1 Yohanes 2:6 - Taaz Weru Witu u Nunuwu'en Tombulu

⁶ Séi si mahkua i ni sia é menou-nou karia ni Opo Empung, ni sia é léwo'zéi' i menou-nou tanu ung katou-touan ni Kristus.

1 Yohanes 2:6 ပူးပေါင်းရင်းမြစ်များ

Matius 11:29

Kumiitola um perénta-Ku tanumokan i masaan um pasangan méipasaan-Ku, wo mahtata'umé wia ni Aku, pahpaan ni Aku én eluz uman wo roros até, wo si rohmu é makailek ung kaenaan.

Yohanes 13:15

Ni Aku mahwéhéma wia ni kamu ung kékéréan, wo ni kamu kangkasii é mahwangunla am winangun-Kumoma wia ni kamu.

Yohanes 15:10

Sa ni kamu mahkii-kiit am perénta-Ku, ni kamu é menou-nou in tou sé karaaté-Ku. Tanu ni Aku i mahkii-kiit am perénta ni Ama'-Ku wo ni Aku é menou-nou in tou si karaaté-Na.

1 Korintus 11:1

Wangunela um pahwangunengku tanu ni aku i mahwangun um pahwangunen ni Kristus.

Efesus 5:2

wo menou-noula karia i mahraa-raatéan tanu si Kristus Yesus rimaraatémo ni kamu. Ni Sia nimayomo un tou-Na wia ni kita, nimaté witu u salip i maéndo tanu u raragés wo sé tatamun kineriz in ipahragés a mahwou tariis, u nimangun un até ni Opo Empung mahpaa-paaz.

1 Petrus 2:21

Ni kamu én tinawah-Namé i mahwangun a lé'os zozo' in zézéha. Pahpaan si Kristus kangkasii é nimazézéhamé pahpaan ni kamu wo timula'umoma ung kékéréan ing kiitan niou.

1 Yohanes 2:28

Niitumo in tarékan, é kamu sé oki'ku, ni kamu é léwo'zéi' i menou-nou nimaesa karia ni Kristus, wo sa Sia méyémo sumaup im witu un endo itii, ni kita én zéi'kan maindé' wo zéi'kan maizang wia ni Sia.

1 Yohanes 2:4

Séi si mahkua, “Ni aku é mata'u ni Sia”, taan zéi'kan mahkiit am perénta-Na, ni sia én tantowo wo im wia ni sia én zéi'kan siapa ang kaulitan.

1 Yohanes 3:24

Séi si mahkiit peléng a méiperénta-Na, ni sia é nimaesa karia ni Opo Empung wo si Opo Empung é nimaesa kariana. Karia in téntu, ni kita én toro mata'ula i si Opo Empung é nimaesa kariata, pahpaan ni Sia én timambéromé si Roh-Na wia ni kita.

1 Yohanes 3:6

Niitumo, péléng sé tou menou-nou nimaesa karia ni Kristus, zéi'mo memua-muali a singkéla'. Sé tou memua-muali a singkéla' én zéi'kan mahilek-ilekla wo zéi'kan mahta'u-ta'ula ni Sia.

1 Yohanes 4:17

Im wana ang kenumo u raraatéan ni Opo Empung nimalekep witu ung katou-touanta, sa kita wuaya i ma'éman im witu un endo si Opo Empung in tumotoz ulit kaapa zéi'kan am pahwangunen né tou. Pahpaan tanu si Yesus Kristus, ni kita kangkasii ém wia ung kaayahan kenu.