1 Petrus 5:5 - Taaz Weru Witu u Nunuwu'en Tombulu

⁵ Téntu kangkasii ni kamu im weru tou é léwo'zéi' i mahtali-talingala wia sé tu'a. Wo ni kamu péléng, irorosla un tou niou si esa wo si esa, pahpaan im witu um Pinantik Lenas é méipantik in téntii, “Si Opo Empung é makahkoro' wo sé tou wera', taan sé tou roros até én tambéran-Na ung kamang.”

1 Petrus 5:5 ပူးပေါင်းရင်းမြစ်များ

Lukas 22:26

Taan ni kamu én zéi'kan toro mahwangun un tanu niitu. Séi si totoz wangko' im wia ni kamu é maéndomola tanu si totoz kori' wo si tonaas é maéndomola tanu si menenelewir.

Roma 12:10

Mengalé-ngaléi ni kamu é mahraa-raatéan tanu a mahtuari wo mahpuu-puunala i mahwéhé a sisigi'an.

Roma 13:14

Taan méyémo kita maéndo tanu si Yesus Kristus Mahpiara, wo pahilekené né tou am pahwangunenta. Karia in téntu, ni séra én tanu nimilek ni Sia witu un touta. Wo tia'mo megena-genang uman ing kumiit a lelo léwo' un awakmu in esa.

Efesus 5:21

Irorosla un toumu wia si esa wo si esa pahpaan ni kamu mahsigi' si Kristus.

Filipi 2:3

Tia' menéro-néro uman um pemandungen in esa kaapa menéro-néro a lolooz an zéi'kan siapa torona. Tawimo in irorosla un tou niou wo pahgenangela i sé tou walinapé' sé ipahpuu-puuna taan un tou in esa.

Kolose 3:12

Pahpaan nimaéndomo tou pinéléng wo ikararaaté wo linenas ni Opo Empung, niitumo ni kamu é mapailekla u raraatéan, ung kalé'osan, u roros até, ung kaeluzan wo ung kaezenan.

1 Timutius 5:1

Timotius! Tia' mahrekak wia sé tuama tu'amo. Taan maheluz umanla i mahnuwu' wia ni séra tanu i mahnuwu' wia si ama'mu. Wo pahnuwu'ala sé tarétumou tanumokan ko i mahnuwu' wia sé tuarimu.

Ibrani 13:17

Pahtali-talingala sé tonaas niou wo mahkii-kiitla ni séra, pahpaan si Opo Empung si niméhé um paayangen wia ni séra in tuméiz um pa'émanen niou in tou mahwangun a méiatu ni Opo Empung. Karia in téntu, ni séra i mahtéiz um pa'émanen niou éng karia i mahpaa-paaz, zéi'kan karia i mema'o-ma'os. Pahpaan sa séra mema'o-ma'os, um pahpaayangen néra én zéi'kan siapa torona im wia ni kamu.

Yakobus 4:6

Taan ung kamang méitambér-Napé' um wangko' taan niana péléng. Niitumo, witu um Pinantik Lenas é méipantik in téntii, “Si Opo Empung é makahkoro' wo sé tou loozan, taan rumaraaté sé tou roros até.”

1 Petrus 3:8

Ing kamurian, kapaazku ni kamu én esa genang, mahgena-genangan, rumaraaté sé tou esa pa'émanen, meripu' umané i rumaraaté wo zéi'kan wera'.

1 Petrus 4:1

Pahpaan si Kristus é nimendanomé an zézéha witu un awak-Na, niitumo ni kamu kangkasii é léwo'zéi' tumégamla karia i mahgenang tanu niitu. Pahpaan séi si nimendanomé an zézéha witu un awakna, ni sia én zéi'mo memua-muali a singkéla'.

1 Petrus 4:5

Taan ni séra é léwo'zéi' i lamakaulit péléng am winangun néramé wia si Opo Empung. Ni Sia é nimimeko in tumotoz ulit kaapa zéi'kan am pinahwanguné né tou, sé menou-noupé' wo sé nimatémo.