2 Korintus 4:3 - Taaz Weru Witu u Nunuwu'en Tombulu

³ Sa u Nuwu' Lé'os tumoro si Yesus un ipahwoka' nai soo pahtutulapen né tou maléwo'en, niitu é masuat wo ung genang néra én tanu niapé'ampé'.

2 Korintus 4:3 ပူးပေါင်းရင်းမြစ်များ

Matius 11:25

In toro niitu si Yesus mengaléi, “Ni Aku kumuama u makasé wia ni Ko, Ama', Opo Empung u langit wo ung kaayahan, pahpaan niana é méiwuni ni Ama' im wia sé tou tulap wo lakez ang kata'uan. Taan niana é méipapailek ni Ama' wia sé tou kanaramen sé mahkii-kiit uman tanu sé koki'.

Roma 2:16

Niitu én ikatuzu'mokané witu un endo i si Opo Empung, mengiité si Kristus Yesus, i matumotoz ulit kaapa zéi'kan péléng a méikawuni witu un até né tou, mengiit u Nuwu' Lé'os tumoro si Yesus u mémoipapata'uku wia sé tou.

1 Korintus 1:18

Pahpaan im wia sé tou maléwo'en, u Nuwu' Lé'os tumoro si Yesus i nimaté witu u salip éng kalemouan. Taan im wia ni kita sé méipiloté ni Opo Empung im witu un ukuman wana a singkéla', u Nuwu' Lé'os itii un tumuzu'mé i si Opo Empung én totoz mahkawasa.

1 Korintus 2:6

Zozo' in téntu, im wia sé tou totozo lutu' i ma'éman, ni aku éng kimuamoma ung katulapan. Ung katulapan itii é méyé zéi'kan wia ung kaayahan kaapa wia sé mahkawasa wia ung kaayahan kenu sé mazéi'en.

2 Korintus 2:12

Ikaayola ni aku witi Troas i mahwoka' u Nuwu' Lé'os tumoro si Kristus, ni aku ém winukaané ni Opo Empung lalan i maayang wana.

2 Korintus 3:14

Taan sé tou Israel im puuna, um pakahgena-genang néra éng kinaapé'ampé', niitu é masuat wo un ulu néra én tanu niapé'ampé' karia u roko'. Makaz in tarékan sa séra maca am witu ung kitap Torat, niitu én zéi'kan katulapan néra, un téntu masuat wo ung genang néra éng kinaapé'ampé'. Wo sa séra ma'émano wia si Kristus, niitu taré uli-ulit katulapan néra.

2 Korintus 4:4

Sé tou itii zéi'kan ma'éman pahpaan ung genang néra éng kinawasapé' ni tonaas né sétang si kimawasa wia ung kaayahan kenu. Niitumo, zéi'kan kailekan néra u sena' u Nuwu' Lé'os tumoro ung kawangko'an ni Kristus si totoz masuat wo si Opo Empung.

1 Tesalonika 1:5

Pahpaan u Nuwu' Lé'os tumoro si Yesus un ipahtuzu' nai wia ni kamu én zéi'kan uman karia u nunuwu'en, taan karia ung kawasa ni Roh Lenas wo karia ung kaulitan u Nuwu' Lé'os un totoz kata'uan nai. Kata'uan niouo kura ni kai mahpaayang i mahsawang ni kamu, i ni kai memali-mali karia niou.

1 Timutius 1:11

mengiit u Nuwu' Lé'os ni Opo Empung si wangko' wo pahloozen, tanu u méitarawésamo wia ni aku im paayangengku.