz-Na im wana am péléng wo mua'mé am wangun im wana péléng am pahpaayangen niou, wo kalousna i mata'u tumoro ang kapaaz ni Opo Empung.

Kolose 1:29

Niitumo um pahtututu'engku wo pa'ulitengku im paayangen karia péléng ung ketez u méiwéhémé mengiité ung kawasa ni Kristus u ma'ulit mahpaayang witu un touku.

1 Tesalonika 4:1

Ing kamurian katuari-katuari, ni kai é niméhémola ung kékéréan wangun wia ni kamu tumoro kura ung katou-touan niou u mahwangun un até ni Opo Empung mahpaa-paaz. Ni kamu é nimenou-noumola tanu niitu. In tarékan karia ung kawasa ni Yesus Mahpiara, ni kai totoz mahaléi wo menutu' wia ni kamu, wo kamu kalousna mahtututu' i mahwangun si Opo Empung mahpaa-paaz.

1 Tesalonika 4:11

Ni kamu é léwo'zéi' mahtututu'la i mahraa-raatéan karia né tou walina. Tia' mahsembo-sembor wana an urusan né tou walina. Ni kamu kasii é léwo'zéi' maayangla i menéro ang kakanen wo am pemandungen niou in esa, tanu u méipengua-ngua naimo wia ni kamu.

1 Timutius 4:10

Pahpaano niitu ni kita mahtututu' wo ma'ulit i mahpaayang, pahpaan ni kita niméré' uman wia si Opo Empung si Menou-nou, si nimilot péléng sé tou im witu un ukuman wana a singkéla', sé pahpuu-puuna é sé tou ma'éman wia ni Sia.

Ibrani 12:28

Niitumo, pahpaan ni kita é nimaéndomo tou ni Opo Empung witi Kakolanoan-Na un zéi'kan mamuali in iéhzo', méyémo kita mapaayo u makasé wo rumagés wia si Opo Empung u mahwangun ni Sia mahpaa-paaz. Ni kita i mahragés wia ni Sia éng karia i mahsigi' wo maindé' ni Sia.

Ibrani 4:11

Niitumo, tawimo kita mahtututu'la i muntep witi tampa pahkanaan itii, wo zéi'kan siapa zozo' in esa si zéi'kan méikauntep witi tampa pahkanaan itii pahpaan mahkiit uman am pahwangunen né tou zéi'kan mahtali-talinga si Opo Empung.

2 Petrus 3:14

Niitumo katuari-katuari ikararaatéku, karegas ni kamu i ma'ento' niana péléng i mamuali, ni kamu é léwo'zéi' mahtututu' i menou-nou totoz weresi wo zéi'kan siapa pahséro'an witu u sinaru ni Opo Empung, wo mahlé'o-lé'osan karia-Na.