1 Tesalonika 2:9 - Taaz Weru Witu u Nunuwu'en Tombulu

⁹ Katuari-katuari, kagenangan nioupé'la kura kai in totoz mahtututu' wo ma'ulit i mahpaayang. Endo wo wengi ni kai mahpaayang i mahwuwutul am pemandungen nai. Karia in téntu, ni kai én zéi'kan maéndo pengalin niou i mahtuzu' u Nuwu' Lé'os ni Opo Empung wia ni kamu.

1 Tesalonika 2:9 ပူးပေါင်းရင်းမြစ်များ

Lukas 18:7

Si Opo Empung é sumawang um pahéndo-éndoan né tou-Na sé endo wo wengi én zéi'kan kumana' i mahtawah ni Sia. Wo ni Sia én zéi'kan mahuré-uré i sumawang ni séra.

Lukas 2:37

niitumo ni sia é mahesa-esamokan. Wo ung katou-touanna in tarékan ém waluna pulu' wo epatna ta'uno. Ni sia sekezé é mahragés wia si Opo Empung witi Walé ni Opo Empung. Endo wo wengi ni sia é mahpuasa wo sekezé é mengaléi.

Kisah Rasul-rasul 18:3

Si Paulus nimento' karia néra pahpaan um pahpaayangenna karia ni Akwila é masuat. Ni séra mahpaayang mahwali-wali i memamangun an ténda.

Kisah Rasul-rasul 20:24

Taan ni aku én zéi'kan mahwéhé genang witu ung katou-touangku kenu, asal uman um paayangen méiwéhé ni Yesus Mahpiara wia ni aku én toro ipakasampetku i mahwoka' u Nuwu' Lé'os tumoro si Yesus u méitambéré ni Opo Empung.

Kisah Rasul-rasul 20:31

Niitumo ni kamu é léwo'zéi' in tuméga-tégam. Gena-genangen, teluna ta'un ung kauréna endo wo wengi ni aku zéi'kan mazéi' i mahsésa wia ni kamu si esa wo si esa karia im pahlué'an.

Roma 1:1

Um pinantik kenu ém wia ni aku Paulus, ata ni Kristus Yesus, si tinawah ni Opo Empung i maéndo aatu ni Yesus Kristus wo tinotoz i mahwoka' u Nuwu' Lé'os ni Opo Empung.

Roma 15:16

Ni Siamo si nimatumé ni aku i maéndo memamaayang ni Kristus Yesus i mangé wia sé tou zéi'kan Yahudi i mahwoka' u Nuwu' Lé'os ni Opo Empung. Um paayangengku én tanu sé walian i mengangali a raragés makaz sé tou zéi'kan Yahudi én toro sungkulen ni Opo Empung tanu a raragés a linenas ni Roh Lenas wia si Opo Empung.

Roma 15:19

karia a makakompo'en wo an zéi'kan kakuaan pahpaan ung kawasa ni Roh ni Opo Empung. U Nuwu' Lé'os tumoro si Yesus Kristus é mémoipahwoka'kumé wia sé tou, rengané im witi Yerusalem makaz witi Ilirikum.

1 Korintus 4:12

wo ni kai é mahpaayang am papaayangen wutez karia a lengen nai i mahwuwutul am pemandungen nai i mendo-endo. Zozo' ni kai ipahsalou né tou, ni kai é mahaléi wia si Opo Empung ing kumamangé ni séra; zozo' ni kai ém pahzézéhan né tou taan ni kai én ezen i mengali niitu.

1 Korintus 9:15

Taan zéi'kan kawisa ni aku nimahaléi u léwo'zéi' ing kailekangku itii. Ni aku i nimantik ang kenu én zéi'kan i mekisawang. Tawimo aku matéla taan u nimaéndo kaloozangku mazéi'ma.

1 Korintus 9:18

Sa téntu, apa un iwaér wia ni aku? Un iwaér wia ni aku é: ni aku mahpaa-paaz i mahwoka' u Nuwu' Lé'os tumoro si Kristus in zéi'kan pahwaéran wo ni aku zéi'kan nimahaléi u léwo'zéi' kailekangku in aatu mahwoka' u Nuwu' Lé'os itii.

1 Korintus 9:4

zéi'kan toro wé kai kuman wo melep im wana am pinaayang nai?

2 Korintus 11:27

Ni aku én totoz ma'ulit wo mahtututu' i mahpaayang, makalakez in zéi'kan timekel, maharem wo maré'o, makalakez ing kinaapuan kanen, wo kasii mahpendan un zaté wo zéi'kan siapa karai sawelen.

2 Korintus 11:9

Sa am pemandungengku én zéi'kan wutul i mahwali-wali karia niou, zéi'kan kawisa aku sumusa si esa im wia ni kamu. Pahpaan, péléng am pemandungengku én ipahwéhémé né katuari esa pa'émanen sé witi Makedonia a méyé. Ni aku én totoz tégam im wana am péléng, én taa ni aku maéndo pengalin im wia ni kamu. Téntu u mawangunengku.

2 Korintus 6:5

im pahwélwélen, im binui wo pahléndongan né tou lakez, i ma'ulit mahpaayang, in zéi'kan mahtekel wo in zéi'kan mahkan.

Filipi 4:16

Pahpaan i ni aku witi Tesalonika, ni kamu ém woo makapira i nimahwéhémé a sasawang wia ni aku.

1 Tesalonika 1:3

Sekez kai i mengaléi wia si Opo Empung wo si Ama'ta, ni kamu ém pegena-genangen nai pahpaan am pahpaayangen niou i ma'éman wo kura kamu i mahsawang sé tou walina pahpaan rumaraaté ni séra wo kasii pahpaan ung kaezenan niou i mahéré' wo ma'éman uman wia si Yesus Kristus Mahpiarata, zozo' in zézéha.

1 Tesalonika 2:2

Kata'uan niouo kasii, puunala kai i niméyé wia an Tesalonika, ni kai é zinézéhamé wo pinahséro'ané im witi Filipi. Taan zozo' lakez sé tou mahsaru ni kai, si Opo Empungta é simawang ni kai akaz ni kai zéi'kan maindé' i mahwoka' u Nuwu' Lé'os-Na im wia ni kamu.

1 Tesalonika 2:6

Ni kai kasii én zéi'kan kawisa i menéro u lolooz né tou, im wia ni kamu kaapa im wia sé tou walina. Un ulitna, in aatu ni Yesus Kristus, ni kai én toro mahaléi apa uman wia ni kamu, taan ni kai é soo un téntu.

1 Tesalonika 3:10

Endo wengi ni kai é ma'ulit i mengaléi wo kai toro mahilekan sumaup karia niou wo toro tumuzu' wia ni kamu i lumekep an zéi'kampé' lekep witu um pa'émanen niou.

1 Timutius 1:11

mengiit u Nuwu' Lé'os ni Opo Empung si wangko' wo pahloozen, tanu u méitarawésamo wia ni aku im paayangengku.

1 Timutius 4:10

Pahpaano niitu ni kita mahtututu' wo ma'ulit i mahpaayang, pahpaan ni kita niméré' uman wia si Opo Empung si Menou-nou, si nimilot péléng sé tou im witu un ukuman wana a singkéla', sé pahpuu-puuna é sé tou ma'éman wia ni Sia.

1 Timutius 5:5

Si wéwéné mahesa-esamokan, si uli-ulit menou-nou mengesa-ngesamokan wo zéi'kan siapa koki' kaapa puyun, ni sia é niméré' uman wia si Opo Empung. Endo wo wengi ni sia é mengaléi wo mekisawang wia si Opo Empung.

2 Timutius 1:3

Ni aku éng kumua makasé wia si Opo Empung si pahpaayangangku karia ung genang weresi, tanu um pinahwanguné né nimaopoku. Sekez ni aku mengaléi in endo kaapa im wengi, ni ko ém pegena-genangengku.