1 Timutius 1:11 - Taaz Weru Witu u Nunuwu'en Tombulu

¹¹ mengiit u Nuwu' Lé'os ni Opo Empung si wangko' wo pahloozen, tanu u méitarawésamo wia ni aku im paayangengku.

1 Timutius 1:11 ပူးပေါင်းရင်းမြစ်များ

Lukas 2:14

“U sigi' wo u looz én iwéhé uman wia si Opo Empung si witi kaséndukan! Wo ung kaluasan witu un até wia sé tou wia ung kaayahan, sé mahwangun si Opo Empung mahpaa-paaz.”

Roma 2:16

Niitu én ikatuzu'mokané witu un endo i si Opo Empung, mengiité si Kristus Yesus, i matumotoz ulit kaapa zéi'kan péléng a méikawuni witu un até né tou, mengiit u Nuwu' Lé'os tumoro si Yesus u mémoipapata'uku wia sé tou.

1 Korintus 9:17

Sa aku mahwoka' u Nuwu' Lé'os tumoro si Kristus pahpaan um paazku uman, ni aku é léwo'zéi' i makailek um wawaér. Taan ni aku i nimangun niitu zéi'kan pahpaan um paazku in esa. Si Opo Empung si niméléng ni aku an aku iatu-Na i mahwoka' u Nuwu' Lé'os itii.

2 Korintus 4:4

Sé tou itii zéi'kan ma'éman pahpaan ung genang néra éng kinawasapé' ni tonaas né sétang si kimawasa wia ung kaayahan kenu. Niitumo, zéi'kan kailekan néra u sena' u Nuwu' Lé'os tumoro ung kawangko'an ni Kristus si totoz masuat wo si Opo Empung.

2 Korintus 4:6

Im puuna si Opo Empung éng kimua in téntii, “Im witu u rimbengbeng a mondolé un ayah!” In tarékan ni Sia kangkasii si nimangun un ayah-Na mahsena' witu un atéta wo toro kata'uantala ung kawangko'an-Na. Ung kawangko'an ni Opo Empung én toro ilekenta witu ung gio ni Yesus Kristus.

Galatia 2:7

Lumousé niitu, in toro niitu kinata'uan nérala i ni aku é winéhan paayangen i mahwoka' u Nuwu' Lé'os tumoro si Yesus wia sé tou zéi'kan Yahudi, tanu si Petrus im winéhan paayangen i mahwoka' u Nuwu' Lé'os tumoro si Yesus wia sé tou Yahudi.

Efesus 1:12

Karia in téntu, ni kita sé im puuna niméré' uman wia si Kristus é lumooz ni Sia pahpaan ung kawangko'an-Na.

Efesus 1:6

Niitumo, ni Sia ém pahloozen pahpaan ung kamang méitambér-Na én totoz wangko'. Niitu méiwéhé-Na wia ni kita mengiité si Yesus Kristus si Oki'-Na si ikararaaté-Na.

Efesus 2:7

Si Opo Empung mangun niitu, wo in tumondong sé tou toro milek u raraatéan-Na un zéi'mo kakuaan wo u lé'os-Na wia ni kita pahpaan nimaesa karia ni Kristus Yesus.

Efesus 3:10

Wo mengiité sé jamaat, si Opo Empung in tarékan toro mapata'u ang ginenang-Na tumoro péléng ang katulapan-Na wia sé mahperénta wo sé mahkawasa witi kasendukan.

Kolose 1:25

Ni aku é méiatumo ni Opo Empung i mahpaayang wia sé jamaat, mengiit um paayangen méiwéhé-Na wia ni aku ing kumua péléng a Nuwu'-Na wia ni kamu.

1 Tesalonika 2:4

Taan si Opo Empung niméhé um paayangen wia ni kai i mahwoka' u Nuwu' Lé'os tumoro si Yesus, pahpaan pahgenangen-Nala i ni kai ém wangun i maayang niitu. Niitumo ni kai i mahnuwu'ma én zéi'kan i mangun un até né tou mahpaa-paaz, taan i mangun un até ni Opo Empung mahpaa-paaz. Ni Sia si mahtata'u un até nai.

1 Timutius 2:7

Pahpaano niitu, ni aku tinotoz ni Opo Empung i maéndo aatu-Na i mahwoka' u Nuwu' Lé'os wo mahtuzu' wia sé tou zéi'kan Yahudi tumoro um pa'émanen wia si Yesus wo ung kaulitan. Peléng a méikuaku kenu én ulit! Ni aku én zéi'kan mahtowo.

1 Timutius 6:15

witu un endo totozen ni Opo Empung. Ni Sia uman si Mahkawasa wo mawuta-wuta ung kamang, Kolano péléng né kolano wo Tuang péléng né tuang.

1 Timutius 6:20

Timotius, pahilekela lé'os péléng a mémoitarawésa wia ni ko. Tia' mahkii-kiit i mahsirita an zéi'kan siapa torona wo an zéi'kan mahsigi' si Opo Empung wo a mahzéi-zéi'an tumoro ang kata'uan,

2 Timutius 1:11

U Nuwu' Lé'os itiimo u nimangun ni aku tinotoz ni Opo Empung maéndo mahwoka', maéndo aatu wo méster.

2 Timutius 1:14

Wo karia u sasawang ni Roh Lenas si menou-nou witu un atéta, téi-téizan a sangkum totoz wangun a mémoiwéhé wia ni ko.

2 Timutius 2:2

An tinalingamumo wia ni aku witu u saru-sarun né tou lakez, itarawésala wia sé tou toro tarawésaan niitu, sé siga' kangkasii i mahtuzu' sé tou walina.

Titus 1:3

Im witu un oras tinotoz-Na, ni Sia nimapaileko u Nuwu'-Na mengiité u Nuwu' Lé'os tumoro si Yesus u méitarawésa in iwoka'ku mengiit um perénta ni Opo Empung, si nimilot ni kita im witu un ukuman wana a singkéla'.