1 Tesalonika 2:2 - Taaz Weru Witu u Nunuwu'en Tombulu

² Kata'uan niouo kasii, puunala kai i niméyé wia an Tesalonika, ni kai é zinézéhamé wo pinahséro'ané im witi Filipi. Taan zozo' lakez sé tou mahsaru ni kai, si Opo Empungta é simawang ni kai akaz ni kai zéi'kan maindé' i mahwoka' u Nuwu' Lé'os-Na im wia ni kamu.

1 Tesalonika 2:2 ပူးပေါင်းရင်းမြစ်များ

Kisah Rasul-rasul 14:3

Niitumo, si Paulus wo si Barnabas én urékan oki' i nimahento'mé witu. Wo karia im wuaya ni séra mahnuwu' tumoro si Yesus Mahpiara. Ni Sia nimapailek sa an ipahnuwu' néra tumoro ung kamang tatambér-Na én ulit, karia i niméhé ung kawasa wia ni séra i mahwangun a makakompo'en wo an zéi'kan kakuaan.

Kisah Rasul-rasul 14:5

A méhé sé tou Yahudi wo sé tou zéi'kan Yahudi karia né tonaas néra, maesaala in zumézéha wo merit sé aatu itii karia am watu.

Kisah Rasul-rasul 16:12

Im witi Neapolis a ni kai lumampang mangé witi Filipi. Um wanua tua'na itii én totoz ipahpuu-puuna im witi tana' Makedonia, wo kasii um wanua tua'na itii éng kinawasa né pemerénta Romawi. Im witu ni kai é nimento'mé woopirana endo.

Kisah Rasul-rasul 16:19

Ing kinata'uanla né tuang ni wéwéné itii i ni séra én zéi'mo mata'u makailek zoit mengiité si wéwéné itii, a si Paulus wo si Silas tionan nérala, ang kéhongené méipahwalima witi unez um pahkaréwokan né tou in isaru wia sé mahkawasa witu um wanua tua'na itii.

Kisah Rasul-rasul 16:37

Taan si Paulus éng kimua umanla wia sé tou itii, “Zozo' in zéi'kampé' tinotoz am winangun nai in ulit kaapa zéi'kan, sé mahkawasa wia um wanua tua'na kenu é nimatumola tou i simaluk ni kai in tou Roma, witu u sinaru né tou lakez. Tumondong niitu, ni kai kasii é méiuntep nérala witi bui. Wo in tarékan, ni kai én ipilot néra karia in ipahwuni-wuni? Tantumo ni kai é soo! Iatumomé sé mahkawasa itii i méyé wia'i i mémilot ni kai.”

Kisah Rasul-rasul 17:1

Si Paulus wo si Silas limampang kimiita witi Amfipolis wo Apolonia an ikaayola witi Tesalonika. Witi Tesalonika ém wéwéhan um walé peraragésan né tou Yahudi.

Kisah Rasul-rasul 17:17

Niitumo, im witi walé peraragésan né tou Yahudi ni sia simirita karia né tou Yahudi wo sé tou zéi'kan Yahudi sé maindé' si Opo Empung. Wo sekez in endo im witi pemamangkéran, ni sia mahsirita karia né séi uman sé ipasungkulna.

Kisah Rasul-rasul 19:8

Teluna loloho'en ung kauréna si Paulus i mengangangé witi walé peraragésan né tou Yahudi. Ni sia ém wuaya i mahnuwu' wo mahzéi-zéi'an karia né tou witu, i mahwawangun ni séra wo ma'éman tumoro ung Kakolanoan ni Opo Empung.

Kisah Rasul-rasul 4:13

Sé tou méikauntep witu u Mahkama Agama é mengusi-ngusingsing i nimilekla si Petrus wo si Yohanes zéi'kan maindé' i mahwingkoté wo ni séra kasii é mata'u i ni séra zua én tou kanaramen wo zéi'kan simikola. Kinata'uan néra kasiila i ni séra zua é mahkii-kiit si Yesus.

Kisah Rasul-rasul 4:20

Pahpaan zéi'kan mamuali a niilek wo an tinalinga naimo, zéi'kan ikua nai wia sé tou.”

Kisah Rasul-rasul 4:31

Karegas i mengaléi, un tampa kinaréwokan néra é mahogémo. Ni séra péléng éng kinawasamo ni Roh Lenas, a séra mahwoka' u Nuwu' ni Opo Empung karia in zéi'kan siapa un ikaindé'.

Kisah Rasul-rasul 5:41

Sé aatu ni Yesus itii mondolé im witu um pahtotozan né Mahkamah Agama karia i mahpaa-paaz, pahpaan ni séra é mahgenangla wangun mazézéha im pahséro'an pahpaan u Ngaran ni Yesus.

Roma 1:1

Um pinantik kenu ém wia ni aku Paulus, ata ni Kristus Yesus, si tinawah ni Opo Empung i maéndo aatu ni Yesus Kristus wo tinotoz i mahwoka' u Nuwu' Lé'os ni Opo Empung.

2 Korintus 3:12

Pahpaan ni kai niméré' witu um pinataazan weru um wia si Opo Empung, niitumo ni kai én zéi'kan maindé' i mahwoka' u Nuwu' Lé'os tumoro si Yesus wia sé tou.

Kolose 2:1

Pahpaan kapaazku ni kamu mata'ula, i ni aku én totozo nima'ulit mahpaayang i sumawang ni kamu in jamaat witi Kolose wo sé witi Laodikia, wo wia péléng sé tou zéi'kampé' nimahile-ilekala kariaku.

1 Tesalonika 1:5

Pahpaan u Nuwu' Lé'os tumoro si Yesus un ipahtuzu' nai wia ni kamu én zéi'kan uman karia u nunuwu'en, taan karia ung kawasa ni Roh Lenas wo karia ung kaulitan u Nuwu' Lé'os un totoz kata'uan nai. Kata'uan niouo kura ni kai mahpaayang i mahsawang ni kamu, i ni kai memali-mali karia niou.

2 Timutius 1:12

Pahpaano niitu, ni aku mengali péléng an zézéha kenu. Taan ni aku én zéi'kan maizang, pahpaan kata'uangku séi si pa'émanengku wo totoz ing kata'uangku, ni Sia é mahkawasa i mahtéiz am pahpaayangengku u mémoitarawésa-Na wia ni aku, makaz witu un endo kaakazan ung kaayahan.

Yudas 1:3

Katuari-katuari ikararaatéku, ni aku én totoz mahtututu' i nimantik tumoro ni kita péléng i mémoipiloté im witu un ukuman wana a singkéla'. Ni aku én totoz paaz i mantik um pinantik kenu wo sumésama wia ni kamu, wo kamu uli-ulit mahtututu' i rumembe-rembet witu um pa'émanen u mémoiwéhé wia sé tou linenas ni Opo Empung.