1 Timutius 1:14 - Taaz Weru Witu u Nunuwu'en Tombulu

¹⁴ Taan lumouspé'mé niitu, ung kamang méitambéré ni Mahpiarata wia ni aku én totozo lakez, makaz ni aku ma'éman wia ni Sia wo rumaraaté sé kasuat tou pahpaan nimaesamo karia ni Kristus Yesus.

1 Timutius 1:14 ပူးပေါင်းရင်းမြစ်များ

Matius 20:9

A méyé sé nimendu rengané in jam kalima im wengindo, ni séra si esa wo si esa é nimakailek um wawaér esa dinar.

Kisah Rasul-rasul 15:11

Taan pa'émanenta i ni kita én ipilot im witu un ukuman wana a singkéla' tanu ni séra, mengiité ung kamang tatambér ni Yesus Kristus Mahpiarata.”

Roma 16:20

Si Opo Empung si mahwéhémé ung kaluasan witu un até é rengan ing kumemuma si tonaas né sétang wo mangun ni sia ing kawasaan niou. Mengalé-ngaléi uman, ung kamang tatambér ni Yesus, si Mahpiarata é menaté-natér ni kamu!

1 Korintus 15:10

Taan si Opo Empung timambéré ung kamang wia ni aku makaz ni aku in tarékan é niéndo aatu ni Yesus, makaz ung kamang méitambér-Na wia ni aku ém wéwéhan torona. Lumouspé'mé niitu, im wia sé aatu-Na, ni aku si totoz nima'ulit i mahpaayang taan sé aatu walina. Taan am pinaayangku itii, zéi'kan pahpaan ung ketezku in esa, taan pahpaan ung kamang méitambér ni Opo Empung wia ni aku makaz ni aku makawawa i maayang am paayangen itii.

1 Korintus 3:10

Si Opo Empung én timambéré ung kamang wia ni aku makaz ni aku si nimaéndo tanu tonaas né mahpaayang in zimeta' um watu to'tolan um walé. Sé tou walinamokan sé mangun um walé witu um wawo um watu to'tolan méizeta'ku itii. Taan sé tou mahrendai um walé witu un to'tolan itii én totoz mile-ilek i mahpaayang.

2 Korintus 4:15

Péléng niitu é mamuali pahpaan ung kawangunan niou. Niitu mamuali wo lakez sé tou mamé'an ung kamang tatambér-Na. Karia in téntu, kalakezna sé tou mahkua u makasé wia si Opo Empung. Ang kenu é mangun ing kalakezna sé tou mahsigi' si Opo Empung.

2 Korintus 8:9

Ni kamu é mata'umo ung kamang méitambér ni Yesus Kristus si Mahpiarata wia ni kamu. Ni Sia im wa'ilan, winangun-Na un tou-Na zéi'kan siapa apa pahpaan ni kamu, wo kamu toro mawa'ilan pahpaan winangun-Na un tou-Na in zéi'kan siapa apa.

Galatia 1:13

Tantumo ni kamu én timalingamo tumoro ung katou-touangku im puuna, i mahkiitpé' an tinotoz um pa'émanen né tou Yahudi. In toro niitu ni aku én zéi'kan kumana' i mahzézéha sé jamaat ni Opo Empung wo mahtututu' i mahzézéi' ni séra.

1 Tesalonika 1:3

Sekez kai i mengaléi wia si Opo Empung wo si Ama'ta, ni kamu ém pegena-genangen nai pahpaan am pahpaayangen niou i ma'éman wo kura kamu i mahsawang sé tou walina pahpaan rumaraaté ni séra wo kasii pahpaan ung kaezenan niou i mahéré' wo ma'éman uman wia si Yesus Kristus Mahpiarata, zozo' in zézéha.

1 Tesalonika 5:8

Taan ni kita sé menou-nou in endo é léwo'zéi' tuméga-tégam. Wangunela um pa'émanenta wia si Yesus wo u raraatéanta wia sé katuari esa pa'émanen maéndo tanu ung karai uaséi ing kimelung um wezwezta wo um pahéré'anta i ni kita én ipilot im witu un ukuman wana a singkéla', maéndo tanu um porong ing kumelung un ulu.

1 Timutius 2:15

Taan zozo' in téntu, si wéwéné én ipilot im witu un ukuman wana a singkéla' pahpaan in timoumé si koki', asal uman sia zéi'kan mazéi' i ma'éman wia si Kristus, rumaraaté si kasuat tou, ung katou-touanna é linenas ni Opo Empung wo ung katou-touan un zéi'kan tahlouso.

1 Timutius 4:12

Tia' wo wéwéhan sé tou mahgenangla i ni ko én tou roros pahpaan ni ko ém weru tou. Mahtututu'la i maéndo kékéréan wangun né tou ma'éman wia si Opo Empung, wana an ipahkuamu, wana am pemangu-mangunennu, wana a raraatéannu, witu um pa'émanennu wo witu ung katou-touannu un zéi'kan penéro-néro'an né tou.

1 Timutius 6:11

Taan ni ko in tou ni Opo Empung, zumou-zou' im wana péléng niitu, mahtututu'la in zéi'kan mahsanaweka, mahragésla wia si Opo Empung, tia' mazéi' ma'éman wia ni Sia, rumaraaté sé kasuat tou, ezen wana an zézéha wo eluz uman wia si kasuat tou.

2 Timutius 1:13

Pahkiitela lumé'o-lé'os péléng an tutuzu' mémoituzu'ku wia ni ko. An tutuzu' itii ém wangunela kékéréan an tutuzu' kaulitan. Wo pahwangunela niitu karia um pa'émanen wo u raraatéan pahpaan i nimaesamo karia ni Kristus Yesus.

2 Timutius 2:22

Pahpaano niitu, ma'katla im wana a lelo léwo' un awak né weru tou. Mahtututu'la i mahkiit um paaz ni Opo Empung, ma'éman an tutuzu'-Na, rumaraaté si kasuat tou wo mahlé'o-lé'osan karia néra sé mengaléi wia si Opo Empung i mekitulung karia un até weresi.

Titus 2:2

Sésaala sé tuama tu'amo wo séra mahime-imek un tou néra, pahsigi'en né tou, tulap, zéi'kan mazéi' i ma'éman, zéi'kan mazéi' rumaraaté si kasuat tou wo ezen witu un zézéha.

1 Petrus 1:3

Loozela si Opo Empung, si Ama' ni Yesus Kristus Mahpiarata. Pahpaan ung kawangko'an u raraatéan-Na makaz ni kita én toro nimakailek ung katou-touan weru mengiité si Yesus Kristus si méitoumé sumaup ni Opo Empung im wia sé nimaté. Niitu u mahenté' um pahéré'anta i menou-nou.

1 Yohanes 4:10

Ung kenumo u raraaté itii: Zéi'kan ni kita sé rimaraatémo si Opo Empung, taan si Opo Empung si rimaraatémo ni kita wo nimatu si Oki'-Na in zuméi' a singkéla' pahlé'osenta.

Wahyu 22:21

Ung kamang tatambér ni Yesus Mahpiara é menaté-natér ni kamu péléng! Amin.