2 Korintus 11:3 - Taaz Weru Witu u Nunuwu'en Tombulu

³ Taan ikaindé'ku én taa ung genang niou é méilulu makaz kamu zéi'mo uli-ulit mahkiit si Kristus, tanu si Hawa im puuna i méilulula ni ulé' karia ung kasigaanna i mahtowo.

2 Korintus 11:3 ပူးပေါင်းရင်းမြစ်များ

Matius 24:24

Pahpaan sé zéi'kan uli-ulit Mesias wo sé zéi'kan uli-ulit nabi é méyé wo ni séra é mangun a makakompo'en zéi'mo kakuaan, wo sa toro, ni séra kasii é lumulu sé tou pinéléngo ni Opo Empung.

Yohanes 8:44

Si ama' niou é si tonaas né sétang wo ni kamu ém paaz mahwangun ang kapaaz ni ama' niou. Rengané im puuna ni sia é mahwunu' sé tou wo ni sia én zéi'kan kawisa mahwangun an ulit. Pahpaan, ni sia zéi'kan kawisa kumuala an ulit. I ni sia mahtowo, un ipahkuana ém witu un aténa a méyé, pahpaan ni sia én tantowo wo ama' péléng né tantowo.

Roma 12:8

Sa un tatambér ni Opo Empung é mahenté' un até, wangunenola niitu in uli-ulit mahenté' un até né tou walina. Sa un tatambér ni Opo Empung é mahwéhé wia sé tou walina, wangunenola niitu karia i mahpaa-paaz. Sa un tatambér ni Opo Empung é maéndo tonaas, uli-ulit wangunela niitu. Sa un tatambér ni Opo Empung é rumaraaté sé tou walina, wangunela niitu karia i mahpaa-paaz.

2 Korintus 1:12

Ni kai én totoz mahlooz ung katou-touan nai pahpaan um pahwangunen nai wia sé tou wia ung kaayahan é lé'os wo ulit. Niitu un totoz méisanapa' witu um pahile-ilekan nai karia niou. Witu ung genang lé'os nai, ni kai én totoz mata'u sa niitu é lé'os wo ulit wia si Opo Empung a méyé, niitu kangkasii én tumuzu'ma wia sé tou sa am pahwangunen nai én ulit. Wo péléng am pahwangunen nai itii én zéi'kan karia ung katulapan nai in tou, taan karia ung kamang tatambér ni Opo Empung.

2 Korintus 11:20

Ni kamu én totoz ezen sa kamu: pahata-atan néra, kaapa pahkahatan an anu niou, kaapa pahkawasaan néra, kaapa pahloo-loozan néra un tou néra wo mahsepal ni kamu.

2 Korintus 11:29

Sa wéwéhan si tou mahpendanla in zéi'kan enté', ni aku kangkasii é mahpendan in zéi'kan enté'. Sa wéwéhan si tou nimangunla sé tou walina mahwangun a singkéla', un atéku én totoz rumara.

2 Korintus 2:17

Ni kai én zéi'kan mahwangun tanu sé tou lakez walina, pahpaan ni séra i mahwoka' u Nuwu' ni Opo Empung én tanu mahwangkér i menéro uman ang kawa'ilanan néra. Taan ni kai i mahkiit si Kristus én uli-ulit mahwoka' uman u Nuwu' ni Opo Empung wia sé tou, witu u sinaru-Na wo mahkiit uman a méiperénta-Na.

2 Korintus 4:2

Taan ni kai i mahpaayang én zéi'kan mahwuni-wuni ang kaizangnokané. Ni kai kasii én zéi'kan mahtowo wia sé tou wo zéi'kan mahtuzu' an zéi'kan ulit tumoro u Nuwu' ni Opo Empung. Taan, ni kai mahtuzu' an ulit ing kumiit am paaz ni Opo Empung. Karia in téntu, péléng sé toumokan sé mahtata'ula mengiit ung genang lé'os niou witu u sinaru ni Opo Empung, sa an ipahtuzu' nai ulit kaapa zéi'kan.

Galatia 1:6

Ni aku én totoz mengompo' pahpaan ni kamu sé tinawah ni Opo Empung karia ung kamang méitambér ni Kristus én tahlous rewek timamburimé wia si Opo Empung, ang kumiit u nuwu' lé'os tumoro si Yesus un zéi'kan masuat karia un ipahwoka'ku.

Galatia 2:4

Un tumoro si Titus zéi'kan sinunat é méikakuamé pahpaan im witu ém wéwéhan sé mahkua-kua ma'éman wia si Yesus, taan un ulitna ni séra én towo, ni séra mahtututu' wo si Titus é sunaten. Ni séra é mahwuni-wuni i nimuntepé kimariala ni kai sé uli-ulit ma'émano si Kristus. Ni séra nimangunla an téntu wo séra toro mahilek apa um pahwangunenta i ni kita zéi'mo mahkiit un ukum Torat pahpaan nimaesa karia ni Kristus Yesus. Ni séra é mahtututu' wo kita ikakiit sumaup i mahwangun un ukum Torat. Sa kita ikakiitla, ni kita én tanu pahata-atan un ukum Torat itii.

Galatia 3:1

É kamu tou ma'éman witi Galatia sé lemou! Séi si rimiarala ni kamu taka-takazan ni kamu én timamburimola wia si Yesus Kristus? Zéi'kankuaa méipapata'ukumola lumé'o-lé'os wia ni kamu tumoro si Yesus Kristus si nimaté witu u salip itii?

Galatia 4:11

Ikaindé'ku én taa am pinaayangku wia ni kamu én zéi'kan siapa torona.

Efesus 4:14

Karia in téntu ni kita én zéi'mo tanu sé koki' sé mahkii-kiit uman an tutuzu' nimahwali-walinaan né menunuzu' towo. Niitu én tanumokan u sempa' pemolé-moléi u reges. Ni séra mahlululu uman karia an towo néra.

Efesus 4:22

Niitumo, tumoro ung katou-touan niou im puuna, ni kamu é léwo'zéi' in tumula'u ung katou-touan im puuna itii. Ung katou-touan itii é nimangun uman ni kamu méikaléwo' pahpaan méilulu u lelo léwo' un awak,

Efesus 6:24

Ung kamang tatambér ni Opo Empung é menaté-natér ni kamu péléng sé zéi'kan mazéi' i rumaraaté si Yesus Kristus Mahpiarata.

Kolose 2:18

Tia' ipahwaya niou ung kukulu makailekan niou in zéi'en umana né tou sé mahtowo-towo i meroros un tou néra wo mahongkot wia sé malaekat. Ni séra é mapahlolooz un tou néra im wana am pina'ilek néra un tanu im pahipi-ipin, zozo' niitu én zéi'kan uli-ulit téntu. Ni séra é mahlolooz un tou néra karia am pegena-genangen néra u mahkiit uman ung kapaaz ung kaayahan.

Kolose 2:4

Niia é méipapata'ukuma, wo zéi'kan siapa im wia ni kamu si toro towoan né tou walina pahpaan a nuwu' eenou néra.

Kolose 2:8

Mile-ilek, én taa wéwéhan sé maheenou ni kamu karia an tutuzu' néra an zéi'kan siapa torona wo mahlululu uman um pa'émanen niou um wia si Kristus. An tutuzu' néra én zéi'kan mahkiit an tutuzu' ni Kristus, taan mahkiit uman ang kinanaram né nimaopo néra im puuna wo ung kapaaz né roh wia ung kaayahan.

1 Tesalonika 3:5

Pahpaano niitu, ni aku nimatuma si Timotius i mangé wia ni kamu, pahpaan ni aku én zéi'mo makaezen i mahtata'u um pa'émanen niou. Kaarétku én taa kamu nienouola ni tonaas né sétang makaz ni kamu zéi'mo ma'éman wia si Yesus. Sa mamuali téntu, am pinaayang nai im puuna én zéi'kan siapa torona.

1 Timutius 1:3

I ni aku mahangémo witi Makedonia, ni ko én totoz pinahaléikula i mento'mola witi Efesus, wo ko toro suméro' sé mahtuzu' an tutuzu' zéi'kan ulit wo séra kumana' i mahtuzu' an tutuzu' itii.

1 Timutius 2:14

Wo kasii, zéi'kan si Adam si tinowoan ni tonaas né sétang, taan si Hawa si tinowoanna a mangun a sinéro' ni Opo Empung.

2 Timutius 3:13

taan sé tou léwo' wo tantowo kahuman éng kalousna i mahwangun a léwo'an, ni séra mahlulu sé tou wo ilulu né tou walina.

Titus 1:10

Pahpaan in tarékan im wia sé jamaat é lakezo sé mahsasarumokan, kataré-taré é sé im wia sé tou Yahudi sé ma'émano taan mahkiitpé' an tinotoz im pahsunaten. Ni séra menuwu-nuwu' an towo i mahlululu sé tou.

Ibrani 13:9

Tia' kamu mahkiit péléng an tutuzu' a nimahwali-walinaan an zéi'kan siapa kaulitan mengiit u Nuwu' Lé'os tumoro si Yesus, an ipahtuzu' né tou walina an toro mangun ni kamu ikalulu. Un atéta é léwo'zéi' nienté' karia ung kamang méitambér ni Opo Empung, pahpaan niitumo um wangun, zéi'kan karia an tinotoz tumoro ang kakanen an zéi'kan siapa torona im wia ni séra sé mahkiit niitu.

2 Petrus 3:17

Taan ni kamu, katuari-katuari ikararaatéku é mata'umo niana. Niitumo mile-ilek én taa kamu ikakiit umanla sé méster towo sé méikalulu pahpaan an tutuzu' towo itii, makaz ni kamu zéi'mo ma'éman im wana an tutuzu' kaulitan.

2 Petrus 3:3

Un ipahpuu-puuna ing kata'uan nioula én téntii: Im wana an endo kaakazan ung kaayahan, mahondolé sé tou tampenéro' karia a séséro' néra, sé menou-nou mahkiit uman a lelo léwo' un awak.

1 Yohanes 2:18

É kamu in oki'ku, in tarékan é merétémoma ung kaakazan ung kaayahan, wo tanu an tinalinga niouo i si kakoro' ni Kristus é méyé, wo in tarékan lakez sé kakoro' ni Kristus ém wiamo. Nianamo an tumuzu'mé wia ni kita sa un oras kenu én uli-ulit merétémoma ung kaakazan ung kaayahan.

1 Yohanes 4:1

Katuari-katuari ikararaatéku, péléng sé roh én tia' pa'émanen niou, taan pahtata'ula lumé'o-lé'os sé roh itii, sa sé roh itii ém wia si Opo Empung a méyé kaapa zéi'kan. Pahpaan lakez sé nabi towo sé nimapaileko un tou néra wo mahliklik ung kaayahan.

Yudas 1:4

Pahpaan mémoikatuzu'mé im wéwéhano sé tou mahwuni-wuni kimariala ni kamu. Ni séra én urémo tinotoz in ukumen. Ni séra é sé tou zéi'kan pandung si Opo Empung wo mahséa' u raraatéan-Na, wo séra toro menou-nou mengiit u lelo léwo' un awak. Ni séra kasii é soo makaulit i si Yesus Kristus si Mahkawasa wo si Mahpiarata én esa uman.

Wahyu 12:15

A si naga itii mukama u sumahna a mondolé un zano, ung kalakezna én tanumokan un zano witu u so'so'an totoz tember, méisaruma wia si wéwéné itii i mahaayuz ni sia.

Wahyu 12:9

Si naga tua'na itii é si ulé' tu'a, si pahkuan kangkasii in tonaas né sétang kaapa si sétang mahlulu sé tou. Ni siamo si limulu péléng sé tou wia ung kaayahan wo ni sia kasii méilombo'mé wia ung kaayahan karia né malaekatna.

Wahyu 20:2

Si naga, si ulé' tu'a itii, si pahkuan tonaas né sétang wo sétang mahlulu sé tou én tinionan ni malaekat itii. Si naga itii é niapusna sana riwuna ta'un ung kauréna.