1 Timutius 5:17 - Taaz Weru Witu u Nunuwu'en Tombulu

¹⁷ Sé penatua sé uli-ulit mahpaayang am papaayangen néra é léwo'zéi' makailek u sisigi'an u makazuamé, lumouspé' kasiimé é sé siga' i mahwoka' u Nuwu' ni Opo Empung wo i mahtuzu' sé jamaat.

1 Timutius 5:17 ပူးပေါင်းရင်းမြစ်များ

Matius 24:25

Gena-genangen! Niitu é mémoikua-Ku wia ni kamu puunala niitu i mamuali.

Lukas 10:7

Sa kamu sungkulela ni makawalé, ni kamu é mento'mola witu um walé itii wo tia'mo mahééra wana am walé walina, wo kuman wo melepola apa uman un iwéhéla ni makawalé. Pahpaan si tou mahpaayang ém wangun i makailek um wawaér.

Lukas 12:42

Si Yesus mingkotla, “Séi si ata mahtali-talinga wo tulap si éndon ni tuangna i maéndo tonaas né ata walina wo mahimek ung kanen né ata itii in orasnamo ing kuman?

Yohanes 4:38

Ni Aku nimatuma ni kamu i mupu' witi uma un zéi'kan winendu niou; sé tou walina sé nimendu wo ni kamu sé mémupu' um winendu néra.”

Kisah Rasul-rasul 11:30

Am pakaréwoken nérala a sasawang, an totozen nérala si Barnabas wo si Saulus i mahali niana wia sé penatua witi tana' Yudea.

Kisah Rasul-rasul 20:35

Im wana am péléng ni kamu ém winéhangkumoma ung kékéréan, karia i mahpaayang tanu niitu ni kita én toro sumawang sé tou susa. Ni kita é léwo'zéi' ing gumenang u méikua ni Yesus Mahpiara in téntii, ‘Si tou mahwéhépé' si mahpaa-paaz taan si tou pahwéhan.’ ”

Kisah Rasul-rasul 28:10

Sé tou witu én totozo mahsigi' ni kai. I ni kai mangémo, péléng am pemandungen nai ém pinakaimek nérala.

Roma 12:8

Sa un tatambér ni Opo Empung é mahenté' un até, wangunenola niitu in uli-ulit mahenté' un até né tou walina. Sa un tatambér ni Opo Empung é mahwéhé wia sé tou walina, wangunenola niitu karia i mahpaa-paaz. Sa un tatambér ni Opo Empung é maéndo tonaas, uli-ulit wangunela niitu. Sa un tatambér ni Opo Empung é rumaraaté sé tou walina, wangunela niitu karia i mahpaa-paaz.

Roma 15:27

Karia i mahpaa-paaz ni séra timotozla i mangun un téntu. Taan pahilekengkula ni séra é léwo'zéi' sumawang sé tou zéi'kan siapa apa itii. Pahpaan, sa sé tou Yahudi é niméténgo wia sé tou zéi'kan Yahudi ung kamang in timalinga u Nuwu' Lé'os tumoro si Yesus, tantumo sé tou zéi'kan Yahudi sé ma'éman é léwo'zéi' i sumawang sé tou Yahudi karia i méhéla wia ni séra am pemandungen néra.

Roma 16:12

U sigi'ku wia si Trifena wo si Trifosa. Ni séra é ma'ulit i mahpaayang wia si Mahpiara. U sigi'ku kangkasii wia si Persis ikararaatéku. Ni sia kangkasii én totozo nima'ulitla i mahpaayang wia si Mahpiara.

1 Korintus 15:10

Taan si Opo Empung timambéré ung kamang wia ni aku makaz ni aku in tarékan é niéndo aatu ni Yesus, makaz ung kamang méitambér-Na wia ni aku ém wéwéhan torona. Lumouspé'mé niitu, im wia sé aatu-Na, ni aku si totoz nima'ulit i mahpaayang taan sé aatu walina. Taan am pinaayangku itii, zéi'kan pahpaan ung ketezku in esa, taan pahpaan ung kamang méitambér ni Opo Empung wia ni aku makaz ni aku makawawa i maayang am paayangen itii.

1 Korintus 16:16

mahtali-talingala wia sé tou sé tanu ni séra. Ni kamu kasii é mahtali-talingala sé tou sé mahpaayang karia néra, sé totoz ma'ulit mahsawang sé tou ma'éman.

1 Korintus 3:9

Ni kai éng kapaayang ni Opo Empung. Ni kamu én tanu an uma ni Opo Empung wo tanu um walé winangun ni Opo Empung.

2 Korintus 6:1

Ni kai éng kapaayang ni Opo Empung, niitumo ni kai sumésama wia ni kamu, tia' ung kamang méitambér ni Opo Empung ung kinailekan niouo én zéi'kan siapa torona.

Galatia 6:6

Si tou si nimakailek an tutuzu' tumoro u Nuwu' ni Opo Empung, péléng am wangun ang kinailekannamé é léwo'zéi' im pahwéténgla wia si niméhémé an tutuzu' tumoro u Nuwu' ni Opo Empung itii.

Filipi 2:16

Ni kamu én tumio-tion witu u Nuwu' ni Opo Empung u mahwéhémé ung katou-touan. Karia in téntu, im witu un endo si Yesus Kristus i mawurimé sumaup, ni aku én toro mahpaa-paaz. Ni aku én toro mahpaa-paaz pahpaan um pinaayangku wo um pahtututu'engku ém wéwéhan torona.

Filipi 2:29

Niitumo, sungkulela sia karia i mahpaa-paaz pahpaan ni sia éng katuari esa pa'émanen wo pahsigi'ela sé tou tanu ni sia.

Filipi 4:3

Pahaléiengku kasii wia si Sunsugos, si kakariaku totoz mahtali-talinga: Pahsawangampé'la si Euodia wo si Sintikhe, wo sé wéwéné zua itii malé'osala. Pahpaan ni séra é simawango ni aku karia ni Klemens wo sé kapaayangku walina i mahwoka' u Nuwu' Lé'os. Pahpaan ni séra péléng é ma'émano wia si Yesus wo nimakaileko ung katou-touan makaz ing kauré-uré, niitumo a ngaran néra é méikapantiko witu ung kitap katou-touan.

1 Timutius 3:5

Pahpaan sa sia zéi'kan mata'u mahime-imek sé sana awuna karia im wangun, kura sia i mimek sé jamaat ni Opo Empung?

1 Timutius 4:10

Pahpaano niitu ni kita mahtututu' wo ma'ulit i mahpaayang, pahpaan ni kita niméré' uman wia si Opo Empung si Menou-nou, si nimilot péléng sé tou im witu un ukuman wana a singkéla', sé pahpuu-puuna é sé tou ma'éman wia ni Sia.

1 Timutius 4:14

Tia' kaliu-liuzannu i maké an tatambér méiwéhémo ni Roh Lenas wia ni ko mengiité u méikua ni Opo Empung wia sé penatua, i ni séra zimeta'ma a lengen néra wia ni ko.

1 Timutius 4:16

Ime-imeken ung katou-touannu wo an tutuzu'mu. Tia' ko mazéi' i mahwangun niana péléng, pahpaan karia in téntu ni ko toro tumulung un toumu wo péléng sé tou mahtalinga an tutuzu'mu, im witu un ukuman ni Opo Empung.

1 Timutius 4:6

Timotius, niitu péléng én totoz in ipahtuzu'mula wia sé katuari esa pa'émanen, wo séra zéi'kan kumiit an tutuzu' zéi'kan ulit. Karia in téntu, ni ko é maéndo memamaayang ni Kristus Yesus si lé'os uman. Sa ko mangunla un téntu, um pa'émanennu éng kaenté'na pahpaan rengan im puuna é mahkiit an tutuzu' ulit.

1 Timutius 5:19

Tia' pahtalinganu am pahtoké wia si penatua. Taan sa wéwéhan zua kaapa telu tou nimilek wo mahkuamé a niilek néra tumoro am pahtoké itii, taré toro talinganu u méitoké itii.

1 Timutius 5:3

Pahsigi'ela sé wéwéné mahesa-esamokan sé uli-ulit menou-nou mengesa-ngesamokan.

2 Timutius 2:6

Si mememendu si nima'ulitola nimaayang, ni sia si kataré mé'an am wua'na am pinaayangnamé.

2 Timutius 4:2

Ipahwoka'la u Nuwu' ni Opo Empung, zozo' in endo wangun kaapa endo léwo', ni ko é mimekla i mangé mahwoka' u Nuwu' ni Opo Empung. Ipapata'ula ang kasumalaan, pahséro'ela wo pahsésaala sé tou karia péléng ung kaezenan wo an tutuzu' ulit.

Ibrani 13:17

Pahtali-talingala sé tonaas niou wo mahkii-kiitla ni séra, pahpaan si Opo Empung si niméhé um paayangen wia ni séra in tuméiz um pa'émanen niou in tou mahwangun a méiatu ni Opo Empung. Karia in téntu, ni séra i mahtéiz um pa'émanen niou éng karia i mahpaa-paaz, zéi'kan karia i mema'o-ma'os. Pahpaan sa séra mema'o-ma'os, um pahpaayangen néra én zéi'kan siapa torona im wia ni kamu.

Ibrani 13:24

Ipapaayopé'la u sigi'ku wia péléng sé tonaas niou wo wia péléng sé tou linenas ni Opo Empung. Sé katuari esa pa'émanen sé wia Italia é mapaayoma u sigi' wia ni kamu.

Ibrani 13:7

Genangen nioula sé tonaas niou im puuna sé nimahwoka'momé u Nuwu' ni Opo Empung wia ni kamu. Wéhan nioula genang kura ung katou-touan néra makaz ni séra i nimaté wo kéréala um pa'émanen néra.