1 Tesalonika 1:3 - Taaz Weru Witu u Nunuwu'en Tombulu

³ Sekez kai i mengaléi wia si Opo Empung wo si Ama'ta, ni kamu ém pegena-genangen nai pahpaan am pahpaayangen niou i ma'éman wo kura kamu i mahsawang sé tou walina pahpaan rumaraaté ni séra wo kasii pahpaan ung kaezenan niou i mahéré' wo ma'éman uman wia si Yesus Kristus Mahpiarata, zozo' in zézéha.

1 Tesalonika 1:3 ပူးပေါင်းရင်းမြစ်များ

Yohanes 14:15

Kuan ni Yesus kasii wia sé pahtuzu'en-Na, “Sa kamu rumaraaté ni Aku, ni kamu é mangun a méiperénta-Ku.

Yohanes 15:10

Sa ni kamu mahkii-kiit am perénta-Ku, ni kamu é menou-nou in tou sé karaaté-Ku. Tanu ni Aku i mahkii-kiit am perénta ni Ama'-Ku wo ni Aku é menou-nou in tou si karaaté-Na.

Kisah Rasul-rasul 10:31

A sia kumuamé in téntii wia ni aku, ‘Kornelius, am pengaléiennu én tinalingamoma ni Opo Empung wo an ipahwéhému wia sé tou éng ginenang-Namo.

Kisah Rasul-rasul 3:19

Niitumo, itula'umola a singkéla' niou wo kumiitola si Opo Empung. Karia in téntu, a singkéla' niou ém pali'en ni Opo Empung.

Roma 12:12

Mahpaa-paazola im wana am pahéré'an, meze-ezen im wana am pengalin wo tia' mahkana' i mahmengaléi.

Roma 15:13

Mengalé-ngaléi uman si Opo Empung, si mahwéhémé am pahéré'an é méhémé malake-lakez wia ni kamu u mahpaa-paaz wo ung kaluasan witu un até pahpaan ni kamu ma'éman wia ni Sia. Wo karia ung kawasa ni Roh Lenas, um pahéré'an niou é malake-lakez wia si Opo Empung.

Roma 15:4

Péléng a mémoipantik witu um Pinantik Lenas ém pinantik in tumuzu' ni kita. Pahpaan an tutuzu' kinailekanta witu um Pinantik Lenas, nimangun ni kita in ezen wo enté' un até wo kita wéwéhan um pahéré'an wia si Opo Empung.

Roma 16:26

In tarékan witu um perénta ni Opo Empung si makaz ing kauré-uré, u méikawunipé' itii é mémoipahwoka' wana a méipantik né nabi wia péléng sé tahsasana wanua i mahkit ni séra i mahtali-talinga wia si Opo Empung si pa'émanen néra.

Roma 16:6

U sigi'ku wia si Maria si totozo nima'ulitla i mahpaayang karia niou.

Roma 2:7

Si Opo Empung é méhé ung katou-touan makaz ing kauré-uré wia sé tou sé zéi'kan mazéi' mahwangun am wangun i menéro u sisigi'an, u lolooz wo ung katou-touan un zéi'kan maléwo'.

1 Korintus 13:13

In tarékan, un telu kenu u léwo'zéi' sekezé ém pahwangunenta: ma'éman wia ni Sia, mahéré' uman wia ni Sia wo u raraatéan. Witu un telu itii, un totoz wangko' é raraatéan.

1 Korintus 15:58

Niitumo, katuari-katuari ikararaatéku, rumendaila menté-enté', tia' mahzua-zua genang i ma'éman. Mahtututu'la i mahpaayang am paayangen méiwéhé ni Mahpiara wia ni kamu, pahpaan kata'uan niouo im witu u sinaru ni Mahpiara, zéi'kan siapa am pinaayang niou an zéi'kan siapa torona.

2 Korintus 2:17

Ni kai én zéi'kan mahwangun tanu sé tou lakez walina, pahpaan ni séra i mahwoka' u Nuwu' ni Opo Empung én tanu mahwangkér i menéro uman ang kawa'ilanan néra. Taan ni kai i mahkiit si Kristus én uli-ulit mahwoka' uman u Nuwu' ni Opo Empung wia sé tou, witu u sinaru-Na wo mahkiit uman a méiperénta-Na.

Galatia 1:4

Karia um paaz ni Opo Empung si Ama'ta, si Yesus Kristus nimayo un tou-Na in tumubus ni kita im wana a singkéla' pahwangunenta wo milot ni kita im wia ung kaayahan léwo' kenu in tarékan.

Galatia 5:13

Katuari-katuari, ni kamu én ulit tinawahmo i maéndo tou zéi'mo pahata-atan. Taan tia' un zéi'mo pahata-atan itii én éndon niou oras i menou-nou mahwangun a singkéla'. Taan tawimo pahsawangala sé tou walina karia u raraatéan.

Galatia 5:6

Pahpaan sinunat kaapa zéi'kan sinunat é masuat uman im wia sé tou sé nimaesamo karia ni Kristus Yesus. Un totoz ipahpuu-puuna é ma'éman si Kristus Yesus un toro pa'ileken karia i rumaraaté sé tou walina.

Galatia 6:9

Tia' maseso' i mahwangun a lé'os, pahpaan sa kita zéi'kan maseso' mahwangun niitu, i méikaayomola witu un oras tinotoz ni Opo Empung, ni Sia é méhé am wangun wia ni kita. Niitu é masuat wo si timanem i mupu' u méitanemna.

1 Tesalonika 3:6

In tarékan si Timotius é nimawurimomé im witi Tesalonika, ni sia é simirita u sirita makapaazen tumoro ni kamu u nimangun ni kai i mahpaa-paaz. Méikuana tumoro um pa'émanen niou wo u mahraa-raatéan niou. Méikuana kasii, sekez ni kamu ikagenangla ni kai, ni kamu é mahpaa-paaz wo paaz i mahilekan sumaup karia nai, tanu ni kai kangkasii ém paaz i mahilekan karia niou.

2 Tesalonika 1:11

Pahpaano niitu, ni kamu én zéi'kan mazéi' in ipahpengaléi nai, wo si Opo Empung gumenang ni kamu wangun menou-nou in tou sé tinawahmo ing kumiit ni Sia. Ni kai kasii mengaléi wia si Opo Empung karia ung kawasa-Na in tumulung ni kamu sumampet péléng am wangun ang ginenang niou im wangunen wo i sumampet péléng am paayangen niou pahpaan ma'éman wia ni Sia.

2 Tesalonika 1:3

Katuari-katuari, pahpaan ni kamu ni kai sekezé é léwo'zéi' ing kumua u makasé wia si Opo Empung. Ni kai é léwo'zéi' i mahwangun un téntu pahpaan ni kamu éng kalousnamo i ma'éman wia si Yesus wo ni kamu si esa wo sé walina éng kalousnamo i mahraa-raatéan,

1 Timutius 1:14

Taan lumouspé'mé niitu, ung kamang méitambéré ni Mahpiarata wia ni aku én totozo lakez, makaz ni aku ma'éman wia ni Sia wo rumaraaté sé kasuat tou pahpaan nimaesamo karia ni Kristus Yesus.

1 Timutius 2:3

Niitumo um wangun wo kapaaz ni Opo Empung, si milot ni kita im witu un ukuman wana a singkéla'ta.

Ibrani 10:36

Ni kamu én tia' mahkana' i ma'éman zozo' im pahzézéhan, wo ni kamu makailek u méitaaz ni Opo Empung pahpaan nimakawangunola an ikapaaz-Na.

Ibrani 11:17

Pahpaan i ma'éman, si Abraham im pema'wa'en ni Opo Empung é niméhé si Ishak in iragés wia ni Sia. Si Abraham si nimakailekola u méitaaz ni Opo Empung itii ém paaz i méhé si Ishak si oki'na si esa uman in iragés,

Ibrani 13:21

Mengalé-ngaléi uman si Opo Empung é sumawang ni kamu i mangun péléng am wangun mengiit un ikapaaz-Na, wo maayang witu ung katou-touanta i mangun ni Sia mahpaa-paaz, mengiité si Yesus Kristus. Wia si Kristus uman u sigi' wo looz makaz ing kauré-uré! Amin.

Ibrani 4:11

Niitumo, tawimo kita mahtututu'la i muntep witi tampa pahkanaan itii, wo zéi'kan siapa zozo' in esa si zéi'kan méikauntep witi tampa pahkanaan itii pahpaan mahkiit uman am pahwangunen né tou zéi'kan mahtali-talinga si Opo Empung.

Ibrani 6:15

Si Abraham én totoz ezen i ma'ento' un taaz itii. Niitumo ni sia nimakailek u méitaaz ni Opo Empung wia ni sia.

1 Petrus 3:4

Taan u nimangun ni kamu kéndis ém witu un até a méyé un zéi'kan mahzéi-zéi'la tanu ang kenu: eluz uman wo zéi'kan mengupi-ngupi'. Niitumo un totoz kapaaz ni Opo Empung.

1 Yohanes 3:18

É kamu in oki'ku, méyémo kita mahraa-raatéan zéi'kan uman witu u sumah kaapa witu u lila', taan wana am pahlé'osen wo witu ung kaulitan.

1 Yohanes 3:21

Katuari-katuari ikararaatéku, sa un atéta zéi'kan mapahsasala' ni kita, niitu é mangun ni kita zéi'kan maindé' i rumété wia si Opo Empung

1 Yohanes 3:3

Si tou niméré' un téntu wia ni Sia é limenas un touna tanu si Kristus i lenas.

1 Yohanes 5:3

Pahpaan ung kenumo u rumaraaté wia si Opo Empung: Ni kita é mahkiit am perénta-Na. Am perénta-Na itii én zéi'kan wutez,

Wahyu 2:19

Kata'uang-Ku péléng am pinaayang niou: U raraaté niou wo kasii um pa'émanen niou, um paayangen niou wo ung kaezenan niou im wana an zézéha. Kata'uang-Ku am pinaayang niou in tarékan é lumouspé'mé am pinaayang niou im puuna in taré ma'émanla wia ni Aku.

Wahyu 3:10

Pahpaan ni kamu én zéi'kan mazéi' i mahkiit a nuwu'-Ku in ezen ma'ento' ni Aku, niitumo, ni kamu éng kelungang-Ku im wana am pema'wa'en a mamuali wia péléng ung kaayahan i méma'wa' sé tou memia-mia ung kaayahan.