2 Korintus 3:2 - Taaz Weru Witu u Nunuwu'en Tombulu

² Ni kamumo sé tanu um pinantikan u mahlooz ni kai, pahpaan am pinaayang nai én toro kata'uan wo pahileken né tou wana am wangun am pahwangunen niou itii. Wo niitu é mémoikapantik witu un até nai makaz péléng sé tou én toro maca wo mata'u niitu.

2 Korintus 3:2 ပူးပေါင်းရင်းမြစ်များ

Roma 1:8

Kataré-taré ni aku éng kumuama u makasé wia si Opo Empungku karia u ngaran ni Yesus Kristus pahpaan ni kamu péléng. Pahpaan péléng sé tou, wisa uman ni séra é mahsirita tumoro um pa'émanen niou.

1 Korintus 3:10

Si Opo Empung én timambéré ung kamang wia ni aku makaz ni aku si nimaéndo tanu tonaas né mahpaayang in zimeta' um watu to'tolan um walé. Sé tou walinamokan sé mangun um walé witu um wawo um watu to'tolan méizeta'ku itii. Taan sé tou mahrendai um walé witu un to'tolan itii én totoz mile-ilek i mahpaayang.

2 Korintus 11:11

Ni aku i mahloo-looz tanu niitu, zéi'kan pahpaan ni aku zéi'kan rumaraaté ni kamu. Si Opo Empung si mata'u i ni aku é rumaraaté ni kamu.

2 Korintus 12:15

Niitumo, kapaazku i méhé péleng an anuku i sumawang ni kamu, taka-takazan ung katou-touangku én iwéhéku i sumawang ni kamu. Téntu um wangunengku i mapailek i ni aku én totoz rumaraaté ni kamu, taan ni kamu én zéi'kan tahlous rumaraaté ni aku.

2 Korintus 3:1

Kaa kamu ém woo mahgenangla ni kai é mahlooz un tou nai? Kaapa ni kai é léwo'zéi' mahalimé um pinantikan u mahlooz ni kai wia ni kamu, kaapa wéhan niou um pinantikan u mahlooz ni kai, tanu am pahwangunen né tou walina?

2 Korintus 7:3

Ni aku éng kumuama in téntu, zéi'kan i mukum ni kamu, taan tanu u mémoikuaku, ni kamu ém pahwéhan nai genang. Ni kai én zéi'mo toro patampasen karia niou, ni kita é nimaesamo i menou-noupé' kaapa i matéma.

Filipi 1:7

Ni aku é mapaayo u makasé wia si Opo Empung pahpaan ni kamu ém witu un atéku. Ni aku é nimakailek ung kamang méitambér ni Opo Empung zozo' in tarékan ni aku ém binuipé'. Ni aku kangkasii é nimakailek ung kamang méitambér ni Opo Empung i mahtuzu' sa u Nuwu' Lé'os tumoro si Yesus én ulit, wia sé tou sé mahkua niitu in zéi'kan ulit, wo kasii i mangun ni séra in uli-ulit ma'éman. Ni kamu kangkasii é nimakailek ung kamang méitambér ni Opo Empung tanu ung kinailekangkumé.

1 Tesalonika 1:8

Pahpaan rengan wia ni kamu in tou Tesalonika, u Nuwu' ni Opo Empung é méikawoka'moma zéi'kan uman witi tana' Makedonia wo Akhaya, taan kangkasii u sirita tumoro kura kamu i ma'éman wia si Opo Empung é méikawoka'moma wana péléng an tampa, taka-takazan zéi'mo siapa un ikua naima tumoro niitu.