1 Petrus 5:4 - Taaz Weru Witu u Nunuwu'en Tombulu

⁴ Wo i si Kristus si memimiara sé domba si totoz wangko' itii i mawurimé sumaup, ni kamu in tonaas né jamaat é makailek ung kukulu un totoz wangun un zéi'kan mahléwo-léwo'la.

1 Petrus 5:4 ပူးပေါင်းရင်းမြစ်များ

Yohanes 10:11

Ni Akumo si memimiara sé domba si lé'os uman. Si memimiara domba lé'os é mayo ung katou-touanna pahpaan sé dombana.

1 Korintus 9:25

Sé tou kumiit i mahlolowaan é léwo'zéi' makaezen a lelo néra im wana am péléng, wo séra toro makailek ung kukulu wia ung kaayahan u maléwo' uman. Taan ni kita mahlolowaan i makailek kukulu un zéi'kan maléwo'.

2 Timutius 4:8

In tarékan ung kukulu iwéhé wia ni aku é niimeko ni Opo Empung, pahpaan ni aku é nimangunola an ulit witu u sinaru-Na. Ni Sia én zéi'kan mahsanaweka i mahtotoz ulit kaapa zéi'kan am pahwangunen né tou. Zéi'kan uman ni aku si makailek niitu, taan maan péléng sé ma'ento' si Yesus i mawurimé sumaup.

Ibrani 13:20

In tarékan si Opo Empung si mahwéhémé ung kaluasan witu un até én timoumomé sumaup si Yesus im wia sé nimaté. Si Yesus si Mahpiarata ém winangun ni Opo Empung i maéndo menanatér sé tou-Na, si totoz wangko', tanu si memimiara sé domba, si totoz pahsigi'en. Wo un zaha'-Na é nimangun um pinataazan ni Opo Empung karia né tou makaz ing kauré-uré.

Yakobus 1:12

Mahpaa-paazola si tou ezen im wana am pema'wa'en, pahpaan sa sia ezen, ni sia é makailek ung kukulu, ung katou-touan makaz ing kauré-uré u mémoitaaz ni Opo Empung wia sé tou rumaraaté ni Sia.

1 Petrus 1:4

Im witu um pahéré'anta itii, pa'émanenta i ni kita én toro makailek a sangkum. A sangkum itii éng kamang ni Opo Empung a méilé'os witi kasendukan an iwéhé wia ni kita. Ang kamang itii én zéi'kan maléwo', zéi'kan makilamu' wo zéi'kan maweles.

1 Petrus 2:25

Pahpaan im puuna ni kamu é masuat wo sé domba méikalulu, taan in tarékan ni kamu é nimawurimomé sumaup wia si Opo Empung, si memimiara sé domba wo mahpiara si roh niou.

1 Petrus 5:2

Piarala sé domba ni Opo Empung sé wia ni kamu. Tia' karia in totoz pahlusun, taan karia u mahpaa-paaz tanu ung kapaaz ni Opo Empung. Tia' menéro-néro uman ang kauntungan, taan iwéhéla un tou niou in uli-ulit mahsawang.

1 Yohanes 3:2

Katuari-katuari ikararaatéku, in tarékan ni kita én oki' ni Opo Empung, taan zéi'kampé' kata'uanta u mamuali wia ni kita. Taan kata'uanta sa si Kristus mapailekomé un tou-Na, ni kita é maéndo tanu ni Sia. Pahpaan ni kita é mamilek un ulitna ung katou-touan-Na.

Wahyu 1:7

Ilekena! Ni Sia é méyé witu um wawo a ninahak, wo péléng sé tou wia ung kaayahan é milek ni Sia. Téntu kangkasii sé im puuna nimetu ni Sia karia um wengkou é milek ni Sia. Péléng sé tou wia ung kaayahan é mamé' karia i mahkérét pahpaan ni Sia. Niana péléng é mamuali téntu. Éné, amin.

Wahyu 2:10

Tia'mo maindé' wana an zézéha a léwo'zéi' im pendanen niou. Gena-genangen! Pahpaan i ma'éman ni Aku, sé woopira im wia ni kamu én iuntep ni tonaas né sétang witi bui im pema'wa'en wo zézéhan witu, mapulu'na endo ung kauréna. Taan zozo'pé' in téntu, ni kamu én tia' mazéi' i ma'éman wia ni Aku makaz i maté, wo ni kamu ém wéhang-Ku ung katou-touan makaz ing kauré-uré. Niitu ung kukulu-Ku wia ni kamu.

Wahyu 3:11

Zéi'mo uré ni Aku é méyémo! Tio-tionan am wiamo ni kamu, wo zéi'kan siapa sé méndo ung kukulu un tanumokan poporongen ni kolano u méiwéhé-Ku wia ni kamu.