1 Petrus 5:12 - Taaz Weru Witu u Nunuwu'en Tombulu

¹² Karia im pinahsawangala ni Silas, ni aku nimantika um pinantik potot uman kenu. Totoz kata'uangku i si Silas kenu éng katuariku esa pa'émanen wo ni sia én toro pahtali-talingan. Um pinantik kenu ém pinantikku wo iwéhékuma i sumésama wo totoz mapagenanga wia ni kamu sa niia én uli-ulit kamang méitambér um wia si Opo Empung a méyé. Totoz in enté'ela um pa'émanen niou im wana ang kamang méitambér ni Opo Empung itii.

1 Petrus 5:12 ပူးပေါင်းရင်းမြစ်များ

Yohanes 21:21

I si Petrus nimileka si pahtuzu'en itii, ni sia kimuama wia si Yesus, “Tuang, apa u mamuali wia si tou kenu?”

Kisah Rasul-rasul 11:23

I si Barnabas méikaayomola witu, an ilekennala kura si Opo Empung in timambér ung kamang wia ni séra, ni sia én totoz mahpaa-paaz. A séra sésaanala in zéi'kan toro mazéi' i ma'éman wia si Yesus Mahpiara.

Kisah Rasul-rasul 15:22

A sé aatu ni Yesus wo sé penatua wo péléng sé jamaat timotozla i méléng sé woopira tou im wia ni séra. Sé tou pinéléngo itii én iatu mangé witi Antiokhia karia ni Paulus wo ni Barnabas. Sé pinéléng itii é: si Yudas pahkuan Barsabas wo si Silas. Ni séra zua ém pahsigi-sigi'en im wia sé katuari esa pa'émanen.

Kisah Rasul-rasul 20:24

Taan ni aku én zéi'kan mahwéhé genang witu ung katou-touangku kenu, asal uman um paayangen méiwéhé ni Yesus Mahpiara wia ni aku én toro ipakasampetku i mahwoka' u Nuwu' Lé'os tumoro si Yesus u méitambéré ni Opo Empung.

Roma 5:2

Ni kita sé ma'éman ém winéhan u lalan i mé'an ung kamang itambéré ni Opo Empung pahpaan si Yesus Kristus. Ung kamang kenu u nimangun ni kita menou-nou wo mahpaa-paaz pahpaan mahéré'la i makailek u sigi' wo looz ni Opo Empung.

1 Korintus 15:1

In tarékan katuari-katuari, ipapagenangkuma sumaup u Nuwu' Lé'os tumoro si Yesus u mémoipahwoka'ku wia ni kamu. U Nuwu' Lé'os itii éng kinailekan niouo wo uli-ulit pa'émanen niou makaz in tarékan.

2 Korintus 1:19

Pahpaan, si Yesus Kristus, si Oki' ni Opo Empung si méipahwoka'ku karia ni Silwanus wo ni Timotius wia ni kamu én zéi'kan mahkua ‘éné’ wo witu ung ginenang én ‘zéi'kan’. Taan im wia ni Sia én akaz uman mahkua ‘éné’.

2 Korintus 1:24

Ni kai é mahkua an téntu wia ni kamu, zéi'kan i merénta ni kamu tumoro u léwo'zéi' im pa'émanen niou, pahpaan um pa'émanen niou wia si Kristus én enté'mo. Taan kapaaz nai, ni kita én toro maayang mahwali-wali, wo ni kamu toro mahpaa-paaz.

Efesus 3:3

Si Opo Empung é nimapata'umo wia ni aku ang ginenang-Na a méikawunipé', tanu a méipantikumo witu um pinantikku potot kenu.

Efesus 6:21

Si Tikhikus, katuarita esa pa'émanen si ikararaaté nai wo si ma'ulit i mahpaayang wia si Opo Empung é makumua péléng niitu wia ni kamu wo ni kamu toro mata'u kura ni aku in tarékan wo apa um pahwangunengku in tarékan.

Kolose 1:7

Si Epafras si kapaayang totoz ikararaaté nai, ni sia si timuzu' niana péléng wia ni kamu. Im wia ni kamu, ni sia én ata ni Yesus Kristus si toro pa'émanen.

Kolose 4:7

Péléng a nimamuali wia ni aku é mamokan ikuala ni Tikhikus wia ni kamu, ni sia éng katuari esa pa'émanen si ikararaatéta, wo kasii ata mahtali-talinga uman wo kapaayang i mahpaayang wia si Mahpiara.

Kolose 4:9

Ni sia é mangé karia ni Onesimus, si katuari esa pa'émanen, si esaané im wia ni kamu. Ni sia kasii én tou mahtali-talinga uman wo ni kai é rumaraaté ni sia. Ni séra zua é makumua wia ni kamu péléng a nimamuali wia un tampa nai kenu.

1 Tesalonika 1:1

Um pinantik kenu ém wia ni aku Paulus wo wia sé kakariaku si Silas wo si Timotius a mangé. Um pinantik kenu én iwéhé wia ni kamu sé jamaat witi Tesalonika. Ni kamu é ma'éman wia si Opo Empung Ama'ta wo wia si Yesus Kristus Mahpiara. Mengalé-ngaléi uman ung kamang tatambér wo ung kaluasan witu un até, um wia si Opo Empung é menaté-natér ni kamu.

2 Tesalonika 1:1

Um pinantik kenu ém wia ni aku Paulus wo wia sé kakariaku si Silas wo si Timotius a mangé. Um pinantik kenu én iwéhé wia ni kamu sé jamaat witi Tesalonika. Ni kamu é ma'éman wia si Opo Empung Ama'ta wo wia si Yesus Kristus Mahpiara.

Ibrani 13:22

Katuari-katuari, ni aku é sumésama wia ni kamu, zozo' um pinantikku kenu ém potot uman. Mengalé-ngaléi uman ni kamu é sumungkul um pinantik kenu karia i mahpaa-paaz.

1 Petrus 1:13

Niitumo, imekela ung genang niou i maayang am wangun, tuméga-tégam wo mahéré' uman witu ung kamang tatambér ni Opo Empung un iwéhé-Na wia ni kamu witu un oras si Yesus Kristus i mawurimé sumaup.

1 Petrus 4:10

Ni kamu si esa wo si esa ém winéhan un tatambér ni Opo Empung. Niitumo ni kamu sé tou lé'os mengimek an tatambér itii, pahimekela lé'os a méitambéré itii i mahsawang sé tou walina.

2 Petrus 1:12

Pahpaano niitu, niana péléng sekezé én ipapagenangkuma wia ni kamu, zozo' niana péléng éng kata'uan niouo wo an tutuzu' ulit itii én totoz im pa'émanen niouo.

2 Petrus 2:15

Pahpaan ni séra én timula'umola u lalan kaulitan, ni séra é méikalulumo. Ni séra é mahkiit um pahmualin ni Bileam, oki' ni Beor, si paaz im pahwaéran i mahmuali a singkéla'.

3 Yohanes 1:12

Péléng sé tou é nimilek wo mahkua am wangun tumoro si Demetrius, um pahwangunenna é mahkiit ung kaulitan. Ni kai kangkasii é nimilek am wangun tumoro ni sia wo kata'uannu an ipahkua nai én ulit.

Yudas 1:3

Katuari-katuari ikararaatéku, ni aku én totoz mahtututu' i nimantik tumoro ni kita péléng i mémoipiloté im witu un ukuman wana a singkéla'. Ni aku én totoz paaz i mantik um pinantik kenu wo sumésama wia ni kamu, wo kamu uli-ulit mahtututu' i rumembe-rembet witu um pa'émanen u mémoiwéhé wia sé tou linenas ni Opo Empung.