1 Tesalonika 3:2 - Taaz Weru Witu u Nunuwu'en Tombulu

² An iatu naima si Timotius i mangé wia ni kamu. Ni sia éng katuarita esa pa'émanen wo kapaayang nai i mahpaayang wia si Opo Empung i mahwoka' u Nuwu' Lé'os tumoro si Kristus. Ni sia méiatu naima i mamenté' un até niou wo sumésa wia ni kamu, wo kaenté'na um pa'émanen niou.

1 Tesalonika 3:2 ပူးပေါင်းရင်းမြစ်များ

Kisah Rasul-rasul 16:1

A si Paulus mangé kasii witi Derbe wo Listra. Im witu, wéwéhan si mahkiit si Yesus makangaran Timotius. Si ina'na én tou Yahudi si ma'émano wia si Yesus wo si ama'na én tou Yunani.

Kisah Rasul-rasul 16:5

Karia in téntu, um pa'émanen né jamaat éng kaenté'namo. Wo sekez in endo, sé tou ma'éman éng kalakeznamo.

Kisah Rasul-rasul 18:5

I si Silas wo si Timotius niméyé im witi Makedonia, péléng un témpo ni Paulus ém pahpakén uman i mahwoka' u Nuwu' Lé'os wo mahkua am pina'ilek wo an tinalingana wia sé tou Yahudi, i si Yesus é si Mesias.

Roma 16:21

Si kapaayangku, si Timotius é méhéma u sigi'na. Téntu kangkasii sé kakaria kawanuaku si Lukius, si Yason wo si Sosipater.

1 Korintus 3:10

Si Opo Empung én timambéré ung kamang wia ni aku makaz ni aku si nimaéndo tanu tonaas né mahpaayang in zimeta' um watu to'tolan um walé. Sé tou walinamokan sé mangun um walé witu um wawo um watu to'tolan méizeta'ku itii. Taan sé tou mahrendai um walé witu un to'tolan itii én totoz mile-ilek i mahpaayang.

1 Korintus 4:17

Pahpaano niitu si Timotius méiatukuma i mangé wia ni kamu. Ni sia én tou ma'éman wia si Opo Empung, ni sia én tanumokan oki'ku totoz ikararaatéku wo ni sia ém pa'émanengku. Ni sia si mapagenang wia ni kamu kura ung katou-touangku i nimaesa karia ni Kristus Yesus, tanu a méipahtuzu'ku wia sé jamaat wisa uman um pahwéha-wéhan néra.

2 Korintus 1:1

Um pinantik kenu ém wia ni aku Paulus wo si Timotius si katuarita esa pa'émanen a mangé. Witu um paaz ni Opo Empung ni aku én tinawah i nimaéndo aatu ni Kristus Yesus. Um pinantik kenu én iwéhé wia sé jamaat ni Opo Empung witi Korintus wo péléng sé tou linenas ni Opo Empung witi Akhaya.

2 Korintus 1:19

Pahpaan, si Yesus Kristus, si Oki' ni Opo Empung si méipahwoka'ku karia ni Silwanus wo ni Timotius wia ni kamu én zéi'kan mahkua ‘éné’ wo witu ung ginenang én ‘zéi'kan’. Taan im wia ni Sia én akaz uman mahkua ‘éné’.

2 Korintus 2:12

Ikaayola ni aku witi Troas i mahwoka' u Nuwu' Lé'os tumoro si Kristus, ni aku ém winukaané ni Opo Empung lalan i maayang wana.

2 Korintus 2:13

Taan un atéku én zéi'kan katu'tulan, pahpaan zéi'kampé' nimahilekan wo si Titus, si katuari esa pa'émanen. Pahpaano niitu, ni aku timuzu'la a mangé witi Makedonia.

2 Korintus 8:23

Tumoro si Titus, ni sia éng kakariaku wo kapaayangku i mahsawang ni kamu. Tumoro sé zua tou ma'éman sé mahwali wo si Titus, ni séra é méiatu né woopira jamaat i mangé witi Yudea. Pahpaan am pinaayang néra, si Kristus é loozen wo sigi'en.

Filipi 1:25

Tumoro ung kenu én totoz ing kata'uangku: I ni aku é memia-mia wo mamemali-mali karia niou péléng i sumawang ni kamu, wo kamu kaenté'na wo mahpaa-paaz witu um pa'émanen niou.

Kolose 1:1

Um pinantik kenu ém wia ni aku Paulus wo si Timotius si katuarita esa pa'émanen a mangé. Witu um paaz ni Opo Empung ni aku én tinawah i maéndo aatu ni Kristus Yesus.

Kolose 1:7

Si Epafras si kapaayang totoz ikararaaté nai, ni sia si timuzu' niana péléng wia ni kamu. Im wia ni kamu, ni sia én ata ni Yesus Kristus si toro pa'émanen.

Kolose 4:12

U sigi' ni Epafras wia ni kamu; ni sia én tou esaané wia ni kamu, ata ni Kristus Yesus, ni sia én zéi'kan mazéi' i mahpengaléi ni kamu, wo ni kamu enté' im wana am pa'émanen, in tanu tou lutu'mo wo uli-ulit ma'éman wo mata'u péléng ang kapaaz ni Opo Empung.

Kolose 4:9

Ni sia é mangé karia ni Onesimus, si katuari esa pa'émanen, si esaané im wia ni kamu. Ni sia kasii én tou mahtali-talinga uman wo ni kai é rumaraaté ni sia. Ni séra zua é makumua wia ni kamu péléng a nimamuali wia un tampa nai kenu.

1 Tesalonika 3:13

Mengalé-ngaléi uman, si Opo Empung Ama'ta é menté' un até niou, wo ni kamu zéi'kan siapa pahséro'an wo lenas im witu u sinaru-Na, i si Yesus si Mahpiarata mémahwali-wali karia péléng sé tou linenas-Na.

1 Tesalonika 3:5

Pahpaano niitu, ni aku nimatuma si Timotius i mangé wia ni kamu, pahpaan ni aku én zéi'mo makaezen i mahtata'u um pa'émanen niou. Kaarétku én taa kamu nienouola ni tonaas né sétang makaz ni kamu zéi'mo ma'éman wia si Yesus. Sa mamuali téntu, am pinaayang nai im puuna én zéi'kan siapa torona.

2 Tesalonika 2:17

menté' un até niou wo mangun ni kamu makawawa im wana péléng am paayangen wo wana a nunuwu'en wangun.